Anang nebah lagu Iban ke niru lagu bukai

Ninting hari kenyau ari taun enam puluh nyentuk ke sehari tu lebuh lagu Iban udah bisi direkodka, kitai endang ninga bisi lagu Iban nya ditiru ukai semina ari sukut rentak enggau tiun lagu tang bisi mega sekeda nya mega ngalihka leka lagu bukai ngagai lagu Iban.

Enti dulu suba, kelia menya nyangka bedau mayuh orang Iban ke tau diaangkatka nyadai komposer tauka penengkebang lagu. Mayuh Penyanyi maya nya suba ngaga leka lagu kediri empu tauka ngalihka leka lagu bansa bukai ti tebilang kelebih agi baka lagu Englis, Melayu enggau Hindustan. Kebuah pia laban penemu enggau pengelandik nengkebang lagu endang bedau chukup tauka nadai. Tang laban dibai pengeran ati ke deka merindang mensia mayuh enggau lagu Iban, dia sida sanggup ngalih sereta niru lagu bansa bukai.

Niru enggau ngalih tu ba penemu aku dua pekara. Niru nya ngambi enggau penuh lagu asal ngagai lagu Iban. Tiun enggau leka lagu nya bela diambi terus, semina disada dalam jaku Iban. Ngalih tu kira bisi manah mimit ari niru laban tiun aja ke ditunda tang leka tauka lirik lagu diubah nitihka penengkebang tauka penyanyi lagu nya.

Bedau lama ti udah bisi berita ti dipansutka Utusan Borneo(19 Feb.2012) ke madahka Chairman Serakup Penyanyi Iban Sarawak (SPIS), Hendrew Uka Alo bisi mantaika penemu minta semua lagu Iban ke niru lagu bukai enda ditebah di stesyen radio ba nengeri tu. Pelabaka aku radio ke ku iya nya tentu radio bagi Iban. 

Ba penemu iya, atur tu patut dipejalaika ngambika ulih ngurangka ulah ke enda manah sekeda penengkebang lagu ke semuti deka begigaka untung aja. Niru lagu bansa bukai enda tentu begunaka penemu dalam sereta estetik laban leka enggau tiun lagu diambi terus. 

Nya alai, raban penabur ba radio ti kemaya hari tu dikumbai deejay ke sayau ke estetika lagu Iban patut enda mutar tauka bemainka lagu nya ba radio sida. Sida mega patut ngembuan tanggung pengawa ngangkatka lagu Iban ke tulin ari sukut leka enggau tiun lagu. Nya baru lagu enggau jaku Iban bisi dibasaka ukai semina orang bansa Iban tang mega bansa bukai.

Penemu Hendrew Uka Alo tu dikenataika dikena iya nyukung penemu ti dipansutka Embat La La iya nya siku penyanyi Iban ke tebilang sereta pemesai Panggau Buluh Pengerindu, iya nya kompeni rekod lagu Iban. Embat bisi ngenataika ati ti enda lantang meda ulah sekeda penengkebang lagu ke rindu niru lagu orang bukai.

Penengkebang lagu Iban patut ngembuan tanggung pengawa sereta inisiatif dikena ngemansangka industri muzik Iban. Lagu ti tulin nya ukai semina ari suku tiun sereta rentak tang mega nyengkaum leka lagu nya. Leka lagu ti manah ulih ngangkatka jaku Iban ngagai tikas ti tinggi laban iya tentu ngundan nilai estetik baka leka main ke dikembuan bansa Iban nyentuk ke sehari tu.

Penyanyi patut mega ngembuan tanggung pengawa enda sengapa nyada lagu ti digaga kompeni ke alai sida gawa ketegal deka ngulihka duit enggau jampat. 

Raban peninga kemaya hari tu mega patut tuai agi penemu sereta enda mudah rindu ke lagu ti ditiru ari lagu bukai. Enti raban peninga ulih nagang diri ari meli, ninga sereta belagu lagu ke tiru nya udah tentu lagu nya deka enda lagu dijual di pasar. Pia mega ngagai sida ke gawa ba radio baka bala tuai  bagi radio Iban patut merambuka atur nagang lagu ti tiru nya dimainka ba radio.

Dalih ti madahka penengkebang lagu Iban nadai nemu ngaga lagu tulin nya ukai dalih ti ulih diterima kemaya hari tu. Diatu mayuh amai sekula muzik ke ukai semina ngajar orang bemain muzik tang mega ngajar orang macha skor lagu. Ari ke ngembuan pengelandik macha skor lagu, penengkebang lagu ulih nengkebang lagu kediri empu.

Penulis leka lagu mega patut belajarka jaku Iban baik nya nengah chara formal tauka enda formal. Sida patut ngembuan penemu sistem jaku Iban ti mungkur ukai semina atur sepil tang mega jalai jaku ti betul. Enti sida ngembuan penemu dalam jaku Iban, sida enda mudah ngaga leka jaku ti salah ari sukut atur sepil enggau jalai jaku. Sekeda ari penyalah nya mega nyengkaum ngena leka jaku Melayu dalam leka lagu taja pan bisi leka jaku nya dalam jaku Iban. Kelalu mayuh ngena leka jaku bansa bukai ukai lisin dikena kitai ngemanahka lagu Iban. Leka jaku baka paling, penting, happy enggau ti bukai nya sekeda leka jaku ke bisi dalam leka lagu Iban.

Kelimpah ari nya, penulis leka lagu Iban mega patut nemu budaya Iban laban dalam leka lagu kekadang bisi pekara nya ukai adat asal orang Iban. Tu enti salah kena tau ngemaruhka status bansa Iban ba mata orang bukai. Ambika chunto orang indu ke belagu madahka, betembawaika orang bujang nya ukai budaya Iban. Iya mega ngemaruhka status indu ke nyadaka leka lagu nya nyengkaum raban bansa Iban ti diarika iya. Siti agi chunto nya besumpah. Dalam budaya Iban balat agi pengawa nyumpah nya ke bendar nganu orang, enti enda ngasuh orang nya mati, tau mega ngasuh orang nya sakit. Dalam lagu ke nyebut aku besumpah deka ngambi nuan pulai baru ; leka jaku besumpah nya udah salah jalai ngena. 

Nya alai, tanggung pengawa ngangkatka lagu enggau industri muzik Iban nya endang berat sereta meruan minta diperatika semua ke bisi kaul baka raban peninga, pemain muzik, penyanyi, gerempung penyanyi enggau sida ke gawa bemainka lagu Iban ba radio. Lagu Iban ti manah ukai semina didinga ari rentak enggau tiun lagu tang mega ari sukut leka jaku ti dikena dalam lagu nya. Pengawa ke ngangkat tikas pemanah lagu Iban patut dipejalaika ari diatu laban kenu ku sempama jaku tuai; buah ubi laun dikali lunggar taun, buah empasa laun diempa chelum ba pun.