Siti ari penyakit rama raban bansa ti suah nyadi dalam pengidup kemaya hari tu nya pengawa ngirup ai bisa. Pengawa ngirup ai bisa ke bendar ukai utai ti baru nyadi ba rayat di menua tu tang ba kelia menya ulah ti baka tu nya enda bangat ngemalat ke diatu.
Dulu kelia orang ngirup belebuh baka maya bisi pengerami. Kemaya hari tu perangai mensia udah jauh bendar berubah. Beserumpu ngirup ai bisa nyau nyadi pekara ti suah dikereja orang lalu ukai semina dikereja maya bisi pengerami.
Orang ke pengirup enda meniti rugi muai belanja dikena meli ai bisa. Kebuah sida ngirup nya laban rindu ati. Mimit-mimit betunga enggau pangan diri lalu ingatka butul arak. Suah sida enda bedulika ai bisa nya mar, murah tauka tau ngerusakka pengerai sida. Kenang pasal pemansang pelajar anak di sekula tauka pemaju kebun lada nyau lindung, nyau ayung. Perangai ti baka tu balat bendar ngasuh ati tuai-tuai raban bansa di menua tu irau.
Nitihka anggar, enti pemalat orang ngirup ai bisa agi meruan enda belinsur kurang ari diatu, maya datai ba taun 2020 ila abis kurang RM2 bilion deka abis dibelanjaka dikena bebelika ai bisa. Nitihka perati, penrangai nya balat agi nydi ba orang ke diau di menua pesisir. Pansik ti udah kala dipejalaika Opis Pemansang Raban Bansa bekaul enggau pengawa nya bisi tetemuka abis kurang RM96 juta duit orang di menua tu abis dibasau dikena bebelika ai bisa tiap-tiap taun.
Ba raban bansa Dayak, mayuh agi ari belanja sida dibubuhka sida maya pengerami gawai laban tu peluang sida ke beduit bisi pulai ke menua, peremisi ari kereja lalu diau di rumah.
Pansik ti udah dipejalaika ba 5000 buah rumah panjai menua Sarawak bisi mandangka abis kurang 2340 buah rumah bisi nyarangka orang mayuh ke gian ngirup ai bisa. Pansik nya mega bisi ngayanka dalam semua rumah panjai nya abis kurang tika iku orang dia ti gian ngirup ai bisa.
Jaku lalau enggau jaku ajar enda chukup dikena nagang orang mayuh ari terus belumai enggau perangai ke jai nya. Nya alai atur ti lebih terit agi patut bendar digaga dikena ngurangka orang majak ngemeranka penrangai nya. Sekeda ari chara ti manah dikena nagang orang mayuh ngirup ai bisa nya baka ngena chara kimpin. Kimpin nya patut diatur besai ngambika asil iya tampak. Ngena chara tu dia mensia mayuh deka jampat agi meretika kebuah sida enda tau enda terus ngereja pengawa ke jai nya. Chara kedua nya ngena undang-undang. Sebarang orang ke bisi ditemu ngaga enggau nyual ai bisa enggau nadai belisin patut diukum enggau berat ngambika sida jera.
Pengawa nagang orang mayuh ari terus majak ngirup ai bisa semina deka mujur dipejalaika enti semua lapis raban bansa di menua tu deka besaup enggau orang ke kiruh deka nguji ngiga jalai ngurangka penyakit rama raban bansa nya.
Tiada ulasan:
Catat Ulasan