Panyun jaku
Babi, jani tauka babui nya sebansa jelu mamalia ti bekulit
tebal, bekaki pandak, betunjing, bemunung sereta bisi junggur. Dalam penemu
sains babi masuk dalam raban omnivor, reti nya sida tu makai dagin enggau utai
tumbuh. Kelimpah ari nya, babi dianggap mamalia ti pengabis pintar. Nitihka pansik, babi nya pintar agi sereta muntang ditupi
dibandingka enggau ukui tauka mayau. Uting – anak babi ke agi mit. Ngut nya
leka jaku kena ngelaung nyebut babi. Bunyi nyawa babi lebuh enda meruik inggar.
Bunyi kangau orang ngumbai babi makai. Bunyi babi dikumbai baus, meruik enggau
ngembup. Ruik-ruik nya bunyi nyawa babi lebuh iya pedis tauka lapar. Lanyih nya
minyak babi.
Selangkuh tubuh babi
Nyadi ditu semina dikenangka bagi tubuh babi ke nadai sebeaka
enggau jelu bukai lalu dipelabaka enda ditemu nama ngagai nembiak ke rebak
baru. Babi bisi munung. Munung nya isi ke ngembul di atas idung babi kampung
lelaki. Manuk mesai pipit betada ngelung
ke patung, jani mesai chit betaring ngelung ke munung (sampi). Babi mega bisi junggur. Junggur nya idung
panjai ngelinggi sekapan nyawa dikena babi nya ngembau enggau ngerumbak tanah
lebuh ngiga utai diempa.
 |
| Macha atau babi |
Dalam budaya Iban baka maya pengerami gawai, sida ke tuai
sereta bisi penemu suah diasuh orang macha atau babi. Macha atau babi nya
mereti sereta madahka pemanah tauka penyai ulu tauka empa atau babi ti dikena
Iban bechenaga maya gawai, mudas etb. Bechenaga nya ngabas nasit bekaul enggau
pekara baka umur mensia enggau tanah alai berumah. Dulang sempandai nya bagi
atau babi ti ayan lalu dibacha orang munyi ke dipadah tadi.
Siti agi ke bisi dalam budaya Iban nya bepanjap. Bepanjap
tu uti ti ditumbuh orang empu rumah dikena masa penatai pengabang ke alai siku
babi dipelintangka di kaki tangga. Sebedau tuai pengabang ngayang babi nya, iya
dulu ditimang dua iku lemambang iya nya siku pengari orang ke empu rumah lalu
siku nya pengari pengabang. Seduai tu nimang ngena jaku karung.
Pencharan nya sangkar ti digaga ari wi tauka rutan tauka
buluh endur ngurung babi ti deka dibai ke bukai. Babi ti deka dibunuh kena
Gawai Sandau Hari tauka gawai bukai selalu disimpan dalam pencharan dulu
ngambika nyamai diulihka tumu pagi hari nyadi gawai.
Bansa babi
Babi bindu nya sama reti enggau babi indu.
Babi babas tauka babi kampung babi ke idup siga dalam
kampung.
Babi bandam sebansa babi kampung ti pemadu besai. Dalam
budaya Iban, Iban arapka babi tu berantu. Ku sida nya alai antu mangah ngarung diri dalam babi lalu
bagas nyengkubang pendam kelia.
Babi belang nya babi ti bebulu burak apus. Babi belang
mega jaku kelaung dikena nyebut orang putih.
Babi belingau nya sebansa babi ti rindu diau kediri ari
raban, bebau belingau sereta enda nyamai diempa.
Babi dupan nya bagi ke ditupu tauka diinang tang nyau
udah tuai.
Babi ti baru beumur kurang lebih setaun dikumbai babi
emperingat lalu iya ke kurang lebih sebulan dikumbai babi karau. Nyadi babi ke
beumur kurang lebih dua taun dikumbai babi ngelampai lalu babi indu ti udah
beranak dikumbai babi sepa. Enti babi nya siku aja, iya dikumbai babi tunggal.
