Untung Nemu Beliung Enda Ngambuh

Bajet 2012 baru udah dikenataika Menteri Besai ba parlimen. Baka selama mensia mayuh meri komen diri empu pasal bajet nya. Aku pan sama bela enggau orang ngeruh ai meri kenang pasal bajet nya mega. 

Bajet 2012 balat bendar ngeruga runding mensia mayuh laban iya nyengkaum mayuh sektor ba menua tu. Enti diperatika nyau deka semua  tikas enggau lapis komuniti bisi utai dipegawaika; insentif bagi kompeni enggau bala driba teksi, duit bantu ke orang ke begaji enggau raban pengguna, duit pan ke sekula, hospital enggau bidang kereban pengangkut.

Kelimpah ari nya mega bisi program pemansang diperambu ke bala orang bumai enggau sida ba menua pesisir, enda mayar chukai ngagai sida ke meri pemeri ngagai tempat alai sembiang, duit ke bala nembiak sekula enggau raban dagang mit sereta bantu pengelantang pendiau ngagai raban ke seranta. Nyau deka semua raban rayat nerima penguntung baka ke nemu beliung enda ngambuh, nemu peredah enda ningkuh. Semina nasit bala bujang berani Sarawak baka raban bala Iban Trackers enggau soldadu Sarawak Rangers enda temu enti sida tu sama bela disengkaum diberi duit pampas baka sida bukai dalam bajet 2012.

Nambahka nya mega sabsidi perintah besai mengkang baka selama lalu nadai chukai baru diperambuka perintah.

Belalauka pemanah bajet nya mayuh orang ngumbai nya bajet bepilih besai laban mayuh orang naga dalam timpuh ke semak tu nyangka bisi pengawa bepilih besai parlimen. Bajet 2012 mega dikumbai bajet ke berorientasyenka pengawa bepilih laban kelalu ngemeratka semua lapis peranak menua Malaysia. Taja pia munyi ke salah jaku seleka nadai bajet digaga enda meri penguntung ngagai rayat. Enti enda pia, perintah baka ke enda meri respons ngagai peminta rayat kelebih agi lebuh rega barang kemaya hari tu nyau majak niki.

Enti nitihka konteks program transformasyen Menteri Besai ke dipejalaika diatu tuju bajet 2012 nya udah terang bendar diperambu dikena nyelinting program nya. Taja pan bajet 2012 ngemeratka aspek kuantitatif transformasyen nya, aspek kualitatif bukai baka muai akta ISA enggau ke bukai mega dipejalaika mega. Semua tu patut bendar diterima rayat Malaysia. Taja pia bisi mega enda tentu setuju enggau bajet tu laban ku sida bajet tu kelalu manah sereta enda tentu ulih dikeamatka enti dibanding enggau penuduk ekonomi menua kemaya hari tu.

Taja pan baka nya Najib udah besemaya  ngagai semua rayat Malaysia madahka ungkus dikena bejalaika bajet nya tadi endang bisi sereta chukup lalu pia mega ubah sereta pemujur ari program transformasyen iya nya ila tau nyadika legasi iya jemah ila.

Besenutuk enggau pekara nya mega, bajet 2012 ba mata bala sekeda orang ke kelalu manah. Ba penemu sida tu bajet ti baka tu semina nyadika sumber alai bejalaika pra pengawa bepilih besai.

Nya alai bajet 2012 sebaka mega enggau bajet bukai patut bendar ditisih sereta ditisih nengah chara ti kritikal. Pengawa ke nisih bajet 2012 patut diperati enggau enda belampung ati sereta enda patut dichampur enggau runding politik. Semua komen ti kritikal patut nadai ngundan agenda ti belalai tauka ngemeratka sesebengkah raban.