Ngetanka Jaku Konkani

TAJA PAN satu perempat ari rayat India agi idup ditangkup penyeranta tang iya ukai penanggul ti nagang pengawa sida ke deka ngangkatka jaku ti nyadika tanda pengelala diri, nilai bansa enggau kaul ti tegap sereta entap dalam komuniti sida. 

Diangkat entara menua ti kaya enggau mayuh bengkah jaku laban bisi ngembuan lebih 20 bansa jaku baka jaku Hindi, Marathi, Punjabi, Tamil enggau Telugu, kelimpah ari 844 dialek ke nyadika kereban komunikasyen dalam komuniti di India. Iya mega nyengkaum mayuh pupu  etnik, komuniti di nenggeri bemenua mit terang bendar mandangka semangat ti sayau ngagai jaku nengah mayuh macham inisiatif ke terus dipejalaika.

Konkan tu ba menua ili, pesisir  India Barat. Iya patut bendar nyadika ngagai chunto ngagai rayat Malaysia ke kelalu temegah enggau jaku English. Sida  sanggup ngelengkaka jaku  rasmi enggau bangsa  laban deka bejalaika mayuh bengkah aktiviti enggau program pemansang dikena nentuka pemansang jaku nya enda teketu.

Dipelabaka tentu enda mayuh ke nemu bisi jaku Konkani. Jaku tu nyadi batang jaku ti dikena komuniti Konkan. Kelimpah ari nya jaku tu mega dikena lebih 7.6 juta rayat ba pelilih menua tu sereta diguna raban komuniti bukai  di pantai barat Maharashtra, Goa, Karnataka enggau Kerala. 

Nadai orang kala nyangka laban dulu suba jaku Konkani tu kala balat dipetalatka sereta nyau deka enda dikemendarka nyadi siti ari jaku di India. Kebuah pia, laban komuniti Marathi enggau orang ti bepenemu pasal jaku  di India madahka jaku Konkani nya semina dialek ngagai jaku Marathi ke nyadi jaku rasmi sida ti diau di nengeri Maharashtra. 

Dikena ngulihka jaku sempekat, siti aum mija segala diaturka Presiden Akademi Sahitya iya nya gerempung litericha ti tebilang di India, Sunit Kumar Chatterjee, sereta ngempuruka semua orang ke bepenemu pasal jaku di India dikena sida mutarka isu ari terus nyadi. 


Asil ari aum nya kena  26 February 1975, kesemua sida ke bepenemu pasal jaku  besetuju madahka Konkani nya patut megai status jaku ti ulih bediri kediri lalu mayuh karya litericha udah berengkah ditulis ngena jaku ti badas tu.

Entara orang ke nyadi tulang belakang ngagai pengawa ti ngangkatka jaku Konkani tu, iya nya orang pandai ke tebilang di India iya nya Prof Dr Sumitra Mangesh Katre. Iya ngenyit datai enggau sebuah bup, Formation of Konkani, kena taun 1966. Tu muka mata mayuh orang senentang penyelai jaku Konkani ti ngelama tu seruran dipeda mudah, mit sereta nadai diguna. 


Tuju iya dikena neruska legasi tokoh enggau pejuang tulin ti mayuh meri bantu dalam pengawa ngetanka ‘nyawa’ jaku Konkani sereta ngerembaika raban pejaku nya, kelebih agi ngemudayaka jaku nya ngagai tikas baruh kelebih agi sida ke nembiak rebak baru. 


Empai lama, Menteri Pelajar Tinggi, Perintah Nengeri Karnataka, Dr VS Acharya madahka perintah deka meri ungkup  bantu mata duit 50 lakh rupee setaun ke taun 2011 sereta nambah bantu 150 lakh ngagai 11 akademi lalu empat ari akademi tu ba daerah nya mega. 


Ba jaku tesau ke dikenataika ba pengawa ti ngeramika karya litericha ti ditulis penulis indu enggau pesta adat enggau main asal ti diaturka Akademi Sahitya Konkan Karnataka (Akademi), madahka perintah meri tuduh penemu madahka kereban litericha dalam bahasa Konkani ti badas nya patut dikalih ngagai jaku Kannada enggau jaku bukai. 


Utai ti nyelai senentang jaku Konkani iya nya jaku tu ukai semina dikena komuniti bepengarap Hindu tang mega komuniti Islam enggau Kristian. Kelimpah ari karya litericha ti ditulis dalam jaku Konkani baka leka main, jerpan, novel enggau bup litericha anak mit, diatu nyau bisi kereban penyanding penemu dikena dalam pengawa belajar. 


Asil pengawa Akademi mupuk mandangka impak positif lebuh jaku Konkani berengkah diajar di sekula nyadi  subjek elektif ukai semina ba pelilih menua Konkan tang mega ba pelilih menua bukai baka Udupi enggau Dakshina Kannada.         (Dibali ari bhsastera@nstp.com.my)