Babi tuduh nya reti iya begenselanka dua iku manuk ke ganti siku babi.
Babi kambau sebansa babi kampung ti jarang ditemu, bauh
munung sereta bebau isi ke enda tentu nyamai diempa, mangah lebuh disalak uduk.
Babi menua nya babi tupi ke disayat lalu dagin iya diempa.
Babi tu diguna bala Iban ke agi megai pengarap lama kelebih agi maya sida bisi
ngintu gawai asal.
Babi nyadi nya babi ti bisi tanah begumpal ba iku,
betaring begelung muntat. Jarang ditemu.
Babi sambas sebansa babi ditupi ti besai, idup makai sum,
disemelih ngulihka dagin ke empa.
Babi sanggul sebansa babi kampung ti besai munung sereta
besanggul gaya.
Dalam jaku Iban, leka jaku babi mayuh dikena baik
nya dalam jaku sempama tauka jaku dikena ngeransi tauka nganu orang. Peratika
jaku di baruh tu ke bisi bekaul enggau leka jaku babi.
Keterubah nya jaku dikena madahka Kediri ransi
ngagai orang. Babi nya leka jaku ransi ditujuka ngagai orang ke jai ulah.
Ambika chunto, babi nuan tu!
Akar masar nya taring babi ti nyadi pengaruh,
suah mega disebut taring babi nyadi. Rambai jaku tu bisi dikena dalam leka
main.
 |
| Ngayang babi |
Bebanchak babi nya atur munuh babi kena bebaikka
menua. Ngayang babi ke tanda bebaik;
reti nya badu agi bemunsuh; beambu diri sekaban. Proses tu tau mega dikumbai
pengawa ngaluska menua udah bekau lama bemunsuh tauka bebunuh.
Nyadi dulu kelia baka ti endang ditemu kitai, apin
penatai Raja Kulit Putih ari England, rambau nya kelia Iban endang ngemeranka
pengawa ngayau nyadika siti ari budaya. Nya alai lebuh Raja Kulit Putih (Raja
James Brooke 1842-1863, Raja Charles Brooke 1868-1917, Raja Charles Vyner
Brooke 1917-1946) merintah menua Sarawak, ketebal agi pengawa Raja nya nagang
pengawa bala Iban ti bekayauka pangan diri ari ti ngaga pemansang ke
dipengunaka rayat. Nyadi adat Raja ti nagang lalu deka ngemunaska adat bekayau (Culture
of Headhunting) ba raban bansa Iban balat bendar ngemediska ati sereta
dikenggaika tuai-tuai Iban. Nya alai dikena nagang enggau ngemunaska pengawa
bekayau, dia Raja suah ngatur adat Bebanchak Babi (Peace Making) dikena bebaika tuai-tuai ti keran deka bebunuh
ngelaban pangan diri.
Nyadi keterubah adat tu Bebanchak Babi tu diatur
Raja, iya nya ba tengah Kubu Lubuk Antu (Fort Arundell) kena 27 June 1888. Iya nya
dikena bebaikka laya entara Iban Ulu Batang Ai enggau Iban ari Kapuas Ulu, ba
menua Kalimantan, Indonesia ti enggai badu bekayauka pangan diri. Nyadi kenu ku
jerita ti ditusui urang ke tuai, penyarut nya kelia betumbuh ari siku iban ti
benama Langgai ari Besayah, Kapuas Ulu ti mukut Belayung kitai Iban ari Ulu
Batang Ai lebuh sida ti ngabang ke sepiak nyin. Nya alai ketegal laya nya, dia Iban
ari Ulu Batang Ai lalu nyerang rumah panjai sida Langgai di Besayah enggau
sekeda rumah-rumah panjai din ti dipansa sida. Baka nya mega Iban ari sepiak
nyin malas nyerang ke sepiak kitu nadai milih bagi rumah ti enggau bemunsuh.
