Kebuah rega barang pemakai majak niki

Kemaya hari tu rega barang sechara global majak niki lalu bisi mai empas ngagai ekonomi dunya sereta chara kitai ngaturka pengidup kitai besehari-sehari.

Index rega pemakai Gerempung Pemakai enggau Betanam-betupi PBB majak niki tinggi dalam bulan December 2010. Ketegal rega pemakai ti majak niki dia bisi 925 juta orang ba serata dunya napi penusah lapar pungkang dalam taun 2010. Tu nunjukka bisi nambah ngagai 150 juta kenyau ari taun 1995-97.

Mayuh kebuah ti ngasuh rega pemakai tu majak niki ari taun ke taun. Ubah gaya hari nya siti ari kebuah. Barang pemakai mega diguna dikena ngasilka minyak kerita. Tu mega siti ari kebuah rega pemakai majak niki.

Kelimpah ari nya, mayuh tanah dikena betanam betupi nyau udah diguna alai ngaga jalai raya, palan engkah kerita, genturung rumah alai diau sereta kompleks industri. Dalam sukut ekonomi industri sereta pemansang nengeri dia penanggul ngasilka pemakai nya endang suah nyadi enggau serius.

Pemayuh tubuh mensia sechara global kelimpah ari pemansang raban kelas tengah mega siti ari kebuah ti ngasuh pemakai majak betambah diempa mensia mayuh.

Penanggul tu majak nyadi mega ketegal ari tanah ti nyau kusi ransi sereta entali ai ti nyau majak rusak ba mayuh endur di dunya.

Kelimpah ari peminta ti tinggi, siti agi kebuah ti ngasuh penanggul inflasyen ba barang pemakai nya ketegal ari melaba tauka spekulasyen ba rega komoditi nyengkaum pemakai ruji baka gandum, jagung enggau beras.

Siti ari ketegal spekulasyen nya balat bendar nyadi iya nya ari  quantitative easing – iya nya polisi mata duit dollar ti murah ti dipejalaika perintah  US ngasuh duit majak masuk kelebih agi ba menua ti baru deka angkat maju.

Tu ngasuh peluang besai ngagai bank enggau kompeni besai nya melabaka tauka spekulet ukai semina barang pemakai ruji tang mega nyengkaum komoditi bukai baka minyak. Rega minyak ti niki iya nya lebih US$90 (RM278) setung bisi kaul enggau pengawa  spekulasyen. Ketegal nya rega mai barang pemakai enggau barang bukai mega niki.

Nya alai nagang pengawa spekulasyen nengah ubah fundamental ngagai sistem finance antarabansa nya amat beguna. Mayuh sida ke bekuasa sereta bisi kaul enggau pengawa dagang endang enda tentu besetuju enggau ubah ti deka dipejalaika.

Besenutuk enggau nya orang ti ngembuan tanggung pengawa ngagai mensia mayuh nyengkaum hak pemakai mensia mayuh patut terus minta pekara nya diubah.

Semua orang ba serata dunya mega patut terus bekimpin bekenaka kereban pengangkut rama laban ti bekenaka kerita diri empu baka kediatu bisi bendar mai empas ngagai pengawa ngasilka pemakai.

Dikena ngemujurka pekara tu semua kitai patut ngembuan ubah ti holistik dalam ulah, perangai enggau nilai. Iya begunaka ati ti ransing tauka  revolusyen dalam ati kitai.

Nya alai semina revolusyen nengah chara roh enggau moral aja ulih mutarka krisis rega barang pemakai ti majak niki kelimpah ari krisis besai ti ditapi mensia mayuh kemaya hari tu.

                                                          (Dibali sereta diambi ari The Star January 24, 2011)