Kemaya hari tu kitai balat bendar bepanggai enggau
telefon binching, komputer tauka tablet.
Nitihka pansik 2006, 3.8 juta kes senentang penyakit repetitive strain injury (RSI) bisi nyadi ba United Kingdom(News
Strait Times 23.12.11). Penyakit tu nyadi ketegal ti kelalu bekenaka telefon
binching dalam pengidup besehari-sehari. RSI tu penyakit ketegal sebagi ari
tubuh kitai ti balat engekebut tauka diguna.
Nya alai kenang pengarang sekali tu nguji ngenangka utai bisi bekaul
pengidup kitai enggau telefon binching.
Kemaya hari tu bala mensia mayuh nyau deka semua
ke bisi ngembuan siti tauka dua telefon binching. Nya alai sebagi ari pengidup
besehari-sehari endang balat bendar bekaul enggau telefon. Taja pia chara
bekena telefon kemaya hari tu udah jauh bendar bebida ari dulu suba. Kemaya hari
tu kitai balat agi ngirum pesan ngena sistem pesan jaku pandak ti balat agi disebut sms tauka ngena email. Jarang
agi kitai bejaku ba telefon semadi enda ulih seliah.
Suah agi kitai deka agi nganjung teks tauka jaku
pandak nengah sms ari ke bejaku enggau orang ke ditujuka kitai nya. Nama kebuah
utai tu nyadi? Katika nya nunjukka orang kemaya hari tu udah enda tentu nemu
bejaku nengah telefon? Tauka kitai bisi berasai takut deka bejaku enggau orang
ke ditelefonka kitai nya.
Dipelabaka mayuh entara kitai ke enda tentu berani
deka bejaku enggau tuai tauka tauke kitai ba opis nengah telefon. Kitai berasai
lantang agi madah tauka nanya sebarang pekara nengah sms ari ke bejaku terus
enggau orang nya laban kitai bisi pengirau enggaika iya nganu tauka ngena jaku
jai lebuh bejaku enggau kitai.
Nitihka pansik bisi tiga kebuah orang balat agi
deka ngena sistem jaku pandak ari ke bejaku ba telefon. Kebuah ti keterubah nya
bisi bekaul enggau privasi. Enti kitai bejaku nengah telefon, jaku kitai nya
didinga orang bukai ke berimbai enggau kitai baka ba kantin, opis, rumah tauka endur
bukai. Bisi jaku ke enggai kitai dinga orang bukai. Nya alai kitai ngena sms. Enti
kelia nadai jalai bukai semina betelai ba telefon enti enggai jaku kitai nya didinga orang bukai.
Kedua nya utai ke disebut tulis kitai nya ulih
disimpan nitihka pengelama ke deka kitai empu laban iya ulih disimpan dalam
memori telefon. Enti kitai bejaku ba telefon jaku kitai nya semina disimpan ba
dalam memori untak kitai empu lalu kekadang jaku ti disebutka kitai nya nyangka
tau enda ulih dikeingatka belama.
Kebuah ti ketiga nya jaku ti ditulis ulih
dilangkarka dulu sereta dirunding enggau manah-manah. Teks ti ditulis nyangka
balat agi bebasa sereta beradat laban kitai bepikir dulu sebedau nuliska pekara
ti deka dismska kitai. Jaku ti disebut terus nengah telefon kadang-kadang
pansut ukai ari runding ti udah diperambuka dulu. Nya alai enti kitai bansa
orang ke jampat latah tentu kitai nyau sebarang utai sebut. Tu tau meri empas
ti negatif ngagai orang ke dikerandauka kitai dalam telefon tauka ngagai kitai
empu.
Nya alai dalam konteks tu, doktor ke mansik
penyakit RSI madahka nengah sms tu mih penyakit RSI tu nyadi. Penyakit tu balat
nyadi ketegal bepanggai ba pemansang teknologi enggau gajet. Iya udah balat
nyadi chara idup ukai semina sebagi ari pengidup.
Nitihka pansik Nielsen Mobile dalam taun 2008
madahka pukul rata orang US nganjung
enggau nerima pesan jaku pandak nya bisi datai ngagai 1,700 teks ninting bulan.
Kelimpah ari nya mega, nembiak rebak baru kelebih agi anak mit balat agi bemain
komputer ari ke bemain bol ba padang. Mesin pemain nya mega tau ngasuh orang
ngidap penyakit RSI mega.
Lebuh teknologi majak mansang dia gajet ti
dikenaka kitai nyau majak mit-semit. Tu mih ke nyadika penanggul ngagai kitai
mayuh. Nya alai enti bisi peluang tau
milih manah agi kitai bejaku ari ke nganjung pesan ngena sistem pesan jaku
pandak tauka sms. Orang ke selalu chatting nengah internet mega patut nitihka
lalau tu mega enti deka nagangka penyakit RSI nya datai.
Tiada ulasan:
Catat Ulasan