Anang Nyadi Ulun Duit

ENTI duit nya diajihka nyadi mensia, dipelabaka iya nya siku mensia ke bekuasa amat. iya mega dikerinduka mensia mayuh. Ukai semina nya aja, bisi mega orang ke sanggup parai ketegal iya. Tang mih iya ukai mensia. Iya semina duit.

Sapa kitai enda ngelala duit? Uji emel ngagai aku nama orang nya, hehehe... Kitai ditu ketegal duit. Kitai bekereja ketegal duit. Kitai belajar siang enggau malam ketegal duit. Kitai belajar ba universiti ketegal duit. Kitai tinduk dalam rumah pasung pan ketegal duit.

Enti nadai duit, mensia nadai ulih kini-kini. Maruah enggau ringkat pengidup iya mega bepanggai ba duit. Ku orang, bisi duit kitai dikesayauka orang, nadai duit, ambai ke burak bebetau pan ditabanka orang. Nya baka pemesai kuasa duit.

Kitai belaya ketegal duit. Kitai bebunuh ketegal duit.

Nyau pandakka jaku, kitai nyau majak begigaka duit 24 jam datai ke kitai kekadang enda ingat sapa ke ngaga kitai. Semua tu ketegal duit. Kitai nyau kelalu ituk amat enggau duit ngujungka kitai enda ingat ari ni penatai kitai.

Nama kebuah kitai diada ke dunya napi mayuh macham penguji?

Tu ke enda betul. Mensia diberi akal enggau runding, endang patut mensia ke bekuasa ngagai duit. Duit nya enti sema iya mensia, iya patut nyadi ulun kitai. Tang utai ke nyadi nya nyau tunsang ketupang bungai lenga. Kitai ke pandai sereta pintar nyau di baruh kuasa duit. Mayuh ari bala kitai nyadi ulun ngagai duit. Ku orang, nama udah sekali nyadi ulun, datai ke ni-ni maya kitai nya tetap nyadi ulun duit.

Mayuh chara kitai ulih nyadi ulun ngagai duit. Iya ti pengabis mudah nya ngena duit plastik tauka nama glamor iya kad kredit.

Lebuh keterubah ngena kad kredit iya endang ngenyamaika kitai. Taja pia, lebuh kitai enda ingat sereta enda nemu ngaturka belanja ngena kad kredit enggau betul, dia kita berengkah napi penanggul. Uji perati ngelingi kitai, berapa iku ke nyadi ulun ngagai kad kredit?  Ninting hari kitai bebendar bekereja laban deka mayar utang kad kredit. Pengidup kitai udah enda lantang baka suba.

Ari sukut fizikal kitai endang dipeda lantang, tang iya ke bendar dalam runding kitai nyau tusut, charut laban dipelulung utang. Empas ari nya, kitai idup dalam rumah pasung ke digaga kitai empu.

Mensia nginjau duit laban deka beranakka duit. Kitai deka nyadi kaya raja sereta lantang agi ari orang bukai. Kitai berengkah bulih nasit enda manah lebuh utang kitai nyau enda ulih diatur agi. Enti kitai nginjau duit ari bank, dia bank deka datai nagih utang ari kitai. Pengidup nyadi balat agi pedis enti kitai berutang ari cheti tauka ah long. Enti kitai enda ulih mayar, nyawa kitai nyangka bebadi.

Kemaya hari tu rambai jaku makai suap tauka rasuah nyau nadai reti agi ba sekeda orang. Orang makai suap ketegal duit. Nengah duit nya, sida bepikir ulih idup lantang senang. Orang ke meri suap duit mega ketegal duit. Ba runding sida enti sida meri suap, sida ulih nerima projek bejuta-juta ringgit.

Bisi mega peranak menua kitai ke sanggup bejai ke bansa enggau menua diri empu ketegal duit. Sida sanggup nyadi orang ke bejualka indu ngagai orang ke bepangkat besai. Sida sanggup mai orang luar masuk enda beradat. Sida mega sanggup meda nembiak redak parai ketegal dadah.

Semua tu nyadi ketegal sida nyadi ulun duit. Enti kitai udah keran   amat dekaka duit kitai nyau enda ingatka dosa. Kitai enda ingat ke hari kitai nerima balas ari petara. Kitai udah enda pedulika pekara ke tau enggau enda tau dikerejaka kitai. Nama utai ke ditemu kitai semina duit. Tinduk duit, mimpi pan mimpika duit. Enti ulih kitai siku aja kaya di dunya tu.

Nya ku gaya pemesai perintah enggau kuasa duit. Pejalai idup ke pandak tu enti nadai duit endang enda dikemuningka orang. Tang enti kitai mayuh duit, idup kitai pan enda mega lantang. Ninting hari kitai nangi. Nangika duit kitai dichuri orang.

Jalai keluar ari penanggul tu endang bisi. Anang enda bagai nuchika duit kitai nya. Meri pemberi tauka besedekah, mayar pupu, mayar chukai ari penatai pemisi kitai. Nya baru idup kitai lantang senang. Menua gerai, rayat cheregas.  

Ketegal duit macham-macham tau nyadi. Rega diri empu ulih dibeli. Enti bisi mayuh duit tau mega enggau ngantung nama bepilih nyadi pengari rayat.