Kitai suah bendar ninga orang mantah tauka ngritik filem digaga menua kitai empu. Mayuh amat komen nya ukai komen ti manah didinga. Ambika banding bisi kitai ninga komen tentang kebuah mayuh filem komedi antu ti enda tentu manah agi dikeluarka kompeni ngaga filem. Sekeda komen nya madahka komedi ti dipandang nya mapap ukai ngasuh ketawa tang lebih mandangka pemeli raban bala pelakun.
Nyadi ba penemu aku, sida ke ngaga filem tu enda patut dikritik tauka dibantah lalu pia mega ngagai sida penulis skrip cherita wayang nya. Kitai empu ke mantah filem nya ti patut bendar dituduh ketegal mantah filem ti digaga sida nya.
Nama kebuah filem tu bisi dipandang ba sinepleks? Kitai tentu enda tentu pechaya, filem tu majak digaga, dikeluarka sereta dipandangka ngagai mensia mayuh laban bisi orang meda. Fakta tu enda ulih disakal laban nadai pengeluar filem deka ngaga filem ti enda dipeda mensia mayuh, semadi mih filem nya prujek sekula tauka orang nya kelalu mayuh duit lalu ngaga filem laban deka belawa tauka syok kediri empu ku jaku orang kemaya hari tu.
Mayuh ari kitai duduk ba menara gading ngirup kupi tang komplin senentang pekara tu tauka pekara nya tang kitai empu enda enggau meda utai ke nyadi ba luar ba dunya ke amat laban kitai empu jarang keluar ari sarang kitai empu. Besehari-sehari kitai duduk dalam kerita ke bisi airkon, ba rumah ke beairkon, ngujungka runding kitai tesekat enggau utai ke nyadi ba luar pengidup kita.
Nya alai, lebuh orang ngaga filem ke nyelai baka filem antu tauka filem ngerau tau ngasuh kitai enda tentu setuju, enda lantang ati sereta mayuh kritikan. Jarang amat kitai muji pemanah, suah agi ke mejah pengawa ti digaga orang.
Narak nembiak mereti, betati sereta meri respons ke positif sambil nyerita pemanah sesebuah filem patut bendar dipejalaika ngambika sida nemu pemesai reti seni. Betatika karya kreatif patut diajar ngagai nembiak ngambika sida nemu realiti pengidup ke nyadi berengkah ari umur sida agi biak.
Tiada ulasan:
Catat Ulasan