Asal Penatai Nasi Kandar

NASI KANDAR berasal ari Pulau Pinang. Dulu menya pemeli nasi kandar iya nya bala pengereja pengawa tauka bala kuli ba palan penyangkai kapal Pulau Pinang. Nasi kandar nya pemakai disumai ke komuniti pengeraja pengawa. Asi iya mayuh tang lauk iya semina ikan kari tau ikan guring enggau kachang lendir.

Menu nya disediaka baka nya laban sida ke gawa baka ke nyadi pekereja gudang penyangkai kapal begunaka pengering tulang dikena sida munggah barang ari kapal. Baka nya mega sida ke nyadi tukang narit becha.

Penyual nasi kandar deka ngesan periuk-genuk asi enggau lauk ke tebing palan penyangkai kapal maya tumu pagi laban bejualka nasi kandar. Nya mih kebuah mayuh orang Pulau Pinang makai nasi kandar maya tumu pagi ukai tengah hari tauka malam - sama baka orang Batu Pahat ke makai sate tumu pagi.

Pengawa makai asi kandar tu endang lama udah dikemeran sereta nyadika tradisyen peturun sida kenyau ari aki ini kelia ke ngentapka pendiau diri  di Pulau Pinang; iya nya  ari jeman sebedau perang enggau sebedau merdeka. Sampai ke diatu,  peranak menua ke mendam di Pulau Pinang semina makai nasi kandar maya tumu pagi; iya nya kira-kira  jam 7.30 pagi.

Taja pia, kemaya hari tu nasi kandar ukai agi pemakai ke diempa komuniti pengereja pengawa tauka dalam jaku Melayu masyarakat marhaen. Iya nyau udah nyadi pemakai semua ringkat lapis komuniti lalu kadang-kadang iya mega nyau nyadika pemakai sida ke bisi utai tauka orang kaya laban lauk nasi kandar udah berubah menu. Diatu lauk nasi kandar nyau bisi menu manuk, undang besai, telu, ikan enggau suntung. Nya alai rega nasi kandar kemaya hari tu berega RM15 siti pala.

Taja pia bisi orang saru penemu nyangka kari pala ikan sebagi ari lauk ke diidang enggau nasi kandar. Nasi kandar asal nadai ngundan lauk pala ikan. Sida ke nyual kari pala ikan  nya ari menu nasi mamak ukai nasi kandar. Tu mih ke nyadi di Kuala Lumpur. Bala pemeli suah ngumbai kari pala ikan nya sebagi ari lauk nasi kandar. Di Pulau Pinang, nasi kandar original endang nadai pala ikan mirah ti besai amat. Enti iya pala ikan duai enda ga ngawa.

Nya alai enti ke Pulau Pinang lalu deka makai nasi kandar original, ingat pesan penulis. Anang sebarang embal aja. Tukuh pendiau nasi kandar nya baka ke dirintai ditu;

(i) nasi semina chukup-chukup sepinggai aja enda mayuh enda mega mimit;

(ii) kuah mesti dichampur tauka digulai dientara kari ikan, dagin, undang enggau suntung;

(iii) iya ke manah nya lauk nasi kandar nya ikan kari tauka guring (duai) sama enggau dua kerat dagin kari, telu rebus tauka;

(iv) pilih entara suntung tauka telu rebus enggau dagin kari tauka ikan duai kari sereta dua batang kachang lendir rebus.

Resia makai nasi kandar ke mesti ditemu kitai nya enti makai anang nambah lalu makai ngena jari ukai ngena sudu.

Kebuah enda tau nambah nya nangika bisi asai deka mutah lalu enti pia tentu nyau nadai ati agi deka makai. Dilalau makai ngena jari ngambika aroma unik utai ti dichampur ba nasi kandar deka terus lekat ba tapak jari datai ke lemai. .