Ikan Temakul

Nyadi sekali tu aku deka ngenangka sebansa utai idup ti ulih idup ukai semina dalam ai tang ba pantai mudai ke mayuh ditemu ba menua aku di Nanga Sebangan. Utai idup nya dikumbai Ikan Temakul.

Ikan Temakul nya sebansa ikan dalam sub-raban  Oxudercinae (suku:Periophthalmini), dalam famili Gobiidae (Gobies). Ikan temakul tu bansa  ikan afimbia, ngidupka diri  sechara unik bagi habitat nanga sungai ke  bepasang surut. Iya  bebida enggau mayuh ikan ba habitat ke baka nya laban iya idup ba ai surut lalu belalai  di baruh rumput tasik basah tauka dalam pegung pasang surut. Ikan temakul tu regas amat lebuh ba pantai, makai sereta  berinteraksyen enggau pangan diri, ambika banding lebuh ngetanka endur ari diserang utai idup bukai.

Ikan temakul semina bisi ditemu ba endur tropika enggau separuh tropika, mungkur semua endur  Tasik Besai Hindi-Pasifik enggau Tasik Besai  Atlantik di persisir menua Afrika.

Adaptasyen

Bebanding enggau utai idup dalam ai bukai, ikan tu ngembuan tabiat nyelai sereta adaptasyen fisiologi iya bagi chara idup afimbia. Tu nyengkaum:

§  Ulih ngaturka idup diri sechara anatomi enggau tabiat sida ke ulih ngasuh sida mindah enggau mudah ba darat tauka dalam ai.

§  Ulih enseput nengah kulit, lapis nyawa sida (mukosa) enggau rekung (pharynx). Sida semina enseput baka tu maya tubuh sida embap. Tu ke nyekat  ikan temakul ngagai habitat embap. Tu mega ngujungka sida terus ngasuh tubuh sida embap. Chara enseput baka tu sebaka enggau chara enseput utai idup afimbia. Chara enseput tu dikumbai nyintak angin kutaneous (cutaneous). Adaptasyen ke bukai ti sama dikemeratka ikan temakul tu nyengkaum bagi tubuh ikan tu ti mantu iya empu enseput iya nya ngemesaika insang iya dikena iya nyimpan angin. Tu disemaka baka silinder oksigen penyelam. Iya mega mekalka oksigen lebuh ikan tu ba darat.

§  Numbak sarang jauh ke dalam tanah ke luchak. Tu ngasuh ikan temakul tu ulih ngetanka pengangat tauka haba (thermoregulate); nyeliahka utai idup bukai ke deka nyerang iya  maya ai ai pasang, lebuh  ikan enggau sarang iya di baruh ai;  lalu lebuh iya betelu.

Taja pan lebuh sarang iya tenggelam, ikan temakul tu ulih ngetanka gelembung angin di dalam iya ti ngujungka iya ulih beenseput dalam tikas oksigen ti kurang.

Spesies

Pemesai ikan temakul tu datai ngagai 6 inchi (15 cm) panjai lalu makai dagin. Utai ti diempa iya nya baka utai idup besaiz mit baka gerama,  ketam mit sereta bansa arthropod bukai.  Taja pan ikan temakul tu bisi dijual nyadi  ikan akuarium tang iya mar ditupi laban iya begunaka tangki ti nyelai ari tangki digaga biasa. Ketegal habitat afimbia iya, ikan temakul tu enda engkeman ditupi dalam  tangki ikan biasa.