Lebuh adat Bebanchak Babi nya dikereja menya, tuai-tuai ti nguluka bala Iban
ari Ulu Batang Ai iya nya Pengarah Jimbun ari Jengin, Penghulu Ngali ari Delok
enggau Penghulu Tembak ari Tinting Lalang. Lalu tuai-tuai ti nguluka bala Iban
ari Kapuas Ulu ianya Temenggong Budit ari Lanja, Pateh Menggong ari Malai
enggau Temenggong Tutong ari Ampar. Sida tu ti datai rambau nya menya endang
sama-sama bisi mai Tajau Ampun sigi ari sepiak-sepiak ti lalu dipetukarka sida
enggau pangan diri.
Nangkanka nya, adat Bebanchak Babi mega bisi diatur dua kali ba Simanggang
iya nya kena 4 August 1920 enggau kena 1 February 1924 dikena bebaikka Iban ari
Batang Ai Engkari muak sepiak enggau Iban ari Lemanak, Skrang enggau Layar ari
sepiak.
Adat Bebanchak Babi ti pemadu besai diatur Raja
Charles Vyner Brooke ianya kena 16 November 1924 ti dikereja ba Kapit dikena
bebaikka Kayan enggau bala Iban Ulu Batang Ai, Ulu Batang Rajang ti betuaika
Penghulu Koh ari sepiak. Lalu ari sepiak bala Kayan, Kenyah ti ari Batang
Rajang begulai enggau bala Kayan, kenyah ari Apoh Kayan pegai perintah Belanda
di Kalimantan Indonesia betuaika Tama Kila. Pengerami nya kelia digulu lebih
4000 bala tuai-tuai kayau begulai enggau bala manuk sabung enggau bujang berani
ari kedua-dua piak ti sama chukup ngena ngepan, pekayan kayau, bebai terabai
enggau sangkuh, betangkin pedang, ilang tauka nyabur. Pemesai ti ngulu
pengerami nya kelimpah ari Raja Charles Vyner Brooke, bisi mega datai siku
Captain ari Netherlands Indies Army enggau siku Controleur Apoh Kayanti di
Kalimantan. Nyadi bala Kayan enggau Kenyah ti ari Apoh datai ngena 95 buah
perau pengayau ti diuluka perau Tama Kila. Perau sida nya undur empat-empat
buah begandin lalu siti-siti baris nya bisi kira 50 ila ngentudika pangan diri.
Lebuh sida ngelimpas kapal Raja, dia meriam pan lalu diselup. Bala sida nya
mega lalu sama-sama sereta nirika sengayuh dikena nyelut Raja Charles Vyner
Brooke enggau pemesai-pemesai kulit putih ti ba deck kapal nya. Pengerami nya
menya tebilang agi dikumbai ‘Palit mata, Sapu mua’. Dalam pengerami ‘Bebanchak
Babi’ nya kelia, dia Tuan Raja lalu meri tajau Menaga Labang (Burak) sigi siku
ngagai Penghulu Koh seduai Tama Kila enggau setawak selebuan siku ngagai sapit
seduai. Nya ke tanda sida nya udah nulung Raja ngaluska menua. Lalu Penghulu
Koh lalu dititah perintah nyadi Temenggong.
Lebuh pengerami adat ‘Bebanchak Babi’ tu dikereja,
dia tuai-tuai kayau sereta enggau bala manuk sabung sida lalu bertabur beras
kuning, besumpah besemaia badu bekayau lalu betukar tajau tauka setawak dikena
sida nanggam jaku semaya sida enggau pangan diri. Udah temu atur ti besilihka
tajau enggau setawak, nya baru atur ti manchak babi enggau sangkuh lunju pen
dikereja tuai ari kedua-dua piak ba mua bala mayuh sereta enggau
panjung-panjung. Udah tembu manchak babi, dia sida lalu berengkah makai, ngirup
sereta lalu betabi, betundi berandau enggau pangan diri. Nya alai baka nya mih
tuju enggau reti jaku ‘Bebanchak Babi’ enggau chara, gaya iya dikereja orang ke
tuai dulu kelia. (dibali ari http://tusunterabai.wordpress.com/)
Berani babi nya orang ke mandangka diri berani
tang nadai akal sereta enda bejimat.
