Lansar tau nyadi lubuk, lubuk tau nyadi lansar

Pekara tu nyadi ba genturung pendiau tauka Kampung Lyndon Ben Johnson (LBJ), Labu Seremban. Sida ke diau ba genturung tu nya sida ke kala ngemeran pengawa betanamka sawit pegai FELDA. 

Penusah sida diatu iya nya nyau enda tebayarka bil ai enggau elektrik ke kira-kira RM500 sebulan kelimpah ari nya chukai tanah ti lebih ari RM1,000. Nya entara faktor sekeda bala ke diau ba Kampung Lyndon Ben Johnson (LBJ), Labu, ninggalka rumah banglo tiga ringkat di genturung nya ke kediatu semina nyadi pengingat madahka sida nya kala kaya suba.

Nitihka pansik bisi 10 rumah dilaka enda diintu  lalu 20 buah ke bukai baru setengah siap tang nyau dilamun babas.

Tuai Umno pampang Labu Jaya ke suba, Norman Mohd Nor, 66, madahka penyinu ati diri lebuh ke ngenangka pekara nya laban 504 iku sida nya endang orang dikelala iya.

“Hal tu nyadi laban sida nya nyau ‘amu mata’ lebuh dibayar entara RM1.3 ngagai RM1.8 juta, bepanggai ba pemesai tanah. Iya ke balat ngenyinuka ati nya bisi sekeda ari sida nya gawa nyadi jaga dikena nampung pengidup lalu bisi nya diau dalam petang ba rumah ke besai laban ke nadai duit dikena mayar bil elektrik,” pia ku iya.

Nitihka Norman, lebuh sida bulih beliung enda ngambuh, nemu peredah enda ningkuh dalam taun 1997, sida ba genturung pendiau LBJ baka ke nerima limpah emas ketegal F1 Sepang ke bisi digaga nya semina lima kilometer ari sida lalu pusat perintah menua, Putrajaya nya kira-kira 32 kilometer ngujungka tanah sida diperebutka orang.

Ku iya, faktor palan nya ke ngasuh tempat sida balat bendar maju dikena ngemansangka projek komersial baka industri tauka genturung rumah.

“Kami nyual tanah tang pengujung iya bisi ke nyadi orang miskin  dalam timpuh beberapa taun laban ke rua enggau duit pampas, nyengkaum pengawa beranakka puku dalam skim jampat kaya,” ku iya.

Ku iya, lebuh sida nerima duit ari asil bejualka tanah, maya nya rami amat laban beserimbai enggau nya mega bisi mayuh pengawa mandang sereta ngelakuka kerita enggau retatanah diatur di Balai Orang Mayuh; nya enda nyengkaum brosur ke disadung ari rumah ke rumah,” ku iya. Nya alai dalam sempama jaku Iban, pengidup sida nya tau disempamaka baka lansar ke bisi maya iya tau nyadi lubuk lalu bisi ga maya lubuk tau nyadi lansar. - Dibali ari Harian Metro