Perintah enda nemu enti Hang Tuah amai bisi

Perintah enda tentu ulih madah enggau bendar enti Hang Tuah nya amai bisi tauka nadai, pia ku Datuk Seri Dr. Rais Yatim, menteri Pemadah, Komunikasyen enggau Adat Asal. Iya madahka pekara nya enda tentu ngenyinuka ati enti semak mensia mayuh madahka Hang Tuah enggau bala tawing iya enda disebutka raban penulis sejarah laban iya ukai bujang berani belalauka hari bulan enggau rekod ke bisi.

‘Taja pia, kita mega enda ulih nyebut Hang Tuah nya kala idup tauka enda laban kitai nadai ngembuan rekod enggau evidens.’

Nya kebuah iya dikumbai hero legenda tauka mitos ke mega tau dikumbai heritaj adat asal baka Robin Hood, Maid Marianne, Hang Li Po enggau ke bukai,’ pia ku iya lebuh ke bejaku ba mua mayuh maya bejadika Kolokium Sejarah Malaysia di Universiti Malaysia kena 25 February 2012 (The Star 26.2.2012)

Kelikuh senentang Hang Tuah nya kala idup tauka nadai bepun ari penemu Professor Emeritus Tan Sri Khoo Kay Khim. Iya madahka nadai tetemuka rekod betulis senentang sida Hang Li Po, Hang Tuah enggau Hang Jebat. Iya mega nandu madahka semua cherita nya ke bisi ditulis dalam bup sejarah nya mitos aja.

Dr. Rais lebuh mantaika penemu iya madahka dalam sejarah bisi orang ke dianggap legenda baka King Arthur enggau Hang Tuah. Pekara tu enda patut diseliahka ketegal nadai tanda-tanda fakta emperikal senentang sida nya.

‘Raban sida tu taja pan enda disukung enggau fakta mengkang nyadi sebagi ari heritaj budaya tauka heritaj ke enda nemu pupus,’ku iya.

Di Malaysia enggau Indonesia sama bisi endur ke diberi nama ngangkatka nama Hang Tuah, tang taja pia iya ukai bukti pengamat pengidup orang ke benama Hang Tuah. Ba  Malaysia Jalai Hang Tuah bisi ba Kuala Lumpur, Ipoh, Melaka enggau Johor . Di Indonesia, jalai ke bisi nama nya ba Padang, Medan, Pekan Baru, Sanur enggau Jakarta. Kelimpah ari bisi sebuah universiti ba Indonesia ke diberi nama University of Hang Tuah, Surabaya. Kedua-dua buah menua Malaysia enggau Indonesia bisi kapal soldadu tasik ke diberi nama KD Hang Tuah (Malaysia) enggau KRI Hang Tuah (Indonesia)

Penerang senentang pengamat tauka enda Hang Tuah mayuh amat dipejuraika ba mayuh laman blog. Pemacha semina naip aja leka jaku Hang Tuah lalu pansut mih blog enggau laman web ke nyerita pasal Hang Tuah tu.