Agi mayuh pengajar bedau apal atur sepil jaku Iban di sekula

Gambar pengias

Aku berasai benasit laban bisi diberi peluang Opis Pelajar meri licha senentang sekeda pekara ti bekaul enggau pengawa belajar enggau ngajar jaku Iban di sekula. Peluang ti baka nya mai aku matau sekeda menua baka Kuching, Betong, Saratok enggau Sibu laban ke diasuh ngenataika sekeda pekara. Endang ke baka selama ti tak ninga licha tauka penerang aja ari pengelicha tentu bendar tau ngasuh bala peninga nya lelanuk ngantuk baka orang ke nginti ikan. Nya alai dalam ke meri licha kitai mega bisi ngasuh bala pengajar masuk dalam raban lalu bebengkel dikena sida nelebaka diri enggau pekara ti udah diterangka.

Utai ke deka dikenangka aku nya iya nya senentang pekara ke diasil ari bengkel nya. Endang ke baka selama semua utai nya diasil ngena chara betulis lalu dikenataika ba mua mayuh. Tang utai ti ngenyinuka ati nya agi mayuh bala pengajar ke mantaika asil pengawa sida nengah chara betulis agi bedau ulih ngapal atur sepil ti dikena ba sekula. 

Sebedau 2007, atur sepil ke dikena ba sekula nya ke dikeluarka Yayasan Kebudayaan Dayak. Tang dalam taun 2007, Opis Menteri Pelajar nengah Bahagian Pembangunan Kurikulum (BPK) udah ngemanahka agi sistem sepil ke udah dikeluarka Yayasan Kebudayaan Dayak. Nya alai enggau kerejasama ari Opis Sapit Kepala Menteri BPK udah ngeluarka siti bup iya nya Sistem Jaku Iban di Sekula. Dalam bup nya, atur sepil baru dikena ba semula sekula ke bisi ngajar mata pelajar jaku Iban. Bup nya disadung ngagai semua sekula ke bisi mata pelajar jaku Iban.

Taja pan kus senentang atur sepil  bisi diatur tang penerang senentang pekara nya enda ulih diberi laban ke serekat ari sukut jam sereta suntuk ari segi belanja. Nya alai, semua pengajar enda ngira pengelama udah ngajar jaku Iban dipinta belajar sereta apal enggau atur sepil nya.

Tang lebuh ke bisi peluang meda utai ke ditulis sekeda raban pengajar, dia sekeda ari sida tu diperatika agi ngemeranka atur sepil lama. Tuai agi umur pengajar nya tuai agi sistem sepil ke dikena iya. Reti nya sida ke nyau nganti bulan deka pinchin agi ngena sepil sebedau atur sepil ke dikeluarka Yayasan Kebudayaan Dayak! 

Empas ari ke enda ngena atur sepil ke sama tauka standard ngasuh bala nembiak nyepil ngena sepil ke enda sama ari sebuah sekula ngagai sekula ke bukai. Tu balat ditemu lebuh sida ngasilka karang dalam peresa tikas PMR  enggau SPM. Pekara berengkah nyadi penanggul lebuh nembiak nya agi belajar ba sekula primari. Penanggul sida nya lalu dibai ngagai sekula sekondari. Enti pengajar ba sekula sekondari nadai inisiatif deka ngemetulka penyalah sepil nya mih ke ngujung nembiak nya terus nyepil leka jaku ngena sepil ke salah.

Kebuah pengajar ke enda ngemetulka penyalah sepil nembiak nyangka bepun ari diri empu ke endang bedau apal atur sepil nya. Bisi mega sekeda pengajar endang enda tentu ibuhka penyalah sepil laban bagi sida nya pekara mit. Pekara ke mit nya pan enti enda dikemetul tau nyadika peneleba nembiak ngaga utai ke salah kelebih agi dalam pengawa nulis karang. Enti nulis dalam jaku Melayu tauka English tentu kitai enggau naka ulih nyepil enggau betul laban malu ke leka jaku ke dikena kitai nya salah sepil.

Kelimpah ari bala pengajar ke endang pengawa ngajar jaku Iban ba sekula, aku mega bisi meda raban bala bukai sekeda pengajar lalu bisi nya ukai pengajar ngena jaku Iban dalam blog tauka majalah, ambika chunto baka Majalah Pegari enggau surat berita Utusan Borneo. Dia aku meratika chara sida nyepil nya ngena atur sepil ke dikena di sekula ke dikeluarka BPK. Aku berasai temegah enggau sida tu laban ulih ngena sepil ke dikena disekula taja pan sida nadai dipejal ngena sistem sepil ke dikena di sekula. 

Sistem sepil ke dikena ba luar kandang sekula endang mayuh macham, sepeneka kitai milih. Enti kitai meda ba internet baka ba facebook nya bisi ke ngena sistem sepil ke dikena lebuh ngena pesan jaku pandak ba telefon binching baka leka jaku ngntk (ngantuk), tndk (tinduk) tai (utai) etb . Ba sekula, kitai endang ngajar nembiak ngena atur sepil ke betul laban nya pengawa belajar chara formal. Pia mega kitai ngarapka udah sida pansut ari sekula jemah ila sida ulih ngena atur sepil ke sama enda milih dini-dini endur baik di Rejang tauka di Lundu.

Taja pia, bisi sekeda pengajar ke mantah chara atur sepil ke dikena kemaya hari tu, iya nya ke dikeluarka BPK taun 2007. Endang amat bisi seleka dua leka jaku ke bisi besibil chara nyepil enti bepelesarka teori linguistik tang nya ukai ke dalih pengajar enggau ngajar ngena atur sepil ke udah diputuska dikena ba sekula. Sekeda sepil nya ukai iya salah tang enda nemban ari sukut teori. Seagi-agi bup nya bedau dituliska baru sereta dikemanahka agi seagi nya mih bala pengajar ngena atur sepil nya. Seagi-agi kitai nyadi pengajar kitai endang enda tau enda ngena atur nya laban nya mih atur perintah; enda nitih reti nya kitai nya ngelaban atur ke alai kitai gawa.

Nya alai, aku ngembuan pengarap ti besai ngagai pengajar ulih belajar sereta apal enggau atur sepil ke dikena di sekula kemaya hari tu laban iya meri empas ti positif enti semua pengajar ke ngajar jaku Iban ngena atur sepil ke sama ba semua sekula; munyi ku orang tuai enti deka alah enda enti enggai bisi tau mih nadai. Nya alai sebedau nembiak kitai ngemetul sepil ke dikena kitai dulu kitai belajar sepil ke betul.