Restoran mamak bisi aja dipeda tumbuh ba dini-dini endur di Semenanjung. Enti di Sarawak penulis kala ngirup ba kedai mamak di Sarikei, Sri Aman enggau di Kuching. Nya alai ke serak tu penulis nguji ngenangka pasal pengawa dagang ti dikemeranka raban mamak tu. Mamak tu gela ke diberi ngagai raban bansa India ti bepengarap Islam. Sida tu datai ari selatan India ngampar ke diri ngagai Acheh dalam kurun ke – 10 sebedau pindah sereta ngentapka pendiau diri ke semenanjung Tanah Melayu. Menua ti mayuh diuan orang mamak tu iya nya Pulau Pinang. Orang India Muslim datai ke Pulau Pinang dalam kurun ke – 18, iya nya dulu agi ari orang British. Penatai sida tu mih ke ngepunka dagang restoran mamak.
Dagang restoran mamak ti nadai ninggalka elemen tradisional taja pan nitih singkang pemansang sereta peminta pemeli nya nyadika faktor pengawa dagang mamak tu nyulut bendar dalam industri pemakai di Malaysia.
Nitihka pansik ti ditulis dalam bup Rahsia Bisnes Mamak madahka konsep ti dikena ba semua tauke restoran mamak besereta enggau strategi ngelakuka bisnis ti tegap nyadika kunchi pemujur restoran mamak tu tan nyentukka kemaya hari tu.
Iya ti balat ngalitka ati nya formula ti dikena sida balat amat ulih nguing runding bala pelanggan dataika sida enda mudah ninggalka kedai mamak. Restoran mamak bepungkal ari bisnes tradisional. Tauke restoran mamak ke ngembuan sesebengkah strategi mujur neruska legasi dagang sida nyentukka ngangkatka nama ‘mamak’ ti ngujungka iya nyadi siti chap tauka jenama ti tebilang di menua tu.
Pansik The Star Online mandangka budaya bisnis mamak tu diterima nyadika 50 pekara ti berat sereta diperatika sebagi ari budaya Malaysia. Lebuh besebutka raban pemakai Malaysia, asi lemak, asi kandar, ruti canai, teh tarik enggau sate kajang nya raban pemakai ti dalam penuduk kelima pengabis tinggi dalam tikas raban pemakai orang Malaysia. Empat menu ti keterubah nya endang meruan bisi dijual ba kedai mamak. Tu mandangka mensia mayuh enda ngumbai asi kandar tauka restoran mamak nya semina pemakai aja tang mega ngumbai iya sebagi ari gaya idup.
Mayuh tauke restoran mamak endang sensitifka pemansang ti nyadi kemaya hari tu lalu sida enggau naka ulih ngemuaska ati pelanggan sida. Dulu suba ruti canai semina diempa enggau kuah kari tauka dal, tang kemaya hari tu bala kitai mayuh agi ke deka makai iya enggau sambal. Nya alai kemaya hari tu, sambal nya mega sebagi ari ruti canai.
Kelimpah ari nya mega, mayuh tauke restoran mamak endang asal waris dagang tu ari aki ini sida. Nya alai sida enda ngumbai diri wariska pengaya ari aki ini sida tentang ngumbai bisnis tu siti ari ibadat. Nya mih kebuah dikena majakka dagang sida bala mamak tu balat agi ngemeratka peminta pelanggan ari ke nyual nama utai ke dikemisika sida. Ambika chunto, enti sema bisi menu ke nadai sida enda kala deka madah nadai tang sida sanggup meri alternatif bukai dataika pelanggan nya sanggup nukar peminta iya. Konsep tu sama enggau penerang ti dipansutka tukang dagang ke tebilang iya nya Donald Trump. Donald Trump kala madah dalam dunya tu nadai guna ngembuan produk ti pengabis manah di dunya tauka seruran bepikir semua orang begunaka produk nya. Nama-nama aja utai ti dipikirka orang dagang, pama iya udah enda mujur iya tetap dikumbai orang enda mujur.
Nambahka nya mega bala pedagang mamak tu orang ke berani ngeluarka puku sereta sanggup nerima risiko ngambika ulih mujur baka ke dipeda kitai kemaya hari tu. Enti pelanggan dekaka internet, sida mega sanggup masang internet ba kedai sida, pia mega enggau skrin besai dikena meda pekit bemain bol. Sida enda takut ngeluarka puku dikena ngemuaska ati pelanggan sida. Ketegal pemujur formula tu dia tauke restoran bukai mega sama bela niru chara bala pedagang mamak lalu masang skrin besai sereta bisi ruang tebuka ti disempulang enggau Wifi ba kedai sida.
Siti agi resia pemujur dagang mamak tu iya nya sida ngemeranka konsep Al Fresco. Sida nadai milih sapa-sapa ke deka datai makai ngagai restoran sida. Kelimpah ari nya mega sida sanggup besemekih enggau pedagang bukai dalam bisnes ti sama. Duit mit agi bisi nilai ba kedai mamak. Endur bebelanja endang bisi ba kedai mamak taja pan duit semina seringgit. Orang kaya baikka orang miskin endang tetap diterima sama.
Tauke mamak ukai semua sida nya ke nemu nyumai mayuh bengkah menu tang sida sanggup ngaji orang bukai tauka nyua endur sida ngagai pedagang bukai ke pandai nyumai. Taja pia sida ke ngambi order ba kedai nya tetap pekereja mamak laban nya strategi sereta chara ngelakuka chap tauka jenama ‘mamak’.
(Dibali ari Mingguan Mstar 15 Mei 2011
Tiada ulasan:
Catat Ulasan