Baka ai pelangkan babi nya jaku sema dikena nyemaka ai ti pemadu keruh.
Ambika chunto, balat ga sungai kitai wai nyau baka ai pelangkan babi.
Baka babi agi makai seludang nya jaku ke nyebut agi mengkang saum pengawa,
pendiau, utai dikena tauka utai diempa.
Baka babi mangah nya pengawa ke nanka keresa ngena pemangah enggau
gaya-gaya enggaika orang ngerebut, ngambi tauka ngempu.
Baka nyawa babi nya jaku dikena madahka orang ke bam makai.
Babika orang nya orang ke selalu kena tunggu tauka kena ukum. Keba
tiap-tiap kali iya bisi babi, babi nya dikena iya mayar tunggu.
Durah-durah nya munyi babi nganu anak.
Gila babi nya sebengkah ari penyakit luput.
Kaban perut ikan, pejuru perut jelu, menyadi perut jani nya kaban ke ulih
ngambu; ukai kaban ari peturun.
Kuit-kuit baka iku babi nya nyemaka penemu ti kalik-kalik sereta enda ulih
dititih.
 |
| taring babi kampung |
Mesai taring babi nya jaku dikena nyemaka pemesai bulan di langit iya nya
kira-kira sepemesai taring babi.
Makai iku babi nya orang ke enda entap pendiau, kuang kuit kin kitu. Penemu
orang ke agi kalik-kalik dikumbai baka iku babi.
Nama-nama babi diempa! Jaku ngeransi orang ke enda mudah datai tauka pulai
lebuh dikangau.
Ngayang babi panjap nya pengawa bebunuhka babi ke nganti temuai tauka
pengabang datai.
Ngeraup tai dipala jani nya ngeraup penemu orang bukai ari belakang, nadai
ari tanya sekalika orang ke diraup iya penemu nya besetuju sekalika nyakal.
Nyau nyepan baka babi nya mandangka pengawa orang ke enda puas ngerendam
diri mandi laban tekelalu angat.
Ngulur babi nya pengawa ke nginjau babi orang bukai ke laki inu babi kitai ngulihka
purih.
Pangki babi mangah nya pengawa orang ke ngembal tauka nganu orang kia-kia
maya bisi awak.
Riri jani makai tai iya nya madahka bulih penusah laban terunda-runda
ngereja pengawa ti salah tang tau mai penguntung baka pengawa bejualka dadah.
Rusa meruan sepan; babi sedia pelangkan nya jaku dalam dikena madahka
tiap-tiap bansa di dunya endang bisi adat, daya idup enggau akal beridup Kediri
empu.
Tanah melakang babi nya gaya tanah ti muai ke sepiak-sepiak sereta nerenjuk
di tengah.
Taring nyadi nya taring babi ti enda belubang sereta nyadi batu. Taring ti
baka tu tau diambika pengaruh. Iya mega tau disebut akar masar.
Taring serenti nya jaku dikena nyemaka pemauh taring babi ti sama sukat
enggau peninggi ari pun tapa ngagai ujung tunjuk indu bediri.
Cherita Kebuah Babi
bisi Junggur
Nyadi tu cherita
tempa, cherita gaga. Kenu ku cherita kelia babi endang meruan idung baka jelu
bukai. Tang ketegal laya enggau beruang ke ngujungka idung babi nyau rempi. Beruang
maya nya pan bisi iku menyana baka jelu bukai ke bisi iku.
Nyadi bisi
sekali seduai balat bendar betalat, belayaka endur ngiga pemakai. Nyau kepuas
ke betalat enda badu-badu dia seduai
lalu besetuju mai laya seduai nya ngagai akim, iya nya nadai jelu bukai enti
enda pelanduk.
