Nepan Naga 2012

Deka nemu nama utai ke bisi dalam taun 2012? Sapa deka menang pengawa bepilih Amerika Syarikat? Katika amat Eurozone deka meletup? Enti deka nemu semua tu minta tukang Feng Shui  meragamka semua utai tu dalam taun Naga 2012.

Lebuh komuniti China di serata dunya benung ngelaluka penatai taun baru, raban bala astrologers enggau geomancers benung ngeringakka diri melabaka naga dekat datai enggau bah, tanah tusur sereta utai ke nyadi bukai kelimpah ari penanggul mata kelebih agi ba menua Europa.

Nitihka peragam sida,, ekonomi dunya taun naga tu enda stabil ketegal ekonomi ba menua Europa enggau Amerika Syarikat ke agi napi penanggul empas ari resesyen, pia ku master feng shui Anthony Cheng.

Astrologer selebriti Peter So madahka Amerika Syarikat deka besedia enggau berita manah ujung taun tu tang enda ba Europa. ‘Ekonomi Europa enda berubah manah lalu deka napi penanggul ke kala ditapi sida dalam taun2014. Tang dipelabaka aku ekonomi US nyangka ulih manah.’

Enti nuan besedia nepan naga sereta beranakka puku, Rusia enggau menua China nya manah alai bedagang. Kedua-dua market tu deka nunjukka prestasi ti manah jemah ila, pia ku Cheng.

Taja pia, anang enda besediaka utai ngenyit ke tau nyadi kelebih agi baka ba menua China, maya nya ila Parti Komunis deka ngaturka kongres ke 18 parti sida dikena milihka raban temuai menua ke baru.

‘Dalam renggat kedua setengah taun tu ila skandal bekaul enggau pengawa makai suap deka mayuh agi dibantaika di China,’ pia ku iya. ‘Dipelabaka aku mega pemesai menua Hong Kong enggau tanah besai China deka mayuh agi diasuh badu gawa.’ 

Mayuh bansa orang China arapka peragam ke baka tu lalu deka ngaturka pengidup sida belalauka feng shui tu. Feng shui nya bidang pelajar lama pasal penguat chi tauka pengering pengidup ke endang sebagi ari pengidup besehari-sehari dalam dunya orang China.

Nitihka dipelabaka mega politik Amerika nyangka balat agi beati-ati. Taja pia So enggai madahka sapa ke deka menang dalam pengawa bepilih Amerika nya.

‘Bisi maya nasit bepanggai ba menua nya ukai ba presiden,’ pia ku iya. ‘Ngagai menua Amerika Syarikat, sida deka bulih nasit ti manah dalam taun tu enda milih sapa ke menang dipilih sida.’

Lima elemen China dalam penemu feng shui nya nyengkaum kayu, api, tanah besi enggau ai. Taun 2012 tu dikumbai ngembuan elemen ai. Tu reti nya pengeraja enggau mayuh macham utai bisi dikeulihka tang beserimbai enggau nya mega penusah baka bah besai, tanah tusur enggau penanggul bebadi bukai bela deka nyadi.

Astrologer ke tebilang ari Hong Kong, Allan Yeo madahka kitai patut besedia napi penusah ribut biau balai enggau bah besai. ‘Mayuh penusah bah besai deka nyadi ba endur di Thailand enggau timur laut China,’ ku iya.

‘Indonesia, Pakistan, India enggau sekeda endur di China baka Sichuan, Yunnan enggau Guizhou deka ngasaika penanggul tu. Endur tu deka napi penusah tanah berenyang,’ ku iya.

Lebuh orang China kelia benung ngemansangka sistem astrology enggau geomancy sida, orang bukai ba menua Pacific mega ngiga chara dikena sida meda sereta melabaka utai ti deka nyadi jemah ila.

Orang Mayan ari selatan Amerika kemaya hari tu madahka dalam kelinda sida, dunya deka kiamat ba pengujung bulan December taun tu.

So baka orang sejarawan ke enda arapka penemu orang Mayan nya mega madahka nadai ibuh takutka utai ke dipelabaka orang Mayan nya. - AFP