Jaku Iban Nujah Ubah Pemansang rambai jaku Forum Iban ke diatur Berita Iban Utusan Borneo enggau Mimbar Permaufakatan ibubapa Malaysia (MAPIM) lalu disukung Opis Menteri Pemansang Rama enggau Kandang Mengeri deka diatur kenaka 17 September 2011 tu.
Raban komiti pengatur pengawa begulai enggau raban ari Mapim ke betuaika Wan Zain kemari ngatur siti agi aum alai raban tu bejurai sereta berandauka kuing forum nya ila. Aum nya betuaika siku bansa Iban ke tebilang ba pengawa adat enggau main asal lalu mega pengerembai jaku Iban iya nya Dato Seri Edmund Langgu.
“Asil ari forum tu ila, kitai deka meda jaku Iban ulih diangkatka nyadi siti jaku ke diajar ba sekula serata Malaysia. Nengah forum tu mega sepil jaku iban ulih digaga ‘standardise’ lalu nya dikena genap iku kitai ke ngaga karang ba jaku Iban taja pan ari bunyi sebut ke enda sebaka nitihka ai,” ku Edmund.
Edmund madahka forum tu ila megai tanggung pengawa ngangkatka jaku Iban nyadi siti jaku ke diajar ba serata Malaysia ti sama tikas enggau jaku Cina enggau India kelimpah ari jaku English enggau Bahasa Malaysia.
Iya mega bisi madahka pengawa iya ke ngaga bup ‘Serebareti’ (kamus Iban ke Iban) nengah Tun Jugah Foundation. Urung 47,000 leka jaku Iban udah dipejuraika lalu nya nyengkaum leka jaku ari semua endur berengkah ari Lundu datai ke Limbang.
Ba aum nya Wan Zain ari Mapim merambu numbuhka Kunsil Akedemik jaku Iban nyadika palan penapis pengalus ngambika jaku Iban ulih dikena nengah chara tauka sepil ke betul nitihka atur ti udah ditetapka.
‘Kitai arap nengah forum tu ila, Kunsil Akedemik ulih ditumbuh sereta megai tanggung pengawa ngintu jaku Iban ke dikena ba sekula, opis perintah enggau karang Iban ke bukai,” ku iya.
Ba forum nya ila, lima iku speaker deka bejaku ngenataika buah runding lalu sida nya nyengkaum pengari ari Majlis Adat Istiadat, Tun Jugah Foundation, Universiti Perguruan Sultan Idris, Perak, Opis Pelajar Nengeri enggau Dato Seri Edmund Langgu.
Sama bisi datai ngagai aum nya nyengkaum tuai pengarang berita Borneo Post - Churchill Edward, Tuai Editor Utusan Borneo - Claire Cinderella, Tuai Editor Utusan Borneo Bagi Iban - Empawi Jabat, Editor Bagi Iban - Edwin Jemat enggau Mathiass Kalap, Penghulu Hj Morshidi Johari enggau Zainal Abidin Ujang ke ngari MAPIM.
(Dibali ari Utusan Borneo 21 June 2011)
Tiada ulasan:
Catat Ulasan