Gagasan Dayak Iban Bersatu (GAIU) Komuniti Iban Johor ngaga ripot polis

Tu berita ke diambi sereta dibali aku ari surat berita Bernama. Berita tu madahka Komuniti Iban di Johor bisi ngaga ripot polis bekaul enggau artikel ti ditulis dalam celak ti baru ”Asian Beacon”, sebuah majalah Kristian entara denominsyen ari Kuala Lumpur, ke meri penerang ti enda manah senentang raban bansa Iban di Sarawak.

Gagasan Dayak Iban Bersatu (GAIU) Johor meratuka isi berita artikel “Of Skulls and Sago Worms” ba lambar 15 Vol 44 Februari-Mac nya balat ngemaruhka bansa Iban. GAIU tu sebuah gerempung komuniti Sarawak ti ngembuan tanggung pengawa ngerapitka kaul rayat Sarawak kelebih agi sida ke ari raban bansa Iban sereta ngembuan tuju ngulihka komuniti nya ulih besemekih ari sukut ekonomi, sosial budaya engga pelajar.

Presiden gerempung nya, Sai Malaka madahka gerempung enda lantang ati laban agi bisi penuli ke enda sensitif ngagai sensitiviti komuniti raban bansa di menua tu.

"Kami ngaga ripot tu ngambika sida ke bisi kuasa ulih betungkapka pekara tu sereta ngeletakka ukum ti patut ngagai penulis sereta pengeluar majalah tu lalu ngambika nadai agi orang deka nandu ulah ti baka tu ke balat nyima ati komuniti Iban di menua tu,” ku iya.

Artikel nya ti ditulis siku arkitek ari Petaling Jaya, ngenangka sekeda chara pemakai sereta ulah raban bansa Iban.

Sai madahka, utai ke ditulis penulis dalam artikel nya nyangka senentang pengidup raban bansa Iban kelia ke udah jauh bendar berubah kemaya hari tu.

"GAIU balat amat enda nyamai ati lebuh penulis nya menyebut bala indai ngasuh anak indu sida beleman enggau bala lelaki ngambika sida jadi enggau anak sida.

"Pekara tu balat bendar ngemediska ati kami. Dini bisi indai ke deka meda pekara tu nyadi ba anak indu sida,” ku iya.

Raban pengeluar besereta enggau penulis majalah tu udah minta ampun ngagai raban bansa Iban. Jaku minta ampun nya bisi dikeluarka ba website Asian Beacon udah ti nerima jaku pejah ari sekeda bala Iban nengah surat berita tauka media internet. Bala Iban ke bepengarap Kristian mega enggau tu patut nerima jaku sida sereta ngampunka sida kelebih agi maya musin Lent diatu.