Ngenangka berita pasal politik ukai pekara ti suah dikenangka pengarang tang sekali dua bisi mega asai ati deka enggau orang bukai nguji bekenangka pasal pengawa bepolitik. Taja pan pengawa nya amat dikerinduka tang kekadang laban lembau deka enggau orang ngeruga runding nya alai kenang pasal pengawa politik jarang dikenang ditu.
Bedau lama tu tadi perintah nengeri Sarawak udah mujur ngubah tusun kabinet nitihka pemansang politik kemaya hari tu. Dalam tusun ubah kabinet ti baru tu tuai ari tiga parti dipadu nyadi menteri kanan.
Konsep bekunsi bekuasa endang lama udah dikemeranka parti perintah tang ke sekali tu konsep nya dipejalaika ngena chara maduka tiga iku menteri ke nyadi tuai ari komponen parti nyadi Menteri Kanan.
Konsep kunsi kuasa nengah chara maduka menteri nyadi menteri kanan nya ngayanka penyerakup sereta kerejasama ti rapit entara komponen parti. Konsep nya ulih nyaga ati semua pupu bansa ba nengeri tu. Empas ari ubah tusun kabinet ke baru nya semina siku aja dipaduka nyadi Sapit Kepala Menteri enti dibandingka dulu ari tu iya nya dua iku menteri ti ngarika bansa Dayak enggau China.
Enggau konsep nya mega mandangka tiap bansa bisi pengari dalam ngaga pemutus penemu ba renggat ke tinggi. Enggau nya mega pemutus penemu ukai semina bepanggai ba sebengkah parti tauka bansa aja.
Nitihka konsep nya pengawa Menteri Kanan sebaka enggau gerempung konsultan sereta ngemujurka pengawa menteri muda lebuh merambu projek pemansang sereta mega lebuh meri pemutus penemu ke bukai.
Hari Tiga tu tadi, Kepala Menteri udah maduka tiga iku menteri kanan, iya nya Tan Sri William Mawan (Presiden Parti Progresif Demokratik Sarawak), Presiden Parti Rakyat Sarawak (PRS), Tan Sri James Jemut Masing enggau Sapit Sekretari Besai Parti Sa’ati Rayat Sarawak (SUPP) Dato Sri Wong Soon Koh.
Nya alai enggau konsep bekunsi nengah chara maduka menteri kanan nya ila pengawa ngemansangka menua Sarawak deka mujur agi dipejalaika setipak enggau ubah pemansang politik.
Tiada ulasan:
Catat Ulasan