SERBANA senentang bup litericha ti dikeluarka Dewan Bahasa dan Pustaka (DBP) nadai regas di pasar ukai pekara baru. Orang mayuh madahka DBP ti ngeluarka bup tu semina nyadi syarat aja tang pengujung iya semina disimpan ba stor DBP aja.
DBP endang mayuh ngeluarka bup enda ngira nya novel, sidi senentang litericha tauka antologi jerpen. Tang taja pia bup tu mar amat ditemu bisi ba kedai bup ke pegari di Kuala Lumpur.
Mayuh orang nyalahka DBP laban lumbu amat dalam pengawa ngemasarka bup litericha. Tang utai ke amat nyadi nya kenyau ari taun 2002, kereja nyelak, ngemasar sereta ngelakuka bup-bup DBP ukai agi dikereja gerempung tu.
Pengawa nya udah diserahka ngagai sebuah syarikat konsesyen iya nya Dawama Sdn. Bhd. Mayuh orang enda nemu nya Dawama ti patut iya bebendarka agi ngatur pengawa ngelakuka bup ti dikeluarka DBP.
Baka nya mega ngagai sepuluh majalah ti mayuh bengkah bidang ke dikeluarka DBP. Kompeni tu bulih kontrak kenyau ari 2002 ngagai 2014 dalam pengawa nyelak sereta nyadungka bup enggau majalah DBP.
Kontrak ke diberi ngagai Kompeni Dawama ukai semina ungkup bup litericha aja, tang nyengkaum nyelak sereta nyadungka bup teks sekula.
Enti dibandingka entara nyadung bup teks sekula enggau bup litericha, udah tentu mih bup teks balat agi mai penguntung lalu enda ibuh dilakuka.
Bup teks udah bisi pemeli iya. Ambika banding taun nyin ila aja Dawama dipinta nyelak sereta nyadung enam juta bup teks. Tu utai ke balat mai penguntung enti dibanding enggau bup litericha ti semina ngembuan penyampau pemeli ti baruh.
Bisi orang nanya, kemaya kali kepenudi kitai meda sida ngelakuka bup DBP ba surat berita tauka majalah? Kemaya kali kepenudi kitai ninga senentang pengawa ngelakuka bup litericha kelimpah ari Pesta Bup Antarabangsa Kuala Lumpur?
Dawama diperatika semina nyadung tauka ngemasarka bup-bup ke laku aja sereta iya ti enda begunaka mayuh pengawa ngelakuka nya. Nya alai Dawama balat agi meri perati ngagai bup teks sekula laban kontrak nyelak sereta nyadungka bup nya diberi Opis Menteri Pelajar ngagai DBP.
Kenyau ari taun 2002 nyentukka diatu, DBP udah mayar RM650 juta ngagai Dawama. Enggau untung ari nyelak sereta nyadungka bup teks, Dawama ulih meri pemeri ngagai pengawa besai ngelakuka bup litericha enggau majalah.
Taja pan Dawama nadai bulih untung ti besai ari pengawa bejualka bup nya, tang tau dikira chukup mih laban Dawama teulihka untung ari bup teks. Tang iya ke bendar utai nya nadai nyadi laban bup litericha DBP semina ngemenuhka penyampau judul ti patut dikeluarkan ukai iya ke patut dijual enggau bebendar.
Sepengudah Dawama madahka diri balat "rugi" dia patut mih konsesyen tu diberi ngagai kompeni penyelak ke bukai ti tegap sereta ngembuan pengerindu ngagai pengawa litericha baka sempama jaku tuai beralih baka upih ganti mayang.
Tiada ulasan:
Catat Ulasan