Pengait

Bedau lama bisi berita selebebu ngapa balat bepuput ngelegua baka angin ke mangka ba bagi menua Limbang senentang berita orang ke ngayau begigaka pala. Aku agi ingat kala ninga berita ti sama lebuh aku agi gawa ba Lawas suba dalam taun 90an.

Berita baka tu bala bendar ngenakutka bala mensia mayuh kelebih agi bala nembiak enggau apai indai laban beserimbai enggau maya peremisi sekula.

Taja pan berita tu udah kala didinga tang nyentukka sehari tu nadai bukti ti nyukung pengamat berita tu. Taja pia berita ti baka tu balat bendar dikerandauka ukai semina ba kedai kupi tang mega mungkur semua sida ke diau mendam di Limbang.

Orang ke ngayau ngasu pala nya di menua Limbang dikumbai pengait. Orang ke suah diambi pala nya sida ke agi biak umur iya nya bala nembiak mit. Kebuah pala tu digiga laban deka dikena ngenegapka struktur jematan ti benung digaga. Pala nya tadi deka disimpan ba lubang tiang jematan.

Proses tu dipejalaika siku dukun tauka pawang ngambika jematan tu tegap sereta tan lama. Pala nya dikerapka dikena pampas ngagai antu tauka penunggu ke diau ba endur jematan ke digaga nya.

Nitihka surat berita, Tuai Polis Pelilih Menua Limbang, Pemangku Superintenden Bukhori Saffai (Utusan Borneo) ngelalau mensia mayuh ngasuh sida enda arapka berita ti selebebu ngapa nya. Iya mega bisi nerima kangau telefon ari mensia mayuh senentang berita nya. Tang iya nyakal penemu ti madahka bisi pengait begigaka pala nembiak mit.

Pengawa begagaka sesebuah jematan ukai bepanggai ba pengelandik dukun tauka pawang tang nengah pemandai injinir ke udah dilatih dalam pengawa nya. Berita baka tu endang senaja dikemesaika laban diatu nembiak benung peremisi sekula lalu iya bisi kaul enggau pengawa ti enda ngasuh bala nembiak dayau-dayau ba luar rumah.

Nitihka tuai polis nya naka kediatu nadai udah bisi ripot senentang isu tu tang iya terus ngelalau apai indai nembiak ngambika sida balat bejimat enggau pengelikun nembiak.

Berita selebebu ngapa tu berengkah didinga lebuh orang berengkah ngaga Jematan Pandaruan. Dalam taun 90an, berita baka tu bisi mega ngerekai ba menua Limbang lebuh pengawa begagaka jematan Batu Danau benung dipejalaika.