Kelia seranta diatu lantang

Pakar sejarah, Prof Emeritius Tan Sri Khoo Kay Kim madahka orang Hainan nya bansa ke seranta ari semua bansa China ke bisi datai ke menua Malaysia. Lebuh sida kitu, sida gawa ba kedai kupi, nyadi kuli enggau gaga nyumai ba rumah orang kaya kelebih agi ba rumah orang Europa. Di menua China orang Hainan ukai asal ari raban kelas ke tinggi, taja pia sida tu kelia bagas gawa sereta tebilang nyadi tauke kedai kupi.

Khoo madahka bansa Hainan tu datai ari pelilih menua bukai di China lalu sida dialek jaku sida mega lain ari jaku cina penatai kelebih agi baka Hokkien. Orang Hokkien enda mereti jaku sida lalu suah nundi sida Hainan. Maya nya suba raban etnik Hokkien nya mayuh ke orang kaya bejalaika dagang inport enggau eksport. Sida diau ba pasar baka ba Klang, Melaka, Port Weld, Teluk Intan, Kota Baru, Kuala Terengganu enggau Singapore.

Nitihka ku Khoo mega, orang Hokkien sanggup enda betampil enggau raban bansa Hainan.

Tang kemaya hari tu sekeda raban etnik Hainan ari serak tubuh kelima ke diau di Malaysia udah jauh bendar nyulut mansang enti dibanding enggau aki ini sida kelia. Mayuh ari sida diatu udah kaya sereta lantang dalam semua pengawa lalu enda agi  bekereja ba pengawa bedagangka pemakai. Orang Hainan nyau enggai meda anak sida merinsa baka sida. Sida deka agi meda bala anak sida gawa nyadi loyar enggau lutur. Tang agi bisi mega anak sida ke ngerembaika bisnis kedai kupi apai sida baka iya ke pegari nama kemaya hari tu iya nya Pak Hainan Kopitiam. Iya udah ngerembaika bisnis kedai kupi ba Alor Setar. Kelimpah ari nya, iya mega ngemeranka bisnis begagaka barang sereta dagang eksport ke Singapore, Thailand, Hong Kong, Taiwan, China, Philippines enggau Canada.

Nya alai munyi ku sempama jaku tuai enti deka alah enda, tang enti enggai bisi tau mih nadai.