Purih Pak Kadok mali makai ikan tapah

Ikan tapah

CHERITA pasal purih Pak Kadok enda ulih negu sereta makai ikan tapah ukai pekara baru. Pak Kadok ke tebilang enggau sempama  jaku menang sorak kampung tergadai (manuk menang mudai digadai) diberitaka ngaga penti-pemali nya udah ti tetemuka mas penuh dalam perut  siku ikan tapah di Sungai Perak 450 taun ke udah. 

Pak Kadok maya nya baru udah alah nyabung manuk ke ngujung sida sebilik enggau menua sida digadai ngagai sultan. Mas ti diulih ari ikan tapah nya mih ti diguna iya dikena nebus pulai menua sida.

Peturun Pak Kadok ke dianggarka bisi bepuluh ribu orang kemaya hari tu nya mayuh berasal ari genturung pendiau ke dikumbai Kampung Tua di Lambor Kanan, Perak. 

Ketegal insiden ikan tapah nya dia peturun Pak Kadok lalu enda ulih makai ikan sungai nya nyentuk ke sehari tu. 

Enti sida majakka diri makai, tubuh sida baka ke lukus, kulit meletur baka ti disimbur enggau ai angat; bisi nya sakit lalu ngujungka deka mai nyawa. Dikena merubat, sida enda tau enda mulaika diri ke menua lalu nuju sebuah rumah ti dikumbai Rumah Tua dia. 

Rumah Tua nya diempu saudagar mas, Pandak Logam, iya nya siku ari peturun Pak Kadok ke bisi nyimpan Mas Kanching Tapah, iya nya laluh mas ti dikumbai ditemu Pak Kadok ba dalam perut ikan tapah. 

Ai rendam mas kerongsang empat segi nya dikearapka ulih ngubat penyakit ke dikumbai bepun ari pengawa ke ngelanggar sumpah Pak Kadok.

Rumah Hasmah anak Pandak Logam

Rumah nya diatu lanting anak Pandak Logam, Hasmah. Ketegal ke sakit tuai, Hasmah enda agi ngentap pendiau diri di rumah ke beumur lebih 100 taun nya  tang diau enggau anak menyadi iya di Selayang, Selangor.

Pengawa nyaga Rumah Tua nya diatu dibantu Chairman Komiti Pemansang enggau Pengelikun Menua, Kampung Tua, Zenal Ngah Haleb, 63.

“Seninjik bendar rumah aku betiban enggau Rumah Tua. Nyadi, Hasmah minta bantu aku muka rumah nya enti bisi waris Pak Kadok ke begunaka ai penawar,” ku iya madah  ke Jurnal.

Ku iya, ai tipang ti disediaka sekali dalam setaun nyau deka diirup tauka diunsut ba kulit ti meletur.

“Ninting taun sebedau bulan Ramadan, Hasmah deka pulai kitu. Maya nya mih orang mayuh ulih meda Mas Kanching Tapah nya laban maya selama mas nya disimpan di dalam sebuah peti besi di Rumah Tua tu.

“Mas nya deka direndam ke dalam ai ti disimpan di dalam sebuah jebul. Pengawa aku nya ngisi sereta nambah ai nya lalu nentuka iya enda rangkai,” pia ku terang Zenal.

Nitihka iya, bisi dua kali pekara ke nyelai nyadi baru-baru tu, iya nya ke bekaul enggau sumpah nya.

“Bisi siku indu peturun Pak Kadok tepakaika lauk ikan tapah maya ke kus di Langkawi. Pulai iya ke rumah, dia iya lalu tekena penyakit kulit ti kritikal.

“Doktor pakar di Hospital Taiping lalu beguai ngasuh iya ke Hospital Kuala Lumpur tang  berekat ari ai tipang tu, indu nya lalu gerai,” ku Zenal.

Hal ti sama bisi nyadi ku iya, ba siku nembiak lelaki beumur enam taun lalu dikumbai udah nadai peluang idup.

Sungai Perak

“Apai iya datai mangku anak mit nya sambil nyabak minta bantu. Nyadi, aku ngasuh iya ngunsut ai nya ba tubuh anak iya lalu ngirup mimit laban aku ngasaika nembiak nya bisi tepakaika ikan tapah,” ku iya.

Atas berekat Tuhan, ku iya, bala sida sebilik nembiak nya lalu datai nemuai ngagai Zenal lepas genap 100 hari ai tipang nya udah diguna.

“Aku nyau tekenyit meda anak mit nya ke dulu suba lemi amai nyau udah ulih belanda-landa ngelingi rumah ditu,” ku iya. – Dibali ari surat berita Kosmo