Chap Goh Mei

CHAP GOH MEI, dalam jaku Hokkien nya reti iya malam ke “15”, tanda pengabis tauka pengujung pengerami Taun Baru China. Asal penatai pengerami tu nadai udah ditemu tang mayuh cherita legenda pasal pengerami Chap Goh Mei tu.

Kenu ku cherita legenda, bisi burung ke manah pendiau terebai ari sebayan ke dunya tu tang dibunuh bala orang ba sebuah genturung pendiau. Burung nya ke bendar diempu Raja Jade. Iya ringat amat lebuh ke ninga burung nya udah mati. Nya alai ke 15 hari bulan, Raja Jade nya tadi merambu deka nganjung ribut api ngagai menua nya tadi. Tang anak raja ke benama Zhi Nu berasai sinu ke bala ba menua nya. Iya lalu meri jaku tangkan ngagai sida empu menua nya madahka dunya deka anchor ketegal Raja Jade udah muras. Bala orang menua nya balat tusah ati lebuh ke ninga jaku raja nya. 

Enda mukai-mukai, bisi siku orang tuai ke bepenemu datai ari menua bukai. Iya lalu mansutka penemu ngasuh tiap-tiap pintu bilik sida dia ngantung lampu berias (lantern) bechura mirah ba rumah sida lalu masang api enggau merchun kenaka 14, 15 enggau 16 hari bulan. 

Kenaka 15 haribulan bala soldadu ari sebayan pan datai deka nunu menua sida nya; tang sida tekenyit meda menua nya endang udah angus. Sida lalu mulaika diri lalu madah ngagai Raja Jade senentang pekara nya.

Kenyau ari sehari nya bala China Hokkien lalu ngerami ninting taun penusah nya kena 15 hari bulan sepengudah taun baru. Sida lalu mai lampu berias sereta bemain merchun.

Bisi mega sekeda nganggap Chap Goh Mei nya hari Valentine orang China laban semina maya Chap Goh Mei tu bala indu dara ulih begari manah, nganta sereta pansut ke luar ari rumah sama-sama enggau orang ngintu pengerami ngiga orang bujang ngambika ulih nanggam pengerindu. Taja pia, sida tu mesti bisi diuluka orang ke tuai; reti nya enda tau pansut kediri. 

Maya tu mih sida ke bujang nguji engkila bala indu dara tu. Sida ke indu dara mega ngagai kuil lalu besembiang ngarapka bulih laki. Orang ke tukang nipak orang indu enggau lelaki (matchmakers) mega ngambi peluang tu nerima orang ke ngiga tipak jadi melaki bini.

Siti agi pengawa dikemeranka orang indu dara biak kelia iya nya nikau buah limau ke sungai tauka danau. Kenu ku sida, lelaki ke ngambi buah limau nya mih deka nyadi laki sida jemah ila. Buah limau Mandarin nya tanda umur orang indu dara patut belaki. Adat tu mengkang dikemeranka bansa China nyentuk ke sehari tu.

Kemaya hari tu, orang Malaysia deka begelumu enggau kaban belayan tauka pangan diri masang lampu berias sereta sama-sama ngeramika hari nya.  Orang indu ke patut belaki deka nulis nama sereta lumur kuntek sida ba buah limau Mandarin. Udah nya buah nya tadi lalu ditikau ke dalam danau tauka pegung. Orang bujang nganti ngena jarin dikena sida ngauk buah limau ke dibuai bala indu dara.

Kemaya hari tu mega sida lelaki enggau indu ke bedau beruang bilik bela nulis nama ba buah limau sereta nikau buah dikena ngeramika Chap Goh Mei. Bisi orang nulis jaku pesan ngarapka diri betuah lalu bisi mega semina ngarapka ulih betemu enggau orang ke deka ati. Ngagai sekeda bala nembiak redak, tu mih chara dikena nutupka pengerami taun baru China.

Bisi mega sekeda bebuti madahka udah Chap Goh Mei nya, nadai agi hari ke patut dikena ngumpul tauka nerima ang pow. Tu mih hari ke penudi nerima karung mirah ari orang ke tuai.

Adat bebuaika limau sereta ngarapka bulih laki kemaya hari tu nyau majak nyadi siti chara merindang pangan diri ukai agi baka ke adat asal kelia. Mayuh nembiak rebak baru enda tentu arapka pekara baka tu agi. Taja pia, bala nembiak China ngambi peluang tu begelumu ba tebing ai (waterfronts) baka ba lempa Klang sambil ngeramika hari Chap Goh Mei.