Manuk dalam daya idup bansa Iban

Manuk nya sebansa burung tupi ti suah agi diinang ketegal telu iya. Iya dikumbai asal ari Manuk Kampung Mirah Asia (Asian Red Junglefowl). Manuk nya binatang tauka burung ti pengabis suah dipeda di dunya. Nitihka pansik Firefly Encyclopedia of Birds, dianggarka bisi 24 bilion iku manuk di dunya tu dalam taun 2003.

Manuk tu jelu ti makai sebarang utai, ari leka mayuh macham utai ngagai macham bansa daun sereta indu utai enggau tikus. Tang manuk tupi suah agi diberi pemakai manuk baka baja manuk enggau pemakai ti ngundan protein. Manuk tupi enda ulih terebai jauh.

Dagin manuk nya pemakai ti balat dikerindu sereta ulih  diguring lalu diipung aja tauka diempa nyadika lauk begulai enggau asi.

Dalam daya idup Iban, manuk nya sebansa jelu tupi ke ngembuan reti ti dalam. Dalam raban bansa Iban, manuk ukai semina ditupi ke empa aja tang bisi guna bukai. Karang sekali tu nguji ngenangka pemesai guna manuk dalam daya idup raban bansa Iban.

Enti kelia, manuk endang dilepas pia aja; manuk sabung tauka manuk lelaki suah agi niki pun kayu lalu manuk indu enti iya betelu dikurung ba dalam kerungan ba ruai sereta manuk sabung diikat ba tempuan ruai.

Bansa manuk

Dalam daya idup Iban, manuk tu mayuh bansa. Manuk bangka nya manuk Keling ke disimpan iya dalam bangka tauka tajau. Manuk bangkut nya manuk ke pandak iku sereta nyau deka baka pendiau manuk indu. Anak itit nya nama ke diberi ngagai anak manuk. Manuk jagau nya manuk China, tauka manuk ke dibeli ari pasar. Kemaya hari tu suah orang ngumbai nya manuk karan. Manuk lanjau nya manuk ke bedau tuai lalu manuk sigun nya manuk ke beiku panjai. Manuk sabung nya manuk lelaki ke ditupi ke sabung. Manuk bandung nya manuk ke besapit ti mechah ari sigi telu aja. Manuk sipat Bugau nya manuk ke sakit bebelit batang rekung.

Guna manuk dalam pengarap lama

Ngagai raban Iban ke agi ngemeranka pengarap lama, telu manuk nya diguna kena  pengawa miring sereta dikena mega maya mayar tunggu.

Manuk berengkah diguna dalam pengawa miring iya nya maya Simpang Impang ke deka nunggu Bunsu Ribut. Pemulai iya ke enda nyadi nyerang Bunsu Ribut, bala sida bisi ngetu enda lama ba rantau jalai. Lebuh ke ngetu nya manuk lalu terebai ba atas pala sida ke bukai lalu enda mukai-mukai bira ba atas pala sekeda ari sida dia kelebih agi bala sida ke tuai. Ketegal ke enda bebebasa baka nya dia manuk diukum nyadika kereban dikena maya Iban miring. Kenyau hari nya, manuk lalu dikena miau lebuh bisi pengawa.

Chura manuk

Chura manuk endang mayuh bansa. Nama manuk diberi belalauka chura lalu chura tu diambi belalauka nama ikan, burung, indu utai enggau reptilia. Sekeda chunto nama manuk belalauka nama ikan baka adung, bangkas, banta, baung, engekerik, enseriban, jalak kepiat, mulau enggau semah. Chunto nama manuk belalauka nama burung nyengkaum empitu, engkerasak, ensulit, ensing, kunchit menaul, pipit, sempidan, sengayan enggau tajai. Nama manuk belalauka nama indu utai nya nyengkaum empelawa, kesa, kesulai, lalat, manyi, menaning, panggang, pantak enggau semut.

