Ijuk

Kenang pengarang sekali deka ngenangka pekara senentang ijuk. Lama amat udah enda nulis senentang utai tumbuh. Kebuah ke nulis tu laban ke ngenang bisi ampit dibai tanah menantu ke berasal ari Lubok Antu ngirup ai tuak ijuk.

Nyadi ijuk tu sebengkah ari raban kayu palma baka nyiur, sawit, nibung enggau sagu. Peninggi pun ijuk ulih datai ke 50 tauka 60 kaki. Iya ngembuan batang ke besai, bebulu chelum sereta mayuh daun. Daun ijuk tu gadung tuai sereta panjai 25 kaki.

Gaya ijuk tu bebuah bisi nyelai mimit ari bansa palma ke bukai baka nyiur tauka sagu. Bungai ijuk nyumbukba atas sereta mansang ke baruh nyentuk ke tanah. Bungai ti kepenudi ulih deka malai tanah.

Bungai ti keterubah nyulut lebuh pun ijuk nyau manggai 10 ngagai 12 taun; taja pia bisi mega maya iya bebungai lebuh lima ngagai enam taun. Nitihka timpuh pengetan enti nadai diambi ai, ijuk tu tan ngeluarka bungai iya nya dalam empat ngagai enam taun. Enti nitih iya ti bendar pun ijuk semina tan idup dalam timpuh dua taun semadi chara ngulihka ai nya ngena pengelandik ti betul iya ulih idup sepengelama sepuluh taun.

Ai ijuk udah ulih diambi lebuh pun iya udah manggai lima taun sereta udah bisi tandan. Orang ke ngambi ai ijuk dekat ngetas ujung dan ke mit ngambika ai ijuk nya neritik pansut. Ai ijuk ti neritik pansut ari ujung dan nya deka ditapis lalu disimpan dalam gilin tauka bu ku jaku orang ke ba menua ke mayuh pun ijuk.

Udah nya ujung dan nya terus diketas mimit-mimit tiap-tiap jam laban enti enda iya tau rangkai sereta enda ngeluarka ai ijuk. Nengah chara tu orang ke ngulihka ai ijuk nyau tau bulih asil kira-kira tiga ngagai empat gelen ai ijuk semalam sepemanjai tiga bulan proses tu dipejalaika tauka datai ngagai dan iya nyau abis diketas.

Taja pia, proses ngulihka ai ijuk agi ulih dipejalaika enti sema dan pun nya agi nyumbuk lalu bisi ngeluarka buah. Nitihka penemu sida ke empu pun ijuk tu madahka pun ijuk ulih ngasilka dan ti ulih ngeluarka ijuk lapan kali nengah lapan musin.

Munyi ke udah disebut tadi, dan ijuk tumbuh sampai malai tanah. Nya alai pun ijuk ke chukup tuai ulih ngeluarka sumbuk dan datai ke lapan kali sereta dan iya mansang ke baruh. Kali kelapan, dan ijuk nyumbuk muak ke baruh pun. Tu mih maya kepenudi ngulihka ai ijuk.

Batang ijuk ke agi puda tauka diambika upa nyadika lauk lalu daun ijuk ulih digaga nyadi atap sereta sabut iya tau diambika tali tauka penapis. Ba sekeda menua, batang ijuk ulih digagaka ramu, jematan sereta tikai.

Ijuk mayuh tumbuh ba Pulau Borneo kelebih agi ba menua Lubok Antu enggau sekeda lempa ba ai Kapuas di Kalimantan, Indonesia. Nya alai bala Iban ba menua tu endang tebilang mutung ijuk dikena ngulihka ai ke digagaka tuak tauka gula ijuk. Bisi mega raban saintis madahka ai ijuk ulih ngeraika penyakit kemi manis. Nya alai ku sekeda sida ba Lubok Antu madahka orang ke bisi penyakit kemi manis nadai ditemu bisi serebana madahka bisi empas ari ngirup ai gula ijuk tu. Penyakit kemi manis nadai udah ditemu ngerekai ba menua pesisir Kalimantan.

Bisi orang ke bukai ke endang rindu ngirup ai tuak ijuk tu nyemaka ai nya baka ai todi tauka tuak ai Mackintosh. Lubok Antu nya menua ti tebilang ngasilka gula ijuk. Mayuh kedai ditu nyual gula ijuk RM8.50 sekilo.