Rimau parai ninggalka belang, mensia parai ninggalka nama nya jaku sulu ke suah dikena ngenangka orang ke parai semina tinggal nama. Enti nama iya pegari nama iya deka disimpan sereta dikenang dalam sejarah. Baka nya mega sekali tu pengarang nguji ngenangka pendiau pengidup siku indu Iban ke tau dikumbai indu Iban ke keterubah dalam mayuh bengkah bidang. Pengabis penudi pengarang bisi meda indu ke deka dikenang ditu nya maya pengerami Malam SIDS di sebuah hotel ti tebilang di Kuching kena bulan April tu tadi.
Iya ninggal kena 22 Julai 2011 lebuh umur iya manggai 884 taun. Lebuh ke ngelawa sekeda blog Iban dia ati bisi besai temegah meda mayuh mega blog Iban ke bisi sama bela ngenang pasal pendiau pengidup indu Iban tu. Dipelabaka aku enda mega kelalu laun enti aku mega ngambi peluang tu bekunsi cherita ngenang pasal iya tu mega. Iya ke deka dikenang aku ditu iya nya nadai orang bukai tang niang Dato Sri Tra Zehnder.
Dato Sri Tra Zehnder tu ada kena 25 October 1926 ngena nama Philomena Tra. Apai iya benama Inting Jemat lalu indai iya benama Sara Umang. Seduai tu asal Iban ari bagi menua Sri Aman. Iya tu dikira nyelai laban ngembuan penuduk ti keterubah dalam mayuh bengkah pengawa ti dikemeranka iya.
Iya mih indu Iban ti keterubah keterubah numbuhka serakup dikena ngempungka bala indu Dayak di Sarawak, iya nya Sarakup Indu Dayak Sarawak (SIDS). Serakup ti bisi nyentukka kemaya hari tu ditumbuhka iya dalam bulan Mei 1957. Ketegal bisi pengelandik nyadi tuai iya mega indu Iban ti keterubah dichirika nyadi kaban Kunsil Nengeri ari taun 1960 ngagai 1963. Iya mega indu Iban ti keterubah dipaduka nyadi Temenggong dalam taun 1988. Iya mangku pengawa nya ari taun 1988 ngagai 1996. Kelimpah ari nya, iya mega indu Iban ti keterubah dipadu mangku pengawa nyadi tuai dalam Majlis Adat Istiadat. Nambahka nya mega, lebuh ke agi nyadi kaban Kunsil Nengeri, iya mega indu Iban ti keterubah dalam taun 1964 minta pengerami gawai nyadi pengerami ke diintu raban bansa Dayak ninting taun. Ari peminta iya nya mih raban bansa Dayak lau terus ngintu pengerami Gawai Dayak ninting taun.
Peneleba dalam mangku pengawa nyadi tuai gerempung mai iya dipaduka nyadi Chairperson bagi orang indu, Sarawak National Party (SNAP) ari taun 1960 ngagai 1983. Kelimpah ari nya, iya mega numbuh lalu nyadi Chairperson bagi orang indu, Parti Bansa Dayak Sarawak (PBDS). Iya mangku pengawa nya ari taun 1983 nyentukka 1988.
Enti kitai selalu ngerut sabut puting enteran, lama laun teulihka dengah. Ketegal ngembuan semengat ke besai sereta perening ti jauh dikena ngangkatka semua pekara ti bekaul enggau orang indu, enda alit ati mih kitai iya diberi sereta nerima mayuh bansa pingat enggau pemeri baka Tokoh 1 Malaysia-Tokoh Kemerdekaan nyerumba ngintu pengerami Hari Merdeka kena 10 October 2009 enggau Datuk Patinggi Laila Taib Award dalam taun 2010.
Dalam pengidup besehari-sehari, iya orang ke chukup ngemaruhka diri tang taja pia iya ngembuan peragam ati ti besai sereta runding ti panjai ke enda kala berubah dikena ngemansangka pengawa rama ti bisi bekaul enggau pengidup orang indu kelebih agi sida ke bansa dayak sereta ke diau ba menua pesisir. Nya alai nembiak rebak baru kelebih agi sida ke indu patut bechuan sereta beteladanka niang Dato Sri Tra Zehnder lalu ngambi iya nyadi ikon malin inspirasyen pengidup. Ingat mih ke sempama jaku tuai; benih ke manah, labuh ke tasik nyadi pulau.
Tiada ulasan:
Catat Ulasan