LUH Production & LUH Music Publishing Sdn Bhd udah mujur ngatur pekit nengkebang leka lagu, enggau tiun lagu Iban. Leka lagu ‘Kenang Pengerindu’ mai tuah ngagai Upa Bantan sepengudah iya dipadu pemadu nyulut bagi kategori nya lalu mujur mai pulai perais mata duit RM100 enggau setipikit.
Ba kategori nengkebang tiun enggau leka lagu, penuduk lumur satu diempu Alexander Rumpang nengah lagu iya Semadi Nadai. Enggau tu iya mai perais mata duit RM500 sereta disempulang enggau setipikit. Penuduk lumur dua pulai ngagai lagu ‘Dua Ati Siti Pengerindu’ ari Baby Delfora Dunstan lalu iya mujur mai perais mata duit RM400 enggau setipikit. Patrick Moses Baun, enggau lagu iya ‘Kaban Nyadi Pangan’ dipilih penuduk lumur tiga lalu mai pulai perais mata duit RM300 sereta disempulang enggau setipikit.
Semua perais disua Pengeluar Eksekutif LUH Production & LUH Music Publishing Sdn Bhd. Iya nya Ervina Bermas ba opis tu empu.
Lebuh ti mantaika penemu senentang pekit nya, Ervina madahka, agi mayuh bansa Iban landik ba pengawa nengkebang leka tauka tiun lagu tang sida enda nemu kini tungga alai ngerembaika pengelandik sida nya.
“Ari pemayuh bala ke enggau pekit tu, dia kitai meratika mayuh amat bala pemekit landik ba dunya muzik tang sida nadai dipadahka jalai endur mantaika pengelandik nya,” pia ku iya madah ngagai pengarang berita sepengudah nyuaka perais ngagai bala ke menang. Nya alai ku iya, mensia mayuh enda tau jugau enti bisi pengelandik baka nya tau datai ngelawa sida.
Kena kitai besaup ngangkatka muzik Iban, sida ngarapka mensia mayuh tau nganjung resume batang tubuh, e-mail tauka betelefon terus ngagai sida iya. Iya madah pekit ke diatur nya mujur narit 30 iku bala pemekit nyengkaum bansa bukai baka Melayu ke datai ari menua Semenanjung Malaysia. _Borneo Post
Tiada ulasan:
Catat Ulasan