Ramban Pengawa Bepolitik

2011 ti baru ngelebus alai orang begau laban Sarawak  ngaturka  pengawa bepilih tikas dewan undangan negeri
2012 tu engka  sekali agi orang begau  laban pengawa bepilih tikas parlimen deka dipejalaika 
Maya nya mih orang  begau minta pilih nyadi pengari,  
orang begau nyadi  ejen parti,  
orang begau  deka  bekimpin,  
orang  begau bekimpin,  
orang begau  bejaika  pangan  diri.

Nya mih kebuah begulai tauka bepechah parti nya sigi adat bepolitik. Sapa kering iya ngulu, sapa lemi nitih ari  belakang.

Enti dek nemu diri empu lemi, bebendarka agi mih ngerempung bala penyukung.

Enti dek nadai duit, anang bepolitik; giga dulu puku enggaika lenyau duit chengkeram.

Enti dek bisi pemandai tang enda nemu matak bala rayat, anang bepolitik; dek tetap alah.

Enti dek enggai beserakup tauka begerempung, dini-dini gerempung ke ditumbuhka ke dipasukka dek sigi bepechah.

Enti kitai nadai polisi ngerempung, ngulu sereta ngemansangka diri, kitai sigi enda berubah;  lalu baka nya belama-lama iya – kelia, diatu enggau belama-lama.

Seagi-agi  kitai agi nyamai  disuap enggau duit-ringgit, 
pangkat, projek, bisnis, penuduk sereta pingat, 
endang agi senang orang bukai  merintah kitai. 
Peda aku kitai sigi deka lalu rindu besabung enggau pangan diri. 
Enda lantang ati enti enda ngelaban 
laban chara kompromi tu ukai adat budaya kitai.

Bisi tuai laban, nadai tuai pan ngelaban.

Bisi pangan bai berekak, nadai kaban ngerekak orang.

Bisi penemu enggai mantai, nadai penemu ngeleseka orang.

Siti agi dipeda aku, kitai sigi ari suba rindu berebutka nyadi Tuai sereta berebutka Kuasa. Nadai pengunjung  laban nyentukka sehari lalu bedau mujur.

Bisi nya madahka diri deka ngiring ngembing nguluka kitai tang beserakup mega  enggau orang  bukai . Bah ni gaya tu dih?

Bisi nya deka mai kitai  begerempung dalam siti parti, tang ke peda kitai diatu nyau balat endar ga bala kitai muka ‘kelang sabung’ ngelaban pangan-diri; bah baka ni gaya nya dih?

Dalam pengawa bepolitik 
semua orang ulih nyadi kaban,  
ulih nyadi penyukung,  
ulih nyadi penyakal, 
ulih nyadi bakih pia mega ulih nyadi munsuh. 
Pengawa politik tu sigi skim ngerebut kuasa; 
sapa balat agi nerantingka rekung  tauka kering  agi penuduk,  
iya mih megai tampuk perintah,  megai kuasa merintah.

Kitai endang  mayuh pandai, 
mekuh mayuh macham pengawa, 
datai ari mayuh macham suku etnik, 
ngembuan mayuh macham runding,  
ari mayuh macham penatai, 
ngemeran  mayuh macham pengidup,  
ngembuan mayuh macam penemu, 
mayuh utai temu, 
mayuh macham ulah lalu mayuh macham penumbuh.  
Nya  mih kebuah kitai enda sebaka. 
Pemida  kitai  nya ngasilka mensia ti bebida.