Pengerangka Orang Asia

Pakar pemansik marin Gerempung Bansa-Bansa Besatu (PBB) bisi nyimpulka penemu madahka bisi kaul chara makai orang kaya di Asia enggau pengurang stok ikan dunya. 

Tuai Program Rampa Menua, Jacqueline Alder, madahka pemansang kuasa meli komuniti  Asia sereta pengerindu sida makai ikan ngasuh rega iya mar nyadika kebuah penanggul nya kelimpah ari penanggul mayuh  habitat ikan ti rusak ketegal pengamah enggau pengubah gaya hari dunya.

Iya madahka 32 peratus stok ikan dunya kemaya hari tu napi penanggul kelalu  tuai lalu kelimpah ari nya mega  setengah ari kampung ke bisi kayu bakau di dunya sereta satu perlima palan terumbu karang ti udah jai.

“Mayuh orang diatu nyau nadai agi makai ikan pusu ketegal sida udah bisi duit makai ikan ti nyamai agi baka  kerapu, empurau, patin  sereta ikan bukai ti mar, setipak enggau pengaya sida," ku iya.

Alder ti mega  nyadi Tuai Opis Marin, Tebing tasik enggau Sungai PBB (UNEP) bisi  di Manila laban ngulu aum mutarka penanggul bekaul enggau ikan. Aum nya digulu  70 pemesai enggau pakar dalam bidang marin.

Iya mega madahka, penemu ti dalam senentang pemesai guna  ikan ba komuniti  Asia nyadi faktor ti ngasuh  pengawa bepintaka  ikan nya majak tinggi lalu ngujungka orang berikan nambahka asil sida taja pan chara ke dikena sida nangkap ikan nya kekadang salah ari sukut undang-undang.

Ambika  chunto, ku iya bisi orang berikan ke sanggup nubai ikan kerapu ngena cyanide laban ti deka ngulihka  ikan idup-idup taja pan chara nya tau munuh ikan bukai.

Nitihka iya, perintah patut merambuka chara nangkap  ikan ngena kereban ti kurang ngerusakka terumbu karang. Pengawa ngaturka habitat patut dikemaska agi  kelimpah ari nambahka penyampau  taman tasik.
Iya madahka ikan  ngeluarka  20 peratus  guna protin ngagai orang ke diau ba serata dunya lalu  180 juta agi  nya bisi kaul terus  dalam industri berikan. 

Besenutuk enggau nya mega, Penyelaras UNEP, Vincent Sweeney, ngaku madahka  90 peratus utai kamah ari menua ke baru  ngangkatka diri mansang enda diaturka  enggau betul tang  dialirka terus  baiknya   ke sungai, pegung enggau tasik. Tu ke ngasuh penusah  nadai ai beresi  nyadi serius. 

Ku iya, kebuah pengamah bukai nya nyadi laban teda utai kamah ti dibuai baka nitrogen enggau phosphorous ari industri baja enggau ari mayuh macham sabun penchuchi. 

Nitihka penemu iya, teda utai nya ke begelumu dalam ai ngasuh sebansa utai tumbuh dalam ai baka rumput ai bekunsi  oksigen enggau batu karang sereta utai idup marin ti bukai. 

Kelimpah ari nya, Tuai Unit Terumbu Karang UNEP, Jerker Tamelander, mega  madahka , tiap-tiap satu kilometer besegi batu karang ke manah ulih ngasilka kira-kira 35 tan ikan setaun tang ketegal mayuh kampung  paya bakau udah dirumpang ngujungka asil ari nangkap ikan nya kusut 67 tan ke tiap-tiap pemesai ti sama. 

Iya mega madahka dagang ikan global kemaya hari tu  dianggarkan datai ngagai  AS$3 trilion setaun tauka ngarika  lima peratus ekonomi dunya lalu nilai dagang dikena mutarka pengamah enggau pengubah gaya hari dianggarka  AS$22 trillion setaun. 

“Kitai benung napi pengelenyau   satu perlima terumbu karang dunya  lalu 60 peratus ari nya rusak ketegal  penyilap kitai empu. Kelimpah ari nya  faktor ubah tikas pengangat enggau penyelap global ngujung penanggul nyadi balat agi ari selama," ku iya. 

Tamelander madahka penanggul  ekosistem ulih diputarka enti  orangke beranakka pugu ba industri sanggup ngubah kesemua atur pengawa nangkap ikan nyengkaum chara ke enda ngerusakka rampa menua. 

“Jampat agi  kitai mutarka pekara tu,  mudah agi penanggul tu diputarka  laban enti  laun iya tau ngujungka penusah nya pedis agi diputarka," ku iya. - AP/AFP