Cherita mensia ditupi jelu

CHERITA mensia idup sereta besai begulai enggau jelu chukup pegari dalam siri Tarzan ti diasilka  penengkebang iya nya’ Edgar Rice Burroughs ke berasal ari Illinois, Amerika Syarikat (AS).

Tarzan nya cherita senentang siku lelaki ke ditupi seraban gorila di kampung Afrika. Nembiak ke benama Tarzan nya ulih ngulai diri enggau gorila, iya nya jelu ditemu ngembuan ulah ti agresif sereta ganas. Tarzan mega betawing enggau jelu bukai baka gajah, kera enggau ular.

Tang pengidup ‘normal’ Tarzan dikachau seraban orang ke matau menua ari Britain, Profesor Archimedes Q. Porter, anak iya Jane enggau  orang ke mantu seduai iya nya Clayton ke mega siku orang ke pengasu jelu. 

Taja pan Burroughs udah lama parai, bup iya ti dikumbai Tarzan of the Apes udah dikalihka ngagai 58 bansa jaku. 

Cherita mitos Tarzan seruran ngeruga runding kebuah mensia ulih  idup lalu beinteraksyen enggau jelu. Nitihka berita, lebih 100 kes udah direkodka di serata dunya senentang pekara ti bisi kaul enggau hal tu.

Entara cherita ti ditabur enggau lenak amat iya nya senentang siku indu ke benama Oxana Malaya, diada dalam taun 1983 di Ukraine. Malaya tu ngembuan ulah baka uduk.

Lebuh indu nya ditemui raban penguasa local council dalam  taun 1991, dia iya idup begulai enggau seraban uduk siga. Apai indai iya ngembuan penanggul gian dadah ti kronik ngujungka Malaya enda diintu kenyau ari mit.

Rumah iya enda jauh ari tebing pasar ti kamah sereta mayuh uduk siga betedayau dia. Lebuh ke ditemu orang, ulah iya sama baka uduk. Iya nyalak baka uduk sereta bejalai ngena kedua-dua jari enggau kaki.

Enchuri beras

Kelimpah ari nya, Malaya mega ngembuan penanggul bekomunikasyen enggau mensia. Nya alai iya dianjung ke klinik mental di Ukraine lebuh ditemu.

Cherita Malaya mega sebaka enggau siku indu ke benama Rochom P’ngieng ti lenyau enggau ngenyit ba menua iya di Kemboja maya iya beumur lapan taun.

P’ngieng ditemu pulai baru ke menua iya udah ti lenyau sepengelama bepuluh-puluh taun,  iya nya kenyau ari taun 2007 lebuh iya bisi ati deka ngenchuri beras ke diempu siku ari sida ba menua iya.

Apai indai P’ngieng ngaku, indu nya anak seduai iya ke lenyau belalauka abi telih ba tubuh iya. Taja pan udah beumur lebih 30 taun, indu nya endang enda nemu bejaku dalam jaku Kemboja. Ke pengujung iya, iya lalu ngerari kediri baru ke kampung lalu enda ditemu nyentuk ngagai sehari tu.

Nyangka cherita siti tu senentang siku lelaki ke  benama John Ssebunya balat agi ngenyinuka ati. Tu ketegal lebuh iya beumur empat taun, John ngerarika diri ari rumah ke dalam kampung lebuh tengah taun 1988 ketegal trauma meda indai iya parai ditimbak apai iya empu.

Lebuh ke ditemu siku indu tiga taun udah nya, dia selangkuh tubuh John nya balat amat ngenyinuka ati laban buk iya panjai sereta enda disugu. Iya mega bejalai ngena kedua-dua jari enggau kaki sereta  enda ulih makai pemakai ke disumai. Taja pia iya benasit manah laban diiruka sepasang melaki bini. Ke nyelai nya, udah ke enggau sida nya sebilik, iya ulih nyadi raban koir.

Ulah

Pakar penyakit mental ari Pusat Perubatan Universiti Malaya, Profesor Dr. Nor Zuraida Zainal, madahka, taja pan cherita mensia ditupi jelu enda kala nyadi ba menua Malaysia tang mensia ke kenyau ari mit diau di habitat natural ulih ngembuan ulah baka jelu nya.

Ku iya, lebuh mensia agi mit, sida belajar ngena chara meratika ulah individu tauka jelu ti dianggap sida indai.

Proses tu mega dikumbai etologi tauka pansik senentang ulah jelu. Sama baka anak itit ti baru mechah lalu tetemuka siku kera deka ngumbai kera nya indai iya.

“Kelebih agi enti mensia nya udah begulai enggau jelu sepengelama betaun-taun. Jelu endang enda nyerang nembiak mit laban sida enda ngeruga pengelikun jelu nya.

“Jelu enda ulih bepikir. Tiap-tiap ulah iya bepelasarka chara iya meratika utai sereta ulah ti suah digaga. Asil iya, mensia ti idup begulai enggau jelu kurang agi pandai ari sukut mental iya,” pia ku iya.

Taja pia, Zuraida madahka enti iya ditemu sereta diperubatka maya iya agi mit peluang mensia nya deka gerai nya endang tinggi.

“Tang enti udah ngangkat diri bujang, engka sida nemu ngelaban sereta ngelarika diri ke kampung baru,” ku iya.

Iya mega enda besetuju madahka mayuh cherita mensia idup begulai enggau jelu nya semina cherita ti digaga sengapa sereta cherita bula sekeda orang.

“Sida engka bisi ngembuan penanggul ari sukut fizikal kenyau ari mit tauka bepenyakit, nya alai sida dibuai ari sida sebilik.

“Kadang-kadang pengurang fizikal nya dikena ngiga untung nengah chara bepupuka duit,” ku iya.

Direktor  Zoo Negara, Dr. Mohamad Ngah enda nulakka buah runding ke madah mensia ulih idup begulai enggau jelu tang kes ti baka nya jarang bendar nyadi.

“Jelu ngembuan habitat enggau chara idup iya empu  sama baka  mensia. Agi mega kapa kitai deka ngemaruhka imej mensia ke endang utai idup ke pengabis pandai di dunya tu?” ku iya.                                  -Kosmo