Selangkuh tubuh manuk nyengkaum bulu, bulu sua, dunggul, gambir, rekung, pala, mata, sayap, lelanjang, pah, tada, taji enggau kaki. Kelimpah ari nya keresa dalam manuk baka ati, empedu, lintan, kundut enggau perut. Tai manuk ke nyau udah jarang dipeda kelebih agi ba nengeri nya tai manuk lintung.

Asal nemu nyabung manuk

Nyadi nyabung manuk tu endang siti ari uti asal bansa Iban. Laban iya main asal, nya alai semua nembiak ke ada tulin Iban, kenyau sida agi mit endang diajar ngelala bulu manuk lelaki tauka manuk indu.

Nyadi kenu ku cherita orang tuai kelia, keterubah iya orang bebuti belaban nyabung manuk nya Raja Machan ngelaban Ambong Mungan. Nitihka cherita nya nyadi Ambong Mungan tu alah sabung ngelaban Raja Macham. Malu alah nyabung, nya alai Ambong Mungan lalu belelang ngiga manuk sabung ngagai sida Keling di Panggau Libau Lendat Bebiau Takang Isang. Bulu manuk ke deka digiga iya nya tuntung lang ngindang terebai, biring belangking pipit kechuai. Datai iya di Panggau Libau, dia Keling madahka diri nadai ngembuan manuk ngemanah nya bulu. Taja pia iya lalu ngasuh Ambong Mungan ngiga ngagai rumah sida Sengalang Burong, laban sida din ke suah didinga bisi nupi manuk ke manah-manah bulu.

Ninga ajar Keling nya, Ambong Mungan lalu mupuk ngagai rumah sida Sengalang Burong. Datai iya ba Aki Lang nya tadi, iya lalu nusui penemuai diri ngagai sida iya. Aki Lang lalu madahka diri nadai nupi manuk ngemanah nya bulu tang iya bisi ngajar Ambong Mungan ngiga manuk ngagai Petara ke langit.

Udah tembu berandau enggau Sengalang Burong, Ambong Mungan pan lalu mupuk ke langit. Nyau kelama iya udah bejalai, iya pan datai ba endur ke dikumbai Lembang Palang Subang, Nyeliahka karang miga segala, datai di tuchung bukit sigi besenggal tinggi, nyagu ke lengi mua benda, endur rumah Raja Petara.

Datai iya di rumah Petara, iya lalu nusui penemuai diri ke ngiga manuk bulu tuntung lang ngindang terebai, biring belangking pipit kechuai. Raja Petara madahka diri bisi nupi manuk bulu nya. Tang lebuh nya manuk nya udah bejalai jauh ngair ke langit. Ninga tuju penemuai Ambong Mungan, Raja Petara lalu ngambi umpan kena iya ngumbai manuk nya pulai kia. Enda bangat lama udah iya ke ngumbai, manuk nya pan datai beteratak inggar bendar. Bulu manuk nya ngenjing perenching dipeda Ambong Mungan. Udah manuk nya ditangkap, Petara madahka manuk nya endang enda tau alah enti disabung. Ninga jaku Petara munyi nya, Ambong Mungan gaga bendar ati, laban manuk ke diambi iya nya enda tau alah disabung.

Udah nya Ambong Mungan mulaika diri. Datai iya di rumah, iya bisi ga ninga Kendawa pan udah ga nyau ngiga manuk sabung ke menua sebayan, napatka Ensing Jara. Nyadi bulu manuk ti digiga Kendawa nya biring gerunggang. Ambong Mungan lalu nyabung baru ngelaban Raja Machan. Raja Machan pan alah nyabung ngelaban iya, laban manuk ke disabung iya nya endang enda tau alah, ku Petara.

Nyadi Ensing Jara ke ditapatka Kendawa ngiga manuk di Sebayan nya Antu Anda Penyabung ke ngemataka semengat manuk ke mati disabung kitai di menua tu.