Pelanduk lalu
ningaka laya seduai nya. Seduai diberi peluang bejaku ngenataika batang pekara
seduai. Udah tembu seduai iya bejaku, Pelanduk lalu madahka
siti aja chara dikena mutarka laya seduai nya. Iya mutuska penemu ngasuh
seduai nya betarit iku. Iya lalu ngeletakka hari enggau endur seduai betarit
iku.
Lebuh hari ke disemayaka Pelanduk udah datai, dia seduai enggau Pelanduk
empu lalu datai ngagai palan ke alai seduai iya betarit iku. Bala jelu bukai ke
bisi ninga berita seduai ke deka betarit iku pan bela datai magang laban deka
meda pengawa seduai nya.
Lebuh seduai sama bela udah besedia, dia Pelanduk lalu ngasuh seduai sama
bela melakangka pangan diri; burit betemu burit. Pelanduk lalu nanchang iku
seduai iya nyadi baka siti tali. Bedau nama-nama seduai nyau bela deka narit. Tang
Pelanduk madahka seduai anang bangat beguai deka narit. Udah seduai badu narit,
Pelanduk lalu niap; satu! Dua! Tiiiga!... Seduai pan lalu sama bela narit. Lama
ga seduai narit sama enda tealahka pangan diri baka sempama belah rutan.
Benung seduai ngeringak narit enda mukai-mukai buah rian lalu labuh meredup
ke tanah. Tak tekenyit seduai ninga bunyi nya lalu ngejut narit. Peda babi nyau
tepelanting ke mua lalu tepangkak ba bandir kayuh ke besai. Abis mua iya rajai,
idung nya nama agi lalu rimpi. Beruang nya tadi pan tepelanting mega, tang
mujur ga iya nadai tepangkak ba kayu. Tang nasit iya pan enda manah. Iku iya
nyau putus.
Nya kebuah kenyau ari nya semua peturun babi lalu beidung rimpi tauka bisi
junggur lalu pia mega beruang lalu nadai iku. Pasal pemutus pechara sapa menang
enda ibuh disebutka ditu.
Lauk ari dagin Babi
Dalam bansa Iban, babi tau digagaka mayuh macham lauk. Dulu kelia lebuh ke
bedau bisi peti ais, Iban ngasamka dagin babi ngambika tan disimpan. Dagin babi
mega ulih ditunu, disalai, dipansuh tauka disumai kuah tauka diguring. Dagin babi
ulih digagaka pau (pau babi), bakut teh, kueh chap, pork leg rice, palu babi
enggau mayuh menu bukai.
Leka main ti bisi
kaul enggau babi
Manchak babi ba kaki tangga
Nya alai babi menua kita tu udah digayang kami enggau generang sangkuh bemata dua.
Darah tu balat nujah kaki dua enggi kami,
Dibai kami niki ngagai ladi rumah raya enggi kita.
Din lagi, lebuh kitai ke bekemumuk duduk bebanda,
Lebuh lambu kitai ke betiu bejaku nyampau becherita,
Tau tu bebali nyadi taring uting lunchik juring babi menua,
Enggau beguluk tanduk rusa periga,
Diambi sida lengayun endun dara,
Jadika ubat padi paya kena tinda sida ngisi mua tibang tundan.
Nya alai babi indu kita tu udah digayang kami enggau generang sangkuh mata siti.
Darah tu udah nujah tunjuk tengah kaki kami ke bediri mayuh beranti.
Dibai kami niki ngagai penyurai rumah tinggi enggi kita.
Din lagi lebuh kitai ke bekemumuk duduk besendi,
Serta betiu ka jaku main bebuti,
Tau tu bebali taring uting lunchik juring ngeli jani,
Enggau gempelu batu ai,
Diambi sida endu teruna dara tinggi,
Diengkahka sida manah-manah di tikai bebuah sigi,
Jadika ubat sempeli kena sida ngisi igi tibang rerentam.
