Parlimen Malaysia

Pengawa bepilih besai parlimen nyau semak amat. Ninting lemai kitai ninga berita pasal menteri besai enggau sapit iya ke ulu enggau ke ili bedajaka berita pemanah ngagai rayat.  Enti nitihka timpuh pengari ke diatu deka tembu taun 2013 ila. Tang diatu baik nya ba media chelak internet enggau televisyen bela kiruh bejaku pasal pengawa bepilih. Nya alai ditu nguji enggau ngelansa senentang parlimen.

Nama utai ke dikumbai Parlimen?

Parlimen nya ngundan Yang di-Pertuan Agong (YDPA) enggau dua ‘dewan’ ke dikumbai Dewan Rakyat enggau Dewan Negara.

Dewan Rakyat bisi 222 orang nyadi pengari ke dipilih pengundi Malaysia. Sida 222 iku tu dikumbai ‘Members of Parliament’ tauka suah dikumbai ngena jaku pandak MP.

Dewan Negara bisi 70 orang ke dikumbai ‘Senators’. 26 iku senator nya dipilih. Tiap-tiap Kaunsil Negeri tauka kemaya hari tu dikumbai Dewan Undang Negeri milih 2 iku nyadika senator ngarika nengeri sida dalam Dewan Negara. 44 iku ke bukai nya dituduhka YDPA. YDPA  nuduh  2 iku ari Wilayah Persekutuan  ari Kuala Lumpur, siku ari Wilayah Persekutuan Labuan lalu siku agi ari Wilayah Persekutuan Putrajaya sereta 40 iku ke bukai.

Nama pengawa Parlimen?

Parlimen bisi empat bengkah pengawa:-

-          Nengkebang sereta ngubah undang-undang menua ti dikumbai akta

-          Nyaga(control) baka ni duit menua dipelanja

-          Meratika baka ni Perintah Besai (Federal Government) merintah menua

-          Bejuraika pekara tauka penanggul ti ditapi rayat Malaysia

Sapa nyadi kaban Dewan Rakyat enggau Dewan Negara?

Sapa-sapa orang Malaysia ke diau mendam di Malaysia ke beumur 21 taun tau enggau orang dalam pengawa bepilih nyadi MP.

Baka nya mega sapa-sapa orang Malaysia ke beumur 30 taun ulih dituduh nyadi Senator. Timpuh nyadi Senator nya tiga taun lalu iya semina ulih nyadi Senator dua kali dalam pengidup orang nya tauka dua renggat aja.

Orang ke enda ulih nyadi MP tauka Senator tauka terus nyambung nyadi MP tauka Senator enti iya bisi ditemu:-

-          Enda manah untak

-          Bengkerap

-          Megai pengawa opis ke bisi bulih untung

-          Melanja duit lebih ari ti dikemendar baruh undang-undang menua lebuh bekimpin pengawa bepilih besai

-       Ditemu salah dalam kot sereta nerima ukum jil setaun tauka lebih, tauka diletak ukum mata duit RM2000 tauka lebih tauka

-          Nyadi peranak menua bukai 

Ulih kaban Dewan Rakyat tauka Dewan Negara badu? 

Ulih. Taja pia enti MP nya badu, iya enda ulih nyadi MP dalam timpuh 5 taun sepengudah iya badu.

Nama reti pengawa puang ba Dewan Rakyat tauka Dewