Puyu bedebu nutu keruh; tuman ngereman nyungkap ambuh

Kenang pengarang tu nguji betatika daya runding raban bansa Iban kelebih agi ti bekaul enggau pengawa politik. Taja pia patut mega dikeingatka penemu ti dikenataika ditu semina ari sukut penemu penulis belalauka peneleba penulis meratika utai ti nyadi dalam pengidup raban bansai Iban sereta belalauka kereban bacha ke bisi ditulis ba internet.

Dalam pengawa bepilih, Iban baka mega bansa bukai endang diberi peluang milih sapa ba ati sida ke tau ngarika sitak enggau komuniti sida. Taja pia, belalauka pengawa bepilih, raban bansa Iban enda milih tauka nyukung raban bansa Dayak kelebih agi bansa Iban. Tentu mayuh kebuah sida ngembuan ulah ti baka tu. Ambika banding maya bepilih dalam taun 1991 raban bansa Iban diperatika  enda ngemeratka sukung Dayak ke nyadi pengari  laban kenu ku jaku sida enti sema menang bala pengari tu tau mih merejuk ngagai parti sepiak.

Kedua, raban bansa Iban kemayuh agi sida enda tentu ngira sapa ke nyadi tuai-tuai menua. Bagi sida semua tuai ke bisi udah chukup manah. Sida nadai kiruh deka nemu nama utai ti udah dikerejaka tauka bedau dikerejaka tuai tauka pengari sida. Tambah mega ku ku bala Iban empu endang budaya Iban enda bebasaka tuai sereta enda tau ngelaban tuai ke udah dipilih. Nama-nama kimpin enggau komen pasal tuai-tuai pemegai menua enda ulih nguing ke runding bala Iban.

Ketiga, raban Iban ke mayuh iya enda tentu pedulika berita ti madahka mayuh tanah adat asal orang Iban udah kena ambi perintah. Berita baka tu bedau ulih muka mata sida. Kebuah pia, laban ukai genap tubuh diambi perintah tanah.

Kelimpah ari nya mega mayuh ari sida tu sanggup nerima duit lalu diasuh ngundika pengari nitihka orang ke meri duit  taja pan enda mayuh. Seagi bisi diberi duit enda ngira penyampau tetap diganti enggau undi.

Keempat, mayuh ari sida tu nadai kiruh enti orang madah ke perintah nyiping sida ba sekula, ba kereja tauka ba pengawa nikika pangkat. Laban ba penemu sida agi bisi ga bala anak sida ke besekula,  agi bisi kaban belayan bekereja perintah.

Sida mega nadai kiruh taja pan orang madahka bisi orang enchuri kayu tauka betebangka kayu enda nitih atur ba menua Sarawak tauka ngamahka sungai. Ba penemu sida, nya endang pengawa tauke China ngambi kayu kampung sereta mega endang baka selama sungai endang kamah lalu nadai jalai ulih diperesi tauka diasuh chiru baka ke udah.

Kelimpah ari nya sida mega nadai kiruh ke berita ti madahka orang  nadai pedulika sida ba pemansang dagang. Ba bala sekeda nya pekara ti manah ngambika sama nadai bulih lalu sama ensepi pemerinsa. Bagi sida enti sida ke pandai nya kaya enda mih nupi sida iya.

Sida mega tetap nyukung sapa-sapa ke nyadi pengari sida taja pan agi mayuh infrastruktur  baka jalai, ai enggau karan lalu bedau meruan disediaka. Sida tetap nyukung pegari sereta agi sanggup bejalai kaki, merau tauka ngena lampu kelita taja pan enda berubah mansang.

Bisi orang madahka perintah nganjung mayuh raban pengajar ari Malaya ngajar ba menua pesisir Sarawak. Sida tu pechaya bala pengajar tu datai ngerebut peluang bansa Dayak nyadi pengajar. Tang sida di rumah panjai nadai  kiruh laban bisi ga sekeda bala anak sida ke nyadi pengajar.

Bisi mega berita ti madahka perintah ngaga mayuh tekat ai ke tau mai penusah ngagai sida ke diau ngelinggi tekat ai nya. Berita baka nya mega nadai dikemuningka sida. Ba penemu sida pekara nya nadai ngawa laban agi mayuh tanah endur beridup sereta sanggup mindah taja pan tusah.

Berita ke madahka pengawa makai suap balat amat nyadi kemaya hari tu. Berita tu mimit pan nadai masuk pending bala sida. Ba penemu sida pekara tu nadai kaul enggau pengidup besehari-sehari sida. Asal ulih ngidupka diri pama mih.

Iban beberita raban bansa ti berani. Nya alai suba dalam taun 60an, mayuh bujang berani berambunka nyawa gawa nyadi soldadu. Tang utai nya utai ke nyadi kelia menya nya renggat niang Begiling munyi ku sempama jaku tuai. Kemaya hari tu taja pan bisi pengari tang bedau tentu temu sida ulih ngarika bansa tauka enda ari asil pengawa ti udah digaga sida kemaya hari tu. Agi mayuh pekara dikearapka bala Iban dipinta sereta digaga pengari sida ngambika tau mai penguntung ngagai komuniti. Agi mayuh bansa Iban enda peduli, sida enda ingatka nama utai ke nyadi sehari tu deka ditapi anak uchu jemah ila. Perening jauh ke mua ketegal bansa enggau menua.