Tisih STPM ti baru Tisih Belalauka Sekula (PBS)

UBAH baru sistem peresa Sijil Tinggi Pelajaran Malaysia (STPM) dikena napi nembiak lepas  Sijil Pelajaran Malaysia (SPM), meri pengidup baru ngagai  sistem pelajar menua. Tu siti agi transformasyen ke diatur Opis Menteri Pelajar sereta dipejalaika Majlis Peperiksaan Malaysia (MPM).

Nyau udah chukup maya alai sistem ti keterubah iya dipejalaika kenyau ari taun 1982 dikena nganti Sijil Tinggi Persekolahan (STP) ari Higher School Certificate (HSC) diperatika baru ketegal penyampau calon ke ngambi peresa nya nyau majak kurang.

Berengkah ari Pom Enam Baruh sesi pelajar Mei 2012, MPM terus bejalaika Sistem Baru STPM iya nya  sistem modula dikena ngantika sistem terminal sebedau tu.

Enti dibanding enggau sistem terminal, nembiak deka ngambi peresa lepas satu setengah taun belajar. Chara tu ku bala sekeda madahka mar agi laban minda nembiak diuji berengkah ari taun keterubah sesi besekula.

Tang dalam sistem STPM ti baru tu nembiak lantang agi belajar laban sida deka ditisih nengah tiga renggat peresa penguji bepun ari penguji keterubah ujung taun sesi besekula Pom Enam Baruh. Peresa penguji ti nangkanka tu nya dua kali ba Pom Enam Atas.

Ketiga-tiga peresa penguji nya balat tendur agi laban iya meri peluang ngagai nembiak  nyeruri pemutus peresa sida ke enda manag lalu meri peluang ngagai sida bulih pemutus peresa ti lati. Sistem tu mega dikearapka ulih narit ati mayuh agi nembiak lepas SPM belajar ba tikas STPM dalam sistem sekula opis menteri pelajar.

Sistem tisih ti balat agi ngemeratka nembiak lalu iya mega dikearapka ulih ngurangka chara belajar ti balat berorientasika peresa. Raban nembiak Pom Enam Baruh ti keterubah deka ngambi peresa ti diaturka MPN bulan November tu.

Besenutuk enggau nya mega raban tu deka ngambi peresa kedua sida maya bulan Jun. Haribulan deka ditetapka MPM bepelasarka kalinda sekula. Tisih ti ketiga deka dipejalaika maya bulan November 2013. Penggubalan STPM baharu ini akan turut dibantu wakil daripada University of Cambridge Local Examinations Syndicate.

Proses ngambi nembiak Pom Enam Baruh berengkah ari bulan Mei tu lalu sida mega kohort keterubah Tisih Belalauka Sekula tauka Pentaksiran Berasaskan Sekolah (PBS). PBS tu deka dipejalaika ninting penggal sepemanjai timpuh besekula satu setengah taun nya.

Dalam PBS, mark ke diagih nya entara 20 ngagai 40 peratus lalu peresa ujung ba tikas nya mark ke diagih  nya entara 60 ngagai 80 peratus. Tu dikena nentuka tikas pas tiap-tiap calon. Tisih tu nyengkaum tiga kategori iya nya kereja kus, projek tauka tugasan sereta tugasan amali.

Pemutus peresa ke manah bagi ketiga-tiga penggal tu deka nentuka pengulih sida dalam STPM. STPM baru tu ini dikearapka ulih ngangkatka kualiti nembiak ke ngambi STPM setipak enggau tuju Bidang Asil Pugu menua tauka Bidang Keberhasilan Utama Negara (NKRA) Opis Menteri Pelajaran dalam Perambu Lumpar Malaysia Kesepuluh (RMKe-10).

Pengerusi MPM, Prof Datuk Dr Mohd Noh Dalimin, madahka ubah nya diatur setipak enggau sistem penanda tikas bepelasarka peresa ti patut diubah nitihka ubah pemansang kemaya hari tu.

Ubah tu, ku iya patut bendar dipejalaika dikena nentuka nembiak ulih besemekih setipak enggau pemansang pelajar enggau ekonomi di menua tu sereta ubah di tikas global.

