Leka jaku nya
kereban jaku ti pemadu bekuasa. Runding nya sebagi ari jaku (inner speech) lalu
jaku dipenyadi ari leka jaku. Nya alai leka jaku nentuka gaya nembiak bepikir
sereta nguingka chara ulah iya.
Nembiak ke ngembuan
pengelebat jaku (vocabulary) meri sida kuasa milih leka jaku dikena ngenataika
idea, runding, penemu enggau informasyen enggau nemban sereta engkeman ngambika
mandangka impressyen tauka utai ti deka
dikenataika sida. Dalam timpuh lima taun pengidup sida, nembiak nguji naka ulih
nangkap leka jaku dikena sida idup dalam rampa dunya ti ngelingi sida. Maya tu
mih kitai ngajar nembiak reti leka jaku lebuh kitai bejaku tauka bemain enggau
sida ngambika neleba sida ngagai pengawa tauka pengidup besehari-sehari.
Pemansang vocabulary
ulih disukung ukai semina maya bejaku tauka berandau enggau nembiak tang mega
maya kitai macha ngagai sida. Bup nya ngembuan mayuh leka jaku lalu leka jaku
tu suah dikenataika dalam mayuh chara ti idup, konteks ti ngerinduka ati sereta
gambar.
Nembiak ngena leka
jaku tu dalam vocabulary jaku sida
ngambika bisi reti dalam leka jaku ti dichelak. Vocabulary nya beguna lebuh
macha genteran teks; nembiak enda meretika teks enti sida enda meretika leka
jaku. Nya alai nguasa mayuh macham leka jaku tauka vocabulary nya patut bendar
nyadika fokus lebuh ngajar anak mit pasal sesebengkah bansa jaku.
Pengajar ti asal
jaku Iban ngena mayuh macham vocabulary ti engkeman sereta nyadika model ti
manah kelimpah ari ulih meri input vocabulary ngagai bala nembiak. Nya alai ba
tikas umur ke agi biak, nembiak patut dibantaika enggau program macha ti
ekstensif.
Vocabulary ulih
diajar nengah chara bemain laban tu mih chara nembiak bulih leka jaku baru
sereta nyimpan dalam untak. Nembiak mega patut diajar strategi belajarka leka
jaku. Kelimpah ari nya, nembiak diajar leka jaku ke baru nengah chara
kontekstual lalu chara nguna penerang senentang leka jaku baka jaku bepenambah,
jaku tumbuh enggau urat jaku dikena sida ngiga reti leka jaku ti baru. Nembiak
ke tuai agi diajar baka ni ngena tesaurus lalu diiring chara ngena leka jaku ti
sama reti tauka antonim enggau betul.
Tiada ulasan:
Catat Ulasan