Garam Bario

Pejalai kira-kira 30 minit bala tukang ngaga garam ngagai endur telaga ai masin Kampung Pa’ Umor di Bario nujah kampung dalam ti bebukit sereta luchak. Lebuh ke ngereja pengawa tu, sida seruran mai semua bala sida sebilik lalu diau ba langkau ke digaga dalam kampung nya dalam timpuh dua minggu. Sepemanjai timpuh nya sida sebilik deka ngabiska awak meroses garam bukit sebedau datai idar orang  bukai ngena langkau nya. Baka nya gaya rutin pengawa begagaka garam ti dikerejaka sida bansa Kelabit ba palan tanah tinggi Kelabit, Bario.

Garam Bario tu siti ari asil pengeraja asal menua. Sarawak endang tebilang enggau mayuh macham asil pengeraja mineral asal. Kelimpah ari Kampung Pa’ Umor, bisi mega sekeda genturung menua bukai sebelah Bario nya ke bisi telaga ai masin.

Garam bukit ngundan zat besi, iodin, kalium enggau magnesium. Iya engkeman amat dikena nyadika penambah asai pemakai kelimpah ari meri pengelebih dalam sukut pengerai. Sekeda ari pengelebih nya nyengkaum mantu  ngemanahka pejalai darah, meri cas ti setimbang dalam tubuh, munuh igi penyakit sereta mai pengerai ngagai tubuh.

Dalam timpuh seminggu, bala sida Kelabit nya ulih ngaga 100 batang garam. Pengawa ngaga garam tu ukai pengawa ti mudah dikerejaka laban iya lungat amat sereta digaga enggau bejimat.

Proses ngaga garam tu bepun ari pengawa nanggarka ai garam ti udah diambi ari telaga ai masin. Ai garam ti diengkah dalam kawah nya dipanduk ngena api kayu.  

Udah sehari semalam, ai garam nya tadi dilakka baka nya aja awakka iya nyadi kristal sebedau nyadi garam alus. Lebuh ba renggat tu, garam nya tadi patut digirau ngambika iya enda angus. Garam ti angus nya kurang agi kualiti.

Garam ti udah rangkai nya lalu dilak chelap sebedau ditepu ke dalam buluh ke 30 sentimeter pemanjai. Udah nya ditebukka lubang ba baruh buluh nya ngambika ai ulih pansut. Tu nentuka garam nya udah rangkai amat.

Udah nya, buluh nya tadi lalu ditunu ba bara api baka ke nunu asi ruas. Tuju nunu tu ngambika garam nya kering. Proses nunu tu dipejalaika datai ngagai buluh nya pechah lalu ngasilka garam dalam tukuh beigi-igi baka batu sereta kering.

Garam nya tadi lalu dikikis belubah-lubah ngena lungga dikena muaika tanda chelum angus nya. Udah nya baru proses mungkus garam nya tadi. Dalam proses tu, garam nya tadi dibungkus enggau sebansa daun ke dikumbai ilat lalu diikat manah-manah ngena tali rutan.

Sebatang garam Bario dijual enggau rega entara RM10 ngagai RM15 lalu kos tu majak niki enti iya udah dijual ba menua bukai baka Kuching tauka Miri ketegal kos kereban pengangkut ti mar.