Iya nambah madahka PBS nya mega ngambi kira mayuh bengkah elemen ti manah dikena ngadaka peranak menua ke ulih bekempit sereta mega ulih ngeluarka mensia ke lati ba bidang akademik sereta seregah diri.

“MPM ngembuan pengarap ati  lebuh ke ngubah baru sistem peresa belalauka modul terminal ngagai sistem modula tu ulih narit  ati mayuh agi nembiak lepas SPM ulih neruska sekula sechara rasmi ba tikas STPM mega.

“Ubah tu mega nyakal sekeda penemu ti madah peresa (STPM) mar deka pas sereta ngenusahka nembiak laban sida dipejal nyaut tanya ari turai pelajar ke mata pelajar ti dipelajar kenyau ari satu setengah taun ke udah,” ku iya.

Nitihka Mohd Noh, rasional ngubah sistem STPM ti dikena diatu ngagai PBS ngambika meri nembiak besedia napi sistem tisih chara semester ti dipraktikka dalam sistem pelajar di institut pelajar tinggi (IPT).

Rapat langkah ti tumu tu ku iya meri peluang sida nelebaka diri enggau sistem nya sebedau sida nyingkang ke menara gading setipak enggau konsep Pom Enam ke balat agi dikumbai program prauniversiti.

Chara tisih tu mega dipejalaik laban iya engkeman agi enggau umur nembiak ke udah ngangkat diri nyadi orang besai sereta ulih ngaga pengawa enggau enda diperatika ari semua utai ke udah dipelajar dalam bilik kelas.

Iya mega madah nembiak bisi bepeluang ngaga raban dikena ngereja pengawa luar bilik kelas. Enggau nya mega iya ulih ngangkat tikas pengelandik sida nyadi tuai sereta ulih narak sida bekerejasama enggau pangan diri dalam siti raban.

Ku iya, sistem besekula chara tu ulih ngajar sida nengah chara ke enda terus senario belajar baka ke dikemeranka nembiak dalam kampus sebedau sida ninggalka bangku sekula lalu neruska pelajar sida ba tikas ke tinggi agi.

Taja pia agi bisi didinga berita ari sekeda bala apai indai ke enda tentu arapka sistem baru tu. Sida enda tentu arapka pengajar ulih meri mark enggau pengelurus ati. Sida irauka pengajar meri mark sebarang ngagai anak sida kelebih agi enti anak sida enda dikerinduka pengajar tauka bisi penanggul disiplin. Tu ti ngalitka ati laban apai indai ke sama ulih nerima pemutus anak sida ke ba univerisiti ti ditisih ngena chara enggau sisitem ke nyau deka sama enggau sistem tisih belalauka sekula (PBS).

Endang amat ngelama tu kitai bisi ninga bala pemesai sekula baka kepala pengajar enggau sapit kepala pengajar ngasuh lalu kekadang mejal pengajar sida meri gred tinggi ngagai semua nembiak enggau pengarap ati nya chara sida ulih mantu nembiak dalam peresa. Pengawa ke baka kereja kus ke suah amat didinga digaga baka tu. Motif ke bendar laban sekula nya empu pan deka dipeda manah ari sukut imej sereta prestasi sekula. Nembiak ke suah ponteng tang semina datai maya nganjung kereja kus diasuh begelumu ba balai gempuru ngupi pengawa sida nembiak bukai ke udah tembu. Bisi mega pengajar didinga nadai ngumpul kereja nembiak tang bisi diberi mark tauka gred ngagai nembiak nya. Pengawa tu mih ke ngemaruhka intergriti raban pengajar datai ke bala apai indai enggau nembiak udah nadai pengarap ngagai sida.

Tang dalam sistem PBS ke deka dipejalai tu tentu sida ari opis menteri pelajar bisi chara dikena sida beratika pekara tu ngambika iya bisi dipejalaika enggau betul sereta nitihka standard. Sistem tu enti dipejalaika enggau betul ulih mantu pejalai proses belajar enggau ngajar laban pengawa tisih dipejalai dikena mantu nembiak bulih penemu iya assessment for learning.

Muar High School

Nya alai sama –sama mih kitai enda milih kitai nya apai indai tauka pengajar meri pengarap ti tinggi ngagai sistem tu ngambika ulih dipejalaika enggau manah setipak enggau ubah pemansang pelajar sereta program transformasyen perintah kemaya hari.