Bansa manuk sabung Iban

Manuk ijau Lelayang:
Punggung iya sematung ninjau,
Bedada banda imbuk tukuau,
Bau iya chiru biring tasau,
Belakang iya lang chelum mansau,
Iku iya merundu kelabu papau,
Bulu sua iya ngambi sua ijau Lelayang.

Manuk Kapiat:
Punggung iya sematung tuntung kulat,
Dada iya banda burik lelekap,
Bau iya chiru asu rapat,
Belakang iya lang chelum bekilat,
Iku iya merundu ijau burung bidat,
Sua iya ngambi anak belalat Umbang.

Manuk tawai:
Punggung iya sematung tuntung engkerawai,
Dada iya banda pipit kechuai,
Bau iya chiru ijau enseluai,
Belakang iya lang chelum meratai,
Iku iya merundu jelayan tuai,
Sua iya ngambi anak engkerawai bintang.

Manuk biring:
Punggung iya sematung tuntung engkerunding,
Dada iya nyala banda ensing,
Bau iya chiru tasau biring,
Belakang iya lang chelum begenyeling,
Iku iya merundu jelayan menaning,
Sua iya ngambi anak menaning banjang.

Manuk Jelayan:
Punggung iya sematung tuntung burung danan,
Dada iya banda bejalak ikan,
Bau iya chiru biring sengayan,
Belakang iya lang chelum redam,
Iku iya merundu engkarung ridan,
Sua iya ngambi anak sempidan arang.

Manuk Burik Belatuk:
Punggung iya sematung bangkut serantuku,
Pala patung iya besemada balu,
Dada iya banda pipit antu,
Bau iya chiru ensing batu,
Belakang iya lang chelum ngelepu,
Iku iya merundu kelabu empitu,
Sua iya bisi besemut panggang.

Tu agi sekeda ari bansa manuk sabung; Adung, Biring, Biring Sengayan, Biring Sempidan, Biring tasau, Bangkas, Banda, Banda Ensing, Banda Pipit Antu, Banda Pipit Kapua, Banda Pipit Kechuai, Banda Daun Imbuk, Banda Imbuk Tukuau, Banda Burik Lalekap, Banda Bejalak Ikan, Bejalak, Burik, Burik Belatuk, Burik Menaul, Burik Semut Gatal, Engkarong, Engkarung Ridan, Ijau Lelayang, Ijau Enseluai, Kapiat, Kelabu, Kelabu Papau, Kelabu Empitu, Labang, Labang Kubah, Menaning, Menaning Banjang, Sematung, Sematung Jelayan Muda, Sematung Ninjau, Sematung tuntung Engkerawai, Sematung tuntung Engkerunding, Sematung tuntung Burung Danan, Jelayan, Jelayan Menaning, Kepiat, Tasau Biring, Tuntung, Tuntung Kulat, Tuntung Engkerawai.

Tuah manuk sabung Iban

Tiap-tiap manuk sabung endang bisi ngembuan tuah iya empu. Penemu senentang macha tuah manuk endang dipelajar orang ke rindu nyabung ari orang ke tuai kelia. Ditu semina diterangka mimit senentang tuah manuk belalau ari penerang orang ke tuai kelebih agi niang aki aku sereta orang ke nemu nyabung manuk.

Manuk biring bisi tisik ninchin ba sebarang endur di kaki manuk lalu betada chelum. Bejalak ngembuan belakang bungkuk, begelung dada lalu bebulu baka kapas ba baruh sayap. Menaning bebulu kaki. Engkechung bisi nyelit betusun tiga ari belakang kaki iya. Manuk kelabu betisik kelulung tujuh, beiku jai bendar gamal tauka iku ngepit baka ke siti aja. Manuk labang betisik batu kapak (singkap tisik besai), iku bisi bulu burik menaul.

Penti pemali ti bisi kaul enggau manuk

Mali makai kaki manuk enggaika tulis jai baka kair manuk

Mali makai pala manuk enggaika suah ngantuk baka manuk.

Mali makai rekung manuk enggaika pala singit.

