Kenang pengarang sekali nguji ngenang sebengkah artikel ti bisi dikeluarka surat kabar Berita Harian ba laman Sastera sereta mega Utusan Borneo Online ti ngeluarka berita ti sama. Iya ke bendar artikel ba Berita Harian nya ngambi berita nya ari Utusan Borneo. Artikel nya ngenataika pengirau ati pewaris jaku Iban senentang pemansang jaku nya jemah ila enti nadai rapat konkrit dikena nyaga sereta ngerembaika jaku nya dudi hari.
Pengirau ati nya dikenataika Pengajar Jimbun anak Tawai. Iya ngenataika pekara nya maya Forum Jaku Iban 2011. Nengah forum nya iya minta rapat ti efektif agi dikena ngemayuhka penyampau kereban bacha dalam jaku Iban ngagai nembiak sekula ti bisi ngambi mata pelajar Bahasa Iban.
Taja pia, penulis ke mayuh nulis bup dalam jaku Iban sereta mega nulis sama enggau orang bukai senentang bup teks enggau kereban pelajar nemu peminta tu enda ulih nyadi nyata enti nadai duit agih ti chukup dikena nampung kos nyelak bup.
Iya madahka sida ke betanggung pengawa patut ngaturka program dikena mupu duit ngambika mayuh agi bup dalam jaku Iban ulih dichelak. Iya mega sempat meri chunto kereban bacha tauka manuskrip ke bisi standard sereta engkeman dikena ba sekula mayuh amai ba Majlis Adat Istiadat bedau dichelak. Taja pia iya mega besetuju bup teks ti dikeluar belalauka Kerembai Turai Jaku Iban endang chukup diatu.
Penyampau bup cherita dalam jaku Iban agi kurang enti kitai deka meransang nembiak ngembuan pengerindu macha di sekula. Iya perchaya amai bup cherita ulih mantu nembiak sekula ngenegapka pengelebat jaku sida kelebih agi baka leka jaku, sepil sereta pemereti sida dalam jaku nya.
Pengajar Jimbun mega bisi meri komen senentang pengawa ti dipejalaika Komiti Forum nya. Ba penemu iya, forum nya palan ti manah alai bala pengajar enggau pejuang bahasa bejuraika isu, aktiviti kereja, berundingka langgur sereta peminta ngagai perintah dikena ngangkatka jaku Iban.
‘Mensia mayuh agi bejaku pasal forum tu laban iya diatur enggau manah sereta nyadika palan alai besilih penemu tang forum tu enda idealistik enti 65,000 nembiak sekula ke ngambi mata pelajar jaku Iban nya agi nadai ngembuan kereban bacha kelebih agi bup cherita,’ ku Pengajar Jimbun.
Pengarang berundingka kereban bacha dalam jaku Iban endang bisi kemaya hari tu laban kala meratika raban bala pengajar enti betemu lalu ngaga salin ngagai bup ensera ti bisi dibai bala pangan diri. Kelimpah ari nya mega diatu udah bisi laman Berita Iban ba Utusan Borneo enggau Utusan Sarawak, semina atur sepil enggau jalai jaku agi ulih dikemanahka agi. Pia mega bisi Majalah Pegari ti dikeluarka Pegari Iban Production (PIP) enggau majalah Pembrita ti dikeluarka Opis Pemadah. Bedau lama suba bisi ga meda sekeda majalah ba pasar baka majala Tebilang, Kesulai, Kenyalang, Karang Seminggu. Tang semua majalah tu udah nadai agi ayan; enda nemu nya ketegal nadai chukup belanja dikena majak nyelak tauka udah nadai agi penemu dikena ngerembai majalah sida.
Ba penemu pengarang, ngeluarka majalah begunaka puku ti besai laban mayuh pekara ti deka dikira baka permit enggau lisin ari KDN, belanja nyelak enti nadai mesin kediri empu, puku dikena mayar penulis, ungkus dikena ngelakuka majalah, belanja nyadung majalah, komisen ngagai kedai sereta mayuh agi pekara ti mit-mit. Enti sepil enda sama enggau sepil dikena ba sekula bala pengajar lubah deka meli kereban nya laban nya tau nanggulka sepil bala nembiak di sekula kelimpah ari ti diketawaka bala nembiak.
Nya alai, dikena nyimpulka penemu ditu, pengarang ngasaika kereban bacha ti dikena ba sekula kemaya hari tu endang udah bisi semina enda chukup. Ngagai bala Iban ke sayau ke jaku Iban ke selalu rauh-rauh deka ngangkatka jaku Iban patut berunding enggau dalam rapat dikena nambahka kereban bacha ba sekula; kereban ti bisi tikas pemanah ari sukut sepil ti engkeman sereta jalai jaku ti teratur.
Bala aktivis jaku Iban patut nyediaka pekara ti baka tu dulu sebedau berunding deka mantaika tuduh penemu bukai. Kemaya hari tu mayuh bala Iban sama bela ngaku ngambu dengah sama bela bisi enggau ngangkatka jaku Iban taja pan iya ti bendar enda mayuh ke sanggup bekereja siang enggau malam merambuka turai pelajar, bup teks, kereban audio, kereban tisih enggau mayuh pekara bukai ti dikena ngerembai sereta ngangkat jaku Iban tu ngambika ulih diajar di sekula primari, sekondari, palan pematih pengajar enggau universiti.
Bala pengari Iban baka tuai-tuai Iban mesti berani nanyaka pemansang jaku Iban tu ba kaunsil negeri tauka parlimen, sereta berani meri tuduh penemu dikena ngetan, ngemansang sereta ngerembaika jaku Iban tu seraris enggau konsep Satu Malaysia. Pengari Iban mega patut besedia nulung ukai semina ari buah runding sereta jaku tang mega ari sukut duit ringgit laban jaku enggau buah runding aja kemaya hari tu nadai mai pemansang jaku tu kini-kini. Naka kediatu jaku Iban kira beterima kasih laban agi bisi bala tuai pengari Iban ke agi ulih nulung nyaup ngangkatka jaku tu.
Tiada ulasan:
Catat Ulasan