Orang Islam Pechah Ngagai Tiga Puak-Mahathir

Ideologi politik ti bebida ngujungka orang Islam di Malaysia bepechah belah sereta enda mudah diserakupka.

Menteri Besai ke dulu suba, Tun Dr.Mahathir madahka sida nya diatu nyau pechah ngagai tiga bengkah raban sereta belaya enggau pangan diri taja pan ukai ngena senyata baka ke ba sekeda menua Islam bukai.

‘Orang Islam di Malaysia pambar ukai ketegal ideologi pengarap tang ketegal ideologi politik ti udah lama nguing runding sereta ati raban parti.’

‘Ketegal ti ngembuan ideologi politik ke bebida, orang Islam udah enggai besembiang ba masjid ti sama lalu ngembuan pendam ti bebida,’ ku iya lebuh ke bejaku enggau pengarang berita udah ti bejadika pengerami Majlis Multaqa Wehdatul Umman ba Butterworth, Pulau Pinang.

Dr Mahathir madahka orang Islam endang patut semampai beserakup sereta semampai minta ampun enggau pangan diri enti bisi besalah laban nya mih ke dipinta dalam pengarap.

‘Enti kitai nemu, utai ti diajar dalam pengarap nya endang pasal diri menyadi. Nya alai kitai mesti ngerapitka kaul laban kitai sama-sama ngemeran pengarap ti sama. Orang Islam patu beserakup lalu enda bepechah-belah sereta bemunsuh enggau pangan diri laban penyerakup nya pugu pengidup komuniti Islam.

Dr Mahathir ke mega nyadi Yang Dipertua Gerempung Pengelantang Pendiau Islam Malaysia (PERKIM) madahka orang Islam di menua tu mandangka ulah ti betul ngagai dunya senentang pengidup Islam ke bendar ngagai raban bansa bukai.

‘Kitai majak lemi enti kitai majak belaya enggau pangan diri. Kitai engka enda ingat 55 taun nyin suba semua orang Islam enggau Melayu ba menua tu beserakup ngelaban Malayan Union sereta minta merdeka ari perintah British.

Maya nya suba orang Islam endang agi lemi tang kitai ulih ngalahka Malayan Union laban kitai ngembuan penyerakup. Taja pan nadai duit enggau pengering bukai tang kitai ngembuan penyerakup ke ngujungka kitai ulih ngalahka Malayan Union,’ pia ku terang Dr Mahathir. –Mingguan Siasah