Jaku ti bisi kaul enggau leka jaku manuk

Dalam jaku Iban, manuk mega bisi dikena nyadika sekeda ari jaku dalam dikena lebuh maya berandau tauka bejaku ba mua mayuh. Ambika banding:

Tau didinga kukuk manuk reti nya tempat ke diterang tauka dituju nya semak.

Datai kair manuk nya madahka penyauh ngejangka rumah ke agi datai alai manuk bemain enggau ngair.

Maya kukuk manuk nya maya tumu pagi tauka teberingkas tawas.

Kukuk manuk maya malam nya tengah malam.

Silau manuk nya maya lemai hari deka petang tauka enda tauka maya salah kelala.

Anak iya beapaika manuk reti nya iya nya anak ampang.

Angat tai manuk nya ngambar ke orang ti lawa sekejap tauka semina ngereja pengawa sekejap aja.

Baka buyah ngereja api, baka manuk ngereja taji nya nunjukka ati sengaja deka ngereja utai ke tau medis tau nusahka diri.

Engkeruchak ayam tebing nya mai reti orang ke mayuh jaku tang nadai tau diguna.

Enda dibalas kaki manuk nya mai reti tanya ke enda disaut.

Idup manuk nya orang ke enda merinsa ngidupka diri.

Manuk lepas jari bau tai  mai reti bebendar deka ngulihka tuju ati tang utai nya enda ulih. Semina teulihka penusah enggau pengerugi.

Manuk lia nya orang ke masin gawa taja pan gamal mit.

Manuk mati keberuran di tibang padi nya nyemaka orang ke seranta pengidup ba menua ke kaya ketegal ngelusu gawa.

Pungka lelaki baka manuk nya mandang orang ke regas, bagak, rajin enggau kering lalu nadai orang bukai ngalah.

Baka manuk ke baru lanjau nya madahka nembiak ke baru angkat bujang.

Baka manuk apin didunggul nya nyemaka nembiak ke apin ditutus tauka disunat.

Baka manuk ditutu kerengit nya mandangka gamal orang ke seruran chayur-chayur enda bepengerai.

Baka manuk ke disipat Bugau nya mensia ke ngenyit ligau-ligau deka luput.

Baka manuk bepantuk diri sekerungan, baka babi bepangki diri sekaban nya madahka oran ke jadi diri serumah tauka belaya diri sama diri.

Baka manuk agi sekerungan, baka babi agi sepencharan nya mandangka orang ke agi bekaban nyempil, ukai orang bukai.

Manuk sipat Bugau nya manuk ke sakit bebelit batang rekung.

Baru mirah dunggul baka manuk nya jaku dikena madahka orang ke berupai lantang agi dalam pengidup.

Bulu manuk nya sebansa kayu  temuda ti enda tentu besai. Kenu ke pengarap Iban, kayu tu mali diguna kena ramu langkau enggaika manuk diempa jelu.

Tinduk manuk nya  tinduk mata pejam tang pending seruran ninga.

Tuah manuk nyerupa di kaki; tuah mensia sapa mereti nya nerangka nadai mensia ke ulih madahka  tuah enggau nasit siku-siku orang nyentuk ke pemati iya.

Tugui manuk nya sebengkah ari bansa penyakit kulit ti besemak enggau kurap.

Jaku dalam ke penudi bendar dalam kenan tu nya ukai ketegal siku manuk enda engkukuk hari enda tawas. Jaku dalam tu nerangka reti raban siku tubuh enda patut nyadika tegal pengawa enda nyadi dikereja.

Enggau penerang pasal manuk nya tadi, bala nembiak redak tau bulih penemu baru senentang pemesai reti manuk dalam daya idup raban bansa Iban. Nya alai pesan ari pengarang Tempalai Kenang, anang enda ingat ke bansa diri baka sempama jaku tuai manuk taja iya dipeda lama repuk, tang bisi maya iya tau engkukuk ngenjun gelanggang.