Tanda-tanda Pengawa Bepilih Besai Parlimen (PRU) Udah Semak

Aku minta ampun ari kaki ngagai punjung pala enti  sema utai ke dikenang aku enda sama enggau enggi engkita nyangka enda sebaka perening, enda sebaka iching, enda sebaka peda, enda sebaka tela.

Majak kuat, angat sereta berapi-api jaku-jaku pengawa bepilih besai, majak panas mega rampa politik satu Malaysia. Pandak jaku, baka ku iklan ikonik Astro enda lama suba — “macam-macam ada.” Entara nya:- 

1. Menteri Besai, diripotka surat berita The Sun madah hari pengawa bepilih besai nya “trademark” (chap dagang) iya. Reti utai ku iya nya, pemutus ngeletakka hari PRU nya hak iya siku aja. Iya ngembuan pengarap ati ke orang India diatu udah pulai nyukung Barisan Nasional sereta minta mayuh agi sada nyawa dua petiga dipulai ngagai BN.

2. Taja pan diatu kimpin nyau majak ngena teknologi baka kimpin ba blog, Facebook enggau Twitter, aspek-aspek arap ke antu ba runding sekeda orang politik agi bisi. Nya mih diatu bisi ninga berita madahka mayuh orang tukang tenung enggau burung iya, sami ari mayuh bengkah pengarap, bomoh Siam enggau Kiai Jawa nerima temuai ke deka meda nasit sida dalam pengawa bepilih tu ila.

3. Berita ke didinga madahka peragam tok sami nya pengawa bepilih tu dalam bulan Jun tu, bulan, bintang enggau matahari deka bebaris harmonis ba singka miga nandaka maya ti engkeman kena beentaruhka nasit. Engka ketegal nya kebuah bisi orang melabaka PRU deka dipejalaika dalam May tauka June.

4. Taja pia, semina Najib deka nentuka semua peragam senentang haribulan PRU nya nemban. Nya endang udah chap dagang ti direjista atas nama iya.

5. Udah bekau charut PAS di Kedah, diatu nyau gintir  DAP. Presiden Nasional iya, Karpal Singh nyau majak betalat enggau Mandal Sekretari ke lalu mega Sapit Kepaka Menteri II Pulau Pinang, Dr P. Ramasamy. Karpal enda puas ati ke pemutus penemu Komiti Kuasa Disiplin senentang komplin salah ulah Ramasamy lalu nyeleintingka serang iya ngagai chairman komiti nya, Tan Kok Wai. Utai ke nyadi dalam DAP diatu iya penyarut ketegal berebutka kuasa entara raban orang lama enggau baru dalam parti nya. Penyarut dalam PAS enggau DAP nya tentu iya enda manah ke Parti Pakatan Rakyat.

6. Kelimpah ari isu sapi enggau kondo NFCorp ti nekanka Tuai Indu Umno, Shahrizat Abdul Jalil, keluar ari Kabinet, Umno mega lenyau siku veteran lebuh Menteri Pemadah ke dulu suba, Abdul Kadir Sheikh Fadzir, madahka diri pansut ari parti sepengudah 56 taun berengkah ari 19 March. Iya ngemansutka diri udah ti dichabar  Sekretari Agung Umno, Teuku (Tengku) Adnan Mansor ke ngasuh iya keluar enti enda puas ati ke parti.

7. Ukai semina Abdul Kadir aja keluar parti. Mayuh agi sida bukai pansut ari Umno tang nama sida agi dalam rejista pampang parti enggau tauka enda berani madahka pekara nya ngagai indu opis parti.

8. Mayuh sida ke pansut ari parti agi komited ngagai Umno, tang sida enda tentu arapka tuai-tuai dalam parti, kelebih agi ngagai pengawa ke ngetanka hak orang Melayu. Tuai ringkat atas Umno semina dipeda ngemeratka Barisan Nasional ari Umno.

9. Komiti Akaun Parlimen (PAC) madahka National Feedlot Corporation (NFCorp) ke diempu sida Shahrizat sebilik enda mayar pulai utang mudah ke perintah kena bulan January enggau February lalu penyampau utang nya RM34 juta.

10. Dr Hasan Ali, ke kala nyadi Exco Perintah Pakatan Rakyat Selangor, ke baru dibuai ari PAS ketegal belaya enggau tawing kunsi DAP, madahka diri gaga ngenataika ba aum DUN nyadi pengari ngati kediri. Penguji ngagai PAS iya nya buktika ke orang Melayu/Islam sida ukai di baruh tunjuk DAP enggau PKR.

11. Sekeda pekebun FELDA enggau pengari sida agi ngelaban IPO FELDA Global Ventures. Agi mayuh utai ngeruga modus operandi ti datai ari tuduh penemu IPO nya bedau ulih disaut. Siku menteri kanan ke dulu suba bisi nanya senentang “preference shares” ti deka meri peluang dividen ngagai sekeda orang sereta melakangka bala pekebun.

12. Enda ngira  di nengeri perintah BN tauka PR, pengelantang enggau pengelikun rayat besehari-sehari nyau majak kurang. Bandar raya, bandar enggau pasar nyau majak kamah, jala raya belubang enggau ukui (betuan enggau siga) dedayau nyadi penanggul ngagai orang mayuh. Di Bukit Mertajam, Seberang Prai baru tu tadi, siku nembiak beumur tujuh taun, Dhiya Qairina, diserang ukui orang sepiak rumah lebuh iya benung bebasikal.

13. Diatu dalam satu Malaysia (rakyat dikenuluka, pengulih dikemeratka) ukui, baik nya ke bisi orang empu tauka iya ke siga, sereta babi kampung nyadi penanggul besai ba Malaya. Dulu ukui ke nadai lisin begantung ba rekung sigi ditangkap tauka ditimbak. Tang diatu enda agi. Nganti dataika bala mensia dirampit penyakit ukui gila (rabies) baru mih Perintah begau chapuh, besemaya deka mutarka pekara nya.

14. Enda chukup enggau ukui, babi kampung enggau kera, kitai mega kena main orang ke ngampar datai ke menua kitai (halal enggau haram). Ketegal raban perunding antarabangsa enggau diplomatik kitai enda tentu berapa ngujung menua kitai kena buli kiba kanan ulih menua bukai ke berimbai enggau menua kitai. Menua tu patut nyadi pangan tang udah nyadi munsuh.

15. Bisi 1,100 penyukung ba sitak Mas Gading ngetu nyadi kaban Parti Demokratik Progresif Sarawak (SPDP) laban deka meri sukung sida iya ngagai Kelab Barisan Nasional (BN) ti betuaika Seraban Lima Iku (G5).

16. Rayat pun menua nyukung pemesai korporat, Dato Sri Mahmud Bekir Taib dichalun bediri ba kerusi Parlimen Kota Samarahan ba pengawa Bepilih Besai Menua PRU13 tu ila. Mensia mayuh ke diau ba sitak nya minta pemesai Barisan Nasional (BN) madu Mahmud nyadi chalun ngetanka kerusi Parlimen Kota Samarahan lebuh PRU13 ti dipelaba deka diatur enda lama agi.

17. Seraban indai orang udah berengkah ngepunka petisyen dalam arus nyukung Gempuru Bersih 3.0 enggau 8 Tuntut Bersih 2.0 ke diatur Pakatan Ungkup Pengawa Bepilih ke Beresi enggau Enda Bechiping. Raban indu ari semua nengeri di Malaysia, nyengkaum Sabah enggau Sarawak, diripotka enggau ari ati diri ngelangkar Petisyen Mamas@Bersih3.0 nuntut pengawa bepilih enggau pengidup ke lantang ungkup anak.

18. Berita TV1 enggau TV2 ninting malam bejaika orang tauka menua ke enda dikerinduka sida iya. Bisi nya amat tang mayuh agi ke bula nyentuk munyi Nauk ke madahka diri belaukka keruntuk lama nyanggang. Orang ke nadai internet semina ngarapka berita tv nya aja. Bisi dua kelas rayat – iya ke kurang nya ngarapka berita tv lalu iya ke pandai nya nerima berita ari media alternatif. Iya ke enda berapa nya semina ngarapka berita aja, tang iya ke pandai nya lalu ngaga analisis sereta enda mudah arapka jaku orang.

19. Isu pengundi antu datai baru. Kenu ku surat berita Harakah bisi 1.7 juta pengundi antu dalam taun 2006 diau nyau segau-segau serata menua. Enti suba berita pasal antu tu mayuh didinga bisi ba menua Sabah aja lebuh orang ke begau projek IC. Enda mukai-mukai penyampau tubuh orang Sabah maya nya nyau bela enggau penyampau tubuh di Sarawak. Antu aja nemu sapa empu pengawa nya. SPR ngaku bisi 42 ribu nama ke nadai berejista enggau Opis Pengerejista Bansa. Mimit aja ku sida – enda bulih 0.3% tang sida enda ingat bida siti undi ulih ngasuh siku-siku orang ke enggau pengawa bepilih nya menang.

20. Menteri Besai nangkan rayat anang begaut nukar deriba ba tengah jalai. Nadai ngawa enti deriba nya palau tauka enda nemu deriba asal penumpang enda mayuh serebana. Ba penemu iya semina deriba ke diatu aja ke landik neriba kerita. Peneka iya nguingka kerita nya.

21. Dalam system demokrasi menua tu, kenu ku orang, rayat semina nyadi tauke maya pengawa bepilih aja tang enti udah tembu pengawa nya tauke baru nya orang ke ngari ke sida ke milih laban ku iya sida udah meri kuasa penuh ngagai tauke baru ngagai sebarang utai ke dipikir iya betul ba runding pala iya enggau kaban iya.

22. Tiap-tiap kali bisi pengawa bepilih, bisi aja orang besemaya deka meri projek. Bisi nya meri duit. Taun 2012 tu endang tuan beberika duit – duit nulung nembiak sekula RM100 siku, duit baucar bup RM200 siku ke nembiak ba institute pelajar tinggi, RM500 sepintu ke sida ke begaji kurang ari RM3000 sebulan. Semua tu diberi sekali taunt u aja. Enti kita deka nganti lima taun da agi.

Mayuh amat tanda-tanda pengawa bepilih besai parlimen nyau semak. 

Enti kitai ke macha tu deka nambah, tambah dia mih.