Nitihka pansik, menua Sarawak agi ngembuan mayuh anak mit ti masuk primari 1 ke nadai kala ngasai sereta nerima peneleba belajar ba renggat prasekula, taska tauka tadika.
Nya alai, Majlis Pembangunan Pendididkan Awal Kanak-Kanak Sarawak (MPAKS) deka ngelanggur timpuh panjai, strategi enggau langgur pengawa dikena mutarka pekara nya. Pelajar ba renggat Prasekula, Taska enggau Tabika beguna amat ngagai tiap iku anak mit sebedau sida masuk Primari 1 laban iya ulih meri peneleba ngagai nembiak sebedau sida nyingkang ngagai primari satu.
Statistik Opis Pelajar Menua Sarawak (JPNS) bisi ngeripotka pemayuh nembiak ke nadai nerima pelajar sebedau masuk primari 1, kelebih agi ba menua pesisir. Pekara senentang nembiak ke nadai nerima pelajar sebedau masuk primari 1 patut diputar ngambika sida tu enda tinggal ari pemansang pelajar. Nitihka pansik, Opis Pelajar Pelilih Menua ke bisi ngerikod pemadu mayuh nembiak Primari 1 taun 2011 ke nadai kala ngasaika peneleba belajar ba prasekula nitihka pelilih menua iya nya Sebauh (46.69 persin), Lubok Antu (23.54 persin), enggau Baram (17.25 persin).
Dalam taun 2010 penyampau anak mit ke nadai kala ngasaika peneleba belajar ba renggat prasekula, tadika tauka tabika nitihka pelilih menua iya nya Sebauh manggai 25.84 persin, Baram (25.66 persin) enggau Sri Aman (17.39 persin).
Beduduk ari pekara nya isu akses pelajar tumu ti enda sebela ba Sarawak lebih agi ba pelilih menua mit ke bisi ngerikod anak mit nadai kala ngasaika peneleba belajar ba renggat prasekula baka Opis Pelajar Pelilih Mit Sebauh, Baram, Sri Aman enggau Lubok Antu patut bendar diputarka agensi baka MPAKS. MPAKS patut mega mansik enggau silik pasal perengka pelajar enggau enrolmen pelajar ba tikas prasekula, tadika enggau tabika ba opis pelajar pelilih mit ba empat bengkah menua tu.
Bepelasarka statistik Opis Pelajar Menua Sarawak (JPNS) dalam taun 2010, penyampau nembiak primari 1 ba menua Sarawak iya nya 40,297 iku lalu ari penyampau nya 94.50 persin bisi nerima pelajar prasekula, tadika enggau taska sereta 5.50 persin ke bukai nya endang nadai kala.
Nitihka pansik statistik nya mega, Opis Pelajar Pelilih Mit Tatau bisi ngerikodka penyampau 100 peratus nembiak Primari 1 taun 2010 ke bisi nerima pelajar prasekula, taska tauka tadika, lalu ditangkanka Samarahan (98.55 persin) enggau Sarikei (98.48 persin).
Tiada ulasan:
Catat Ulasan