Lingga deka nyadi pengeluar ikan terubuk pengabis besai

Menua Lingga deka nyadi palan ngeluarka ikan terubuk ke pengabis besai ba nengeri Sarawak, ku Sapit Menteri Dagang Dalam Menua, Gerempung Kerejasama enggau Pekara Bebelika Barang (KPDNKK) Malaysia, Datuk Rohani Abdul Karim.

Pekara tu deka nyadi berindik ari penumbuh Palan Pemansik Ikan Terubuk keterubah ba Sarawak dibuka ba Pasar Mit Lingga lalu nyadi palan pengeluar ikan terubuk ke pengabis besai di menua tu.

“Pengudah tembu pengawa mansik nya ila, kita andal iya deka nyadi palan endur nupi anak ikan terubuk kelimpah ari nyaga purih bansa ikan nya,” ku iya.

Rohani ke lalu nyadi Kaban Parlimen Batang Lupar bejaku munyi nya maya ngulu pengerami Tuai Begulai enggau Rayat ke diatur Opis Pekara Khas Sarawak (JASA) Bagi Menua Sri Aman bepalan di Rumah Sambau, Nanga Entulang, Sri Aman demalam.

Ketegal purih bansa ikan terubuk tu nyau majak pupus, nya alai, engkeman endar perintah muka palan endur mansik sereta ngiga jalai nyaga purih bansa ikan tu.

“Perintah pechaya, kelimpah ari mansik sereta nyaga bansa ikan tu, palan tu mega ulih dikena nupi purih bansa ikan terubuk lalu deka mujur nyadi palan pengeluar ikan terubuk pengabis besai ba nengeri tu.

“Ukai semina nya aja, palan pemansik tu ila deka nyendiaka purih bansa ikan terubuk lalu kita pechaya menua Lingga ulih  nyadi palan ke engkeman endur nupi ikan terubuk,” ku tandu iya.

Enti sema palan endur mansik ikan terubuk nya udah tembu ila, Lingga nyadi pengeluar ikan terubuk pengabis besai, lalu Sarawak mega badu agi ngimpot bansa ikan nya ari menua luar laban ngembuan palan nupi ikan terubuk kediri empu.

Rohani mega madah, sebedau tu Sarawak meli ikan nya ari menua India.

“Kitai badu agi meli ikan nya ari menua luar, nya alai, manah enti kitai (Sarawak) meli ikan terubuk ari menua diri empu,” ku iya.

Enti sema palan pemansik nya udah tembu, ku iya, menua Lingga deka nyadi palan narit temuai kelimpah ari tebilang enggau Palan Meram Telu Baya di Pulau Seduku.

“Bala temuai ke datai ngagai Lingga ukai semina deka meda Palan Pemansik Ikan Terubuk tang mega deka meda Palan Meram Telu Baya di Pulau Seduku kelimpah meda pemanah rampa menua ke tebilang di Batang Lupar iya nya bena. – Dibali ari Utusan Borneo