Nya alai babi lelaki enggi kita tu udah digayang kami enggau generang sangkuh besi.
Darah tu balat nujah tapa kaki,
Lalu dibai kami niki ngagai leladi rumah menchegi enggi kita.
Datai din lebuh kitai ke bekemumuk duduk bebandi,
Sereta betiuka jaku mayuh reti,
Dia iya bebali nyadi ngeli jani babi lelaki,
Enggau batu pupu gumbang nyadi,
Diambi sida endu teruna dara mereti,
Engkahka sida manah-manah di kelasah tikai anyam diri,
Jadika ubat padi awakka tebekan lalu jadian.
(Dibali ari http://bujangemperajalemai.wordpress.com/)
Babi digela jelu ke kamah dalam
al-Quran nya alai iya haram dipakai orang ke bepengarap Islam. Babi mega ditagang pakai dalam agama Yahudi. Kelimpah
ari nya mega pengarap Seventh-day Adventists mega enda makai babi. Adat nagang
tu bisi ditulis dalam Book of Leviticus, Bab 11, Ayat 7& 8: sereta ba dalam Book of Deuteronomy, Bab 14, Ayat 7
& 8, Book of Isaiah, Bab 65, Ayat 2 ngagai 4: , enggau Book of Isaiah, Bab
66, Ayat 17.
 |
| Restoran tu ba Jalai Chow Kit, nadai nyual jani. |
Taja pia ba endur ba endur bukai
babi tau dikumbai bisi nilai mata duit baka ke dikena sesebengkah komuniti
orang asli di Papua New Guinea.
Babi mega tebilang dalam komuniti orang cina. Nya
alai babi dipasuk ke dalan kelinda China
iya nya Taun Babi. Epik China ke tebilang, Journey to the West mega ngundan
watak babi benama Zhū Wùnéng.
Kelimpah ari nya, dagin babi mega dianggap
orang China enggau orang Jerman nyamai dipakai. Bisi mayuh macham pemakai
Jerman ke ngemeratka dagin babi.
Penyakit ari Babi
Di entara
penyakit ti bisi kaul enggau babi nya baka : anthrax,ascaris
suum,botulism,brucella suis, cryptosporidiosis, entamoeba
polecki, ersipelothrixshusiopathiae, flavobacterium group Ib-like
bacteria, influenza, leptospirosis, pasteurellaaerogenes, pasteurellamultocida, pigbel, rabies, salmonellosis,
salmonella cholerae-. Rengga babi nya sebansa penyakit ke dibai babi. Enti
nitihka penemu sains, penyakit tu enda ngerampit mensia taja pia dalam sejarah,
iya kala ngerampit mensia. Bisi empat bansa virus rengga babi iya nya H1N1,
H1N2,H3N1, H3N2.
Simpul Penemu
Aku enggau naka ulih nabakka
penemu bepelasarka pansik enggau ari mayuh bengkah penyanding penemu. Nya alai
enti sema penerang aku ditu agi kurang agi puang, agi bedau nyentuk agi suntuk
aku minta silih baka upih beganti mayang; minta tampung baka semeliung putus
pungkang.
Ingatka pesan tu bala mayuh - Jani amat iya dipeda lama
udah rimpi, tang bisi
maya iya tau bepangki ngelinggang dulang; nya alai anang bejai ke tudah
jani,
meda iya mandi ba ai pelangkan belang.
Janang anak Ensiring, Robert Menua Saleh,
Jaku Dalam Tun Jugah
Foundation 2006
Bup Serbareti, Tun Jugah Foundation 2011
Harry Usup Umbar, Geoffrey Singgon, Timothy Salang, Kamus Tribahasa Iban-Melayu-Inggeris, Edisi Pertama, Sarawak Iban Writers’ Association 2010
Tiada ulasan:
Catat Ulasan