Santa Claus

Santa Claus berasal ari orang ke benama Nicholas.  Sejarah iya tu enda tentu terang. Nitihka cherita, iya ada  di kota Lycia iya nya sebuah penyangkai kapal lama  di Patara (Asia Minor). Lebuh agi biak iya bejalai ngagai menua Palestin enggau Mesir lalu pemulai iya ke Myra iya lalu dichiri nyadi  uskup Lycia  dalam abad-4. Iya dijil lebuh perintah raja Diokletus ti balat bendar merinsaka orang  Kristian tang dilepaska  maya perintah  raja Konstantin bekuasa. Iya parai sereta dikubur di Myra. Dalam abad-6 barang ke ditinggalka iya (relik) nya dikuduska lalu dalam taun 1087 bala pedagang Italia enchuri barang nya lalu mai iya ke Bari, Itali. Udah nya relik lalu dikuduska basilika San Nicola di Bari dalam abad-11.

Lapa Nicholas udah nya pegari sereta nyadi legenda? Nicholas tu ngambarka uskup ti kemerah sereta rindu nulung anak-anak mit enggau orang seranta. Pemanah iya nyau disempulang enggau mayuh pengawa ti tau ajih kelebih agi dalam pengawa ke mantu mensia mayuh baka anak mit. Iya ti bendar cherita legenda Santo Nicholas tu balat bechampur baur enggau legenda pemeri hadiah kafir sebedau tu, baka Befana di Roma, Berchta & Knecht Ruprecht di Jerman, enggau Odin di Norwegia ke ngembuan pengering sereta ulih ngukum anak-anak mit ke manchal lalu meri hadiah ngagai anak-anak mit ke  manah. Iya tu suah agi nepan kerita terebai ti ditarit rusa ais.

Legenda tu lalu ngerekai ngagai menua Eropah, tang kenyau ari pengawa Reformasyen, legenda kultus Nicholas nadai agi diintu di gereja-gereja protestan, lalu  di gereja Jerman iya diganti enggau anak mit, Yesus (Christkindl) pemeri hadiah ti dikenang maya pengada Iya, 25 December. Tang di Belanda bisi siku orang ke dikumbai Sinterklaas, iya nya orang tuai ke bejanggut burak panjai bepakayan uskup nepan kuda lalu ulih terebai atas perabung rumah. Iya dibantu nembiak ke benama Swarte Piet. Sinterklaas datai kena malam 5 December  ke rumah-rumah orang lalu meri pemeri ngagai  anak-anak mit ke manah ulah nengah serumbung asap.

Legenda Nicholas/Sinterklaas tu udah nya lalu dibai ke koloni baru di New Amsterdam (diatu New York) di benua Amerika dalam abad-17 lalu dikumbai ngena nama Santa Claus. Ditu Santa Claus tu orang ke gemuk bejanggut burak ngena pekayan bechura mirah  lalu nepan kerita ti ditarit 8 rusa ais ke ulih terebai. Nicholas bejuluk Santo (orang kudus) lalu bisi mega maya iya dicheritaka baka Christkindl lalu bejuluk Kriss Kringle. Legenda Santa Claus nyadi baka tukuh iya kediatu ba abad-19 lalu dirami enggau pengawa ke beberika pemeri maya malam mantar Krismas (24 hb malam). Legenda Santo Nicholas tu diramika ngena nama Pere Noel di Perancis, Julenisse di Skandinavia, enggau Father Christmas di England. Figur rusa ke-9 benama Rudolph berengkah dikena maya  taun 1939 lalu iya ngembuan idung mirah sereta bekilat .

Taja pan Santa Klaus dikumbai lambang semengat pemeri hadiah kelebih agi ngagai  anak-anak mit, tang ketegal pengawa enggau tukuh iya ke bechampur baul enggau  cherita magis kafir, ambika banding baka penatai Santa Klaus ke penuh enggau ajih baka maya ke nepan kerita rusa ke nemu terebai, betungkat ajih dalam pengerami Magic Christmas ngujungka iya mai empas ti negatif lalu enda engkeman enggau semengat Hari Krismas ti bendar. Siti agi laban iya balat agi ngemeratka pengawa komersial ti balat agi ngelakuka barang dagang baka ayam nembiak, pemakai,ai irup enggau pemerindang. Ketegal sejarah pengidup Nicholas ti enda tentu ditemui nya alai  Paus Paulus VI lalu ngemaduka pengerami Santo Nicholas ari kalinda rasmi gerija Roman Katolik dalam taun 1969.

Pengawa ti balat agi mandangka figur Santa Klaus ari figur Tuhan Yesus kemaya hari tu udah jauh bendar limpang ari ajar pengarap Kristian ti bepunka Injil sereta betatika Tuhan Yesus. Nya alai orang Kristian patut ngembuan pengarap ngambika semua umat iya enda tepejuh jauh tekuing runding enggau pekara ti balat ngemeratka komersial.