Isu penemu sereta penerang ke bebida pasal NCR

SIBU: Penemu sereta penerang ke bebida bekaul enggau Tanah Adat Bansa Asal (NCR) ngepunka penanggul lalu ngujungka iya nyadi isu.

Pekara nya dipadahka aktivis Dr Johnny Kieh ngagai bala panel maya konsultasiyen rama  Inkuari Nasional Tanah Adat Bansa Asal ke diatur SUHAKAM ditu, kemari.

Ku iya enti perintah ulih nerang enggau silik bekaul enggau tanah NCR, pekara tu ulih diseliahka.

“Ba penemu aku NCR tu keterubah dikangau kitai temuda ti udah alai bumai lalu udah nya dikangau jerami enggau penudi damun.

“Udah damun dikumbai kitai pengerang tauka pemakai menua lalu ba pemakai menua tu bisi pulau sereta bisi beberapa buah lebak, nya alai kadang-kadang bisi pendam lama, tembawai lalu utai tu dikumbai aku tanah NCR.

“Taja pan baka nya, laban kitai ke bisi enda sebaka penemu pasal tanah NCR, nyangka bisi sekeda madahka tanah NCR tu semina tanah temuda lalu sida ngambi tanah ke bukai,” pia ku iya nerangka.

Ku iya ketegal tu, orang ke beempu  tanah NCR nya ke bendar ukai semina lenyau tanah tang lenyau alai sida beridup lalu ngujungka pekara tu nyadaka isu alai betalat.

Dr Johnny madahka, iya udah lama mantaika penemu iya ngagai raban ke bekaul senentang tanah NCR tu tang nyau udah betaun lalu apin bisi timbal.

Iya mega madah bela bisi tanggung pengawa ngarika sida ti suntuk penemu lalu ngarika sida numbuhka penemu  kuasa ngagai tanah NCR diri empu.

“Ba sebengkah bup atur, siti ari tuju madahka meri penemu ngagai rayat nya pekara ti patut lalu ukai ngelanggar atur,” ku iya.

Ku iya, enti perintah besepenemu enggau definisi ke dibantai iya, entara bagi sesebengkah tanah NCR mega bepelasarka runding ari sida ke beempu tanah NCR.

Berebak enggau tu mega, Dr Johnny meri dokumen senentang pansik iya ngagai SUHAKAM ngambika nyadi dokumen dikena nyukung penemu ke dibantai iya. (Dibali ari Utusan Borneo)