KUCHING: Raban pemuzik Sarawak
kelebih agi ari bansa Dayak enda patut malu ngemasukka diri ba pekit mandangka
pengelandik diri nengah program ‘Realiti TV’.
Siku komposer ke mega orang ke
landik ba pengerembai muzik Dayak, Isa Lee alit ati ketegal enda mayuh pengari
ari raban bansa Dayak ngemasukka diri ba pekit ke baka nya.
Iya madahka nengeri Sabah udah
ngeluarka mayuh artis tebilang ari program Realiti TV lalu nya mai pemanah
ngagai raban bansa sida iya empu sereta nengeri Sabah.
“Enti kitai deka nyadi siku
artis, kitai patut berani nguji pengelandik diri ke bisi diatur ba program
‘Realiti TV’. Berani sereta pechaya ke diri ngembuan tikas pengelandik ke
sebaka enggau orang bukai.
“Kitai mega patut meransang raban
nembiak bepekit ba program nya. Ba industri muzik Dayak, aku meransang sida iya
angkat lalu ngayanka pengelandik diri laban tu mih semina siti chara kitai ulih
mandangka pengelebih diri ba muzik,”ku iya.
Ku iya nambah, enda ibuh kitai
teulihka lumur satu ba sebarang pekit enti deka nyadi artis popular, iya ke
pemadu beguna siku artis patut ngembuan kualiti, pengelandik nitihka gaya
diri empu, pintar sereta berani,”ku iya.
Iya madahka program Realiti TV
baka ke American Idol, The Voice, Vokal Bukan Sekadar Rupa sereta Mentor
mandangka penyigat tauka pemajik gamal ukai nyadi penentu siku-siku orang nyadi
artis popular.
“Aku agi ingat jaku Christina
Aguilera, hakim ba program The Voice, ke madahka diri deka ngiga serak
nyawa ke manah ke enda kala didinga ba industri muzik.
“Ramlah Ram ari Mentor mega
madahka iya enda ngira pemanah gamal. Berindik ari nya iya ngelalau raban orang
ke ngembuan peneka nyadi artis popular mandangka pengelebih diri enggau ati ti
berani. Ayanka pengelandik diri ke diberi Tuhan ngagai serata dunya laban semua
mensia bela ngembuan peluang ke sama rata,”ku iya. – Dibali ari Utusan Borneo
Tiada ulasan:
Catat Ulasan