Napi penanggul ponteng sekula

Ponteng nya siti ulah ke salah sereta dikumbai ngelaban atur sekula. Nembiak sekula dikira ponteng enti iya enda datai ke sekula enggau nadai kebuah lebuh hari sekula. Penanggul tu endang nyadi nyau deka ba semua sekula lalu bisi nya udah datai ba tikas ke serius. Raban media mega seruran mantaika berita senentang penanggul tu ke ngujungka bala pengajar enggau apai indai ngasai atur ti terit patut dipejalaika sebedau pekara negatif tu datai ke tikas ke lebih kronik agi. Nitihka ripot ti kala dipansutka Opis Menteri Pelajar madahka peratus pelajar ke bisi enggau penanggul ponteng nyau majak mayuh kelebih agi ba sekula di nengeri. Ba penemu aku kebuah penanggul tu nyadi patut diperatika ngambika kitai ulih berundingka jalai dikena mutarka penanggul tu ari majak nyadi.

Sekeda ari kebuah nembiak sekula ponteng iya nya ketegal sida iya enda tentu ngembuan pengerindu ke pengawa belajar enggau ngajar di sekula. Pekara tu nyadi nyangka bepun ari ripih isi turai pelajar ti kelalu ngemeratka sida ngapal sesebengkah pekara tauka isi pelajar. Ambika banding, nembiak balat bendar ngemeranka pengawa ngapal dalam mata pelajar Geografi, Sejarah tauka Pendidikan Islam. 

Kelimpah ari nya, nembiak enda tentu rindu belajar nyangka ketegal sida empu ke endang datai ari pengelemah sida empu. Dalih ti baka tu balat nyadi ba nembiak ke endang kurang pemandai dalam pelajar enti dibandingka enggau sida ke endang pandai sereta pintar dalam pelajar.  Nembiak ke baka tu suah sereta jampat bendar ngalahka diri. Sida semina datai ke sekula semata-mata laban ke dipejalka apai indai sida. Nya mih kebuah sida suah ponteng laban nyau enda rindu belajar ketegal ke enda ulih besemekih enggau nembiak bukai ke pandai agi ari sida.

Bisi mega nembiak ponteng laban sida balat agi ngemeratka pemerindang ari pelajar. Pekara tu nampak bendar dipeda ari pengawa sida ke dedayau sereta begelumu di pusat-pusat bebelika barang baka supermarket, mall, pusat bemain  video enggau palan rekreasyen. Bisi mega sekeda nya ponteng laban meda wayang tauka memarin. Ngagai sida tu, belajar di sekolah nya chukup enda ngerinduka ati laban mimit pan nadai ngenataika pemerindang ngagai sida. Nembiak ke baka tu mega enda nemu pemesai reti pelajar ti ulih nyamin pengelantang pengidup sida jemah ila. Nya mih kebuah sida balat agi ngemeratka pemerindang ke nadai ditemu di sekula.

Kelimpah ari nya bisi mega nembiak ke ponteng ketegal takut  diukum, pengajar ke mangah, malu enggau mayuh kebuah bukai. Nembiak ke baka tu mutus ati ponteng laban sida takut diukum ketegal ke enda sempat nembuka pengawa sekula ke diberi pengajar. Bisi mega nembiak ke datai laun lalu mutus deka ponteng laban takut diukum ketegal penyalah sida nya. Nembiak mega berasai malu enti diukum sereta dianu pengajar lalu sida suah agi deka ponteng lalu belalai tauka ngelepak di endur ke enda ulih ditemu pengajar. Raban nembiak tu mega nyalahka sida sekula laban ke ngemeranka atur ti kelalu terit sereta ngeletakka ukum ke ba penemu sida nya kelalu berat ngagai penyalah ti mit.

Sida sekula deka ngeluarka surat tagang ngagai nembiak ke suah ngaga penyalah ponteng, iya nya kira-kira bejurut tiga hari. Surat ti dituju ngagai waris tauka apai indai kadang-kadang enda nerima respon ti kearapka. Apai indai kelalu gagau enggau pengawa sida besehari-sehari ngujung ke sida lalu nadai ulih ngenataika diri ke sekula berandau enggau pemesai sekula. Tu mandangka sida apai indai enda tentu ngemeratka pengawa anak-anak sida. Tu mega ngujungka nembiak nya lalu terus ponteng datai ke sida nya diasuh badu sekula. Dalam hal tu, apai indai nya mih ke enda ngemeratka jaku tagang sida sekula ti ngasuh pekara tu nyadi.

Kelimpah ari nya, bisi mega nembik ponteng laban deka gawa chara sambil. Tu nyadi ketegal tikas ekonomi sida sebilik ti baruh. Nya alai bisi nembiak sekula ke gawa nyambik nyadi kedi di padang golf sereta mega bekereja nyadi kuli ba endur ngaga rumah. Kelimpah ari nya mayuh mega ari sida nembiak tu ke bekereja sechara sambil ba pasar raya ngujungka sida kelalu lelak sereta enda ulih ngenanika diri kelebih agi lebuh ke bekereja maya malam.

Enti nyema penanggul tu enda diputarka enggau jampat, peratus pelajar ponteng tentu deka majak betambah sereta tau bendar nanggulka juluk ati perintah ke deka ngasilka rayat ke bepelajar tinggi, cherdas sereta pintar. Pemansang menua kitai mega puntan ketegal penanggul ti baka tu. Tanggung pengawa apai indai, sida  sekula sereta Opis Menteri Pelajar endang berat ngambika pekara tu enda majak serius.