Pekit main bol Olimpik entara Malaysia ngelaban Bahrain diaturka ba Stadium Nasional, Bukit Jalil kena 27HB November. Nya main kedua ba Malaysia sepengudah ke ngemuilaka diri udah di menang ba pekit Sukan SEA di Jakarta. Pengarang mega gagit baka orang bukai nguji meri buah kenang senentang pekit tu.
Taja pan team Malaysia udah dulu ngemasukka team Bahrain iya dua gol tang team nya lalu enda ulih ngetanka gol nya nyentukka abis jam bemain. Gol Malaysia di pasukka Nazmi Faiz enggau Mahali Jasuli.
Tang munyi ku jaku orang tuai, baka belayan padi lebat bebuah, tiap-tiap utai ke nyadi tentu bisi kebuah. Nyadi tu kenu ku analisis senentang kebuah Malaysia alah jamah Bahrain. Main ke sekali patut mega dianalisis laban suah amai Malaysia baka ke udah dipeda kitai maya ngelaban Bahrain tu. Nyadi simpul penemu senetang kebuah ke alah nya baka tu:
Dalam timpuh bemain 90 minit lebih nya semina Nazmi aja ken nemu nendang bol enggau lurus. Sida bukai nya baka ke baru belajar bemain bol, suah ke nendang ke bukai tauka ke luar padang.
Pemain forward tauka penyerang iya nya Thamil Arasu baka ke makai angin aja. Iya tak dipeda nadai tentu bulih bol amat mih belanda ke atas enggau ke baruh lalu nama iya suah amat disebut. Dalam timpuh dalam 90 minit! Pura-pura aja iya tu bemain. Sema jaku enti nadai iya dalam team nya pan enda ngawa laban baka team Bahrin ke semina 10 iku aja pan ulih mih bemain baka team Malaysia.
Pemain penyerang team Malaysia baka ke enda nemu nyipak enggau betul. Ambika banding, Fakri lebuh ba mua gol penalti pan enda tepasukka bol. Pia mega enggau, Wan Zack mega ngembuan penanggul enda nemu nyipak enggau betul. Kati tau bemain ba forward enti baka nya?
Kelimpah ari nya didinga berita ti ngerimbas pending sida tu semina belatih bemain futsal. Iya ti patut sida tu diasuh belatih nyipak 100 kali sehari sambil belanda.
Fullback ke ngetan kubu team Malaysia suah amat dipeda tekangkang lebuh ke deka ngetanka bol. Uji peratika team ba EPL, sida tu sanggup belanda undur ke belakang, ke mua enggau ke tisi bereta enggau pemain forward ari team ke dilaban. Tang iya ke dipeda tu sida tu balat agi baka kon aja, bediri tegir-tegir.
Enti coach salah tips tauka teknik ke diberi tentu tu mih ke nyadi. Teknik tu semua ketegal coach. Coach enda nemu teknik kebuah Malaysia enda ulih maju. Enti coach ke lama suba balat agi, bemain ngelaban India pan uli alah. Nya pan diberi FAM pangkat Datuk.
Kepenudi bendar nya bekaul enggau penyaga gol. Penyaga gol, Fahmi kelalu gagit mengkechit laban ke deka nangkap bol ke jauh ari gol. Kelimpah ari nya penyaga gol diberi pengawa nyadi kapten. Baka ni iya deka merintah sida bukai ba sukut penyerang di mua din? Enti dianalisiska ninting kali Fahmi nyadi kapten Malaysia alah!
Nya sekeda ari analisis senetang kebuah Malaysia alah jamah Bahrain. Dalam timpuh lima minit sida lalu ulih ngerebutka peluang ari team Malaysia, nama kebuah? Peratika analisis di atas.
Tiada ulasan:
Catat Ulasan