Merambu aktiviti ti bisi mai penguntung maya kemisi sekula

Bujara

Nitihka kaban aku, Harry Usup Umbar, reti leka jaku bujara nya nembiak ke baru angkat bujang tauka dara tauka dalam jaku Melayu dikumbai remaja. Nyadi kenang sekali nguji bejuraika pekara ti bisi bekaul enggau pengidup bala raban bujara lebuh maya kemisi sekula. Lebuh ke nyebut leka jaku bujara dia mayuh ari kitai kelebih agi bala apai indai, pengajar enggau orang ke tuai lalu suah bendar ngembuan peragam ati ke madah raban bujara nya raban ke bepenanggul lalu suah bendar meri penusah ngagai komuniti. Jarang amai kitai ninga dalam raban komuniti ke muji pemanah, pengelebih sereta pengelandik bujara. Utai ke nyadi tanda tanya nya amai tauka enda bujara kemaya hari tu ngenatai penusah ngagai komuniti? 

Tanya nya engka bisi pengamat. Enti kitai meda data statistik ti dikeluarka Polis Diraja Malaysia nunjukka 3,383 bujara udah ditan polis dalam taun 2007 lalu angka tu terus betambah ngagai 3,725 dalam taun 2008 ketegal mayuh macham penyalah jenayah ti dikerejaka sida. Entara  penyalah nya nyengkaum kes enchuri, bunuh, majau indu (rogol) ngemakalka orang sereta mayuh agi penyalah bukai. 

Hal tu terang bendar mandangka tikas disiplin raban bujara di menua tu nyau majak serius lalu mai penanggul besai ngagai komuniti. Tambah mega, enggau gaya dunya ti nadai garis entara sereta pengawa ti bekenaka teknologi pemadah enggau komunikasyen (ICT) tu udah jauh bendar ngubah landskap pengidup raban bujara. Penatai mayuh bengkah teknologi sechara enda terus tu mega meri penguji besai ngagai raban apai indai enggau komuniti. 

Nyangka bisi sekeda ari kitai enda nemu penguji ke ditapi raban bujara enda sama enggau penguji ti ditapi raban bujara sepuluh tauka dua puluh taun menya. Kati tau enda laban pemansang ICT tu udah mai siti dimensyen ti baru dalam dunia komunikasyen ngambika ulih mansang enggau jampat agi. 

Bujara enggau ICT

Enti suba raban apai indai udu irau ati enti anak-anak sida pansut bemain, betemu enggau bala tawing sida  di luar rumah, tang kemaya hari tu lebuh ti udah bisi perengka ICT pengawa ke enda manah ulih mega nyadi ba dalam rumah kelebih agi enti bujara nya bekenaka internet enggau enda dikemataka apai indai.

Nambahka nya mega, mayuh macham aktiviti dalam internet ti dilawa raban bujara kemaya hari tu ke bendar disempulang enggau mayuh bengkah risiko ti tau ngujungka ngaga pengawa ti enda manah ke tau mai penusah ukai semina ngagai apai indai tang mega ngagai sekula. 

Endang amai kitai bela nemu jeman bujara nya jeman transisyen entara dunya nembiak ngaga dunya orang tuai lalu ba tikas tu mayuh bendar pekara ti deka ditemuka raban bujara datai ke sida nyau enda ulih nisih ni ke manah tauka jai ketegal pengerindang sereta peneleba sida dalam pengidup agi kurang. Besenutuk enggau nya mega, sida nyau gagit deka nguji mayuh pekara kelebih agi iya ti belaban enggau rukun pendiau sereta iya ke salah ari sukut pengarap. 

Nya alai, chara mutarka penanggul raban bujara patut dipejalaika enggau naka penyampat. Taja pia, ngiga sapa ke salah tauka nunjuk orang ke salah ukai pengawa ti betul. Semua kitai patut berasai ngembuan tanggung pengawa nagang pekara ti bisi belaban enggau rukun pendiau. Pengawa negika hak sereta pengamat, nagang ulah ti enda manah nya tanggung pengawa tiap-tiap raban dalam komuniti.

Taja pan tiap-tiap iku kitai tauka apai indai kiruh enggau pengawa diri tang pengawa ngemataka aktiviti anak di rumah tauka di sekula, kelebih agi lebuh sida ngelawa internet kediri maya malam enda tau enda dipejalaika. Maya tu mih tanggung pengawa apai indai ngemata sereta ngiga jalai ti engekeman dikena mutarka penanggul raban bujara ngambika ulih diputar. 

Minggu tu nembiak benung beperemisi ari sekula. Raban apai indai patut bendar ngambi peluang tu merambu aktiviti-aktiviti ti tau mai penguntung ngagai bala anak bujara. Beranjungka anak masuk mayuh bengkah aktiviti nengah mayuh macham program ulih meri nilai tambah ngagai raban bujara kelebih agi negapka seregah  diri sida. 

Ngagai sida ke ngaturka aktiviti baka kem motivasyen enda patut ngeletak bayar ti kelalu tinggi ngagai raban bujara ke bisi pengerindu deka enggau masuk kus tu. 

Kadang-kadang kitai meratika bala apai indai endang bisi ati deka nganjung anak-anak bujara sida enggau masuk program motivasyen nya tang ketegal kos ti tinggi ngujungka sida enda nyadi nganjung anak sida. 

Nya alai, sida ke ngatur program ti baka tu patut ngeletak penyampau bayar ti jelan pemar ngambika semua raban bujara ulih enggau masuk program motivasyen tu kelimpah ti ulih ngisi maya lepa sida.

Kelimpah ari nya, penanggul tu enda ulih diputar enti bala apai indai enda meri perati ngagai sahsiah pelajar ti bepelasarka pengarap. Pengentap pelajar pasal pengarap tauka agama diperatika siti pekara berat ti patut dipejalai ngambika raban bujara ulih negap sereta ngetanka  jati diri sida setipak enggau pengarap sida. Tu ulih nagang sida ari ngelumai diri enggau pekara ti tau ngerusakka pengarap. Enti sida ngembuan pugu pengarap ti tegap, sida tentu ulih ngaga timbang penemu ti betul sebedau ngaga sesebengkah pengawa. 

Enti raban apai indai enggau komuniti meri perati ti berat ngagai raban bujara, penanggul enggau penusah sida ulih diputarka enggau lanchar sereta enda limpang ari menasan ke betul.