KUALA LUMPUR: Jaku Tamil dipinta nyadika mata pelajar ti mesti diambi nembiak bebansa
India di sekula bangsa (SK) dikena nentuka jaku nya enda lenyau kelebih agi
ngagai nembiak rebak baru.
Sapit Menteri Pemadah Komunikasyen
enggau Main Asal, Datuk Maglin Dennis D'cruz madahka, tu dikena nentuka
nembiak India ukai semina ulih bejaku dalam jaku Tamil enggau lanchar, tang
mega ulih macha teks dalam tulis Tamil.
Kemaya hari tu, bisi nembiak Tamil
ke semina nemu bejaku dalam jaku sida empu tang enda nemu macha dalam jaku nya.
Tu tau bendar mai empas ngagai pengawa ti ngeluar karya dalam jaku Tamil, ku iya.
"Isu tu patut diperatika
laban enti enda penanggul kurang karya dalam jaku Tamil enda ulih diputarka,"
ku iya madah ke raban pemberita udah ti nutup
program "Mari Membaca 1Malaysia: Ore Malaysia Vaasika Vaarunggal"
ditu, Hari Minggu tu tadi.
Program nya diatur Gerempung Penulis
Tamil Malaysia enggau kerejasama Perpustakaan Negara Malaysia (PNM). Tuju program
nya dikena meransang budaya macha raban bansa India kelimpah ari ti meri pengiktirafan ngagai penulis enggau
karya Tamil.
Lebuh ti bejaku ba mua mayuh,
Maglin madahka, raban penulis di menua tu patut meda raban ti tagaka sida
sebedau ngasilka karya dikena nentuka kereban bacha ti diasilka nya engkeman
ngagai semua lapis komuniti.
Bepelasarka pansik gaga baru
profil macha komuniti Malaysia 2010 mandangka
rayat menua tu ke beumur 10 ngagai 40 taun macha purata lapan buah bup setaun,
ku iya.
Taja pia, ku iya sida ke beumur
41 taun ke atas semina macha purata enam
buah bup setaun. Pekara tu nyadi engka ketegal ari kereban bacha ti engkeman
ngagai raban sida tu enda chukup.
"Raban penulis patut meda
pekara ke patut nitihka maya sereta meragam pekara ke deka nyadi jemah ila
kelebih agi ari sukut kereban bacha ti diguna," ku iya.
Nitihka penerang ari Maglin naka 31
Disember 2011, Malaysia ngembuan 5,150
orang penulis enggau 9,609 pengeluar bup.
Nitihka timpuh ti sama mega, 495
judul kereban bacha dalam jaku Tamil direkodka lalu diserahka ngagai PNM di baruh
Akta Penyerahan Bahan Perpustakaan 1986. – BERNAMA
Berita
tu patut bendar nyadika teladan enggau peransang ngagai pemesai, tuai-tuai raban bansa Iban
enggau mega sida ke penulis Iban ngambika sama-sama meratika pekara tu ari sukut pemansang jaku
Iban. - Pengarang Tempalai Kenang
Tiada ulasan:
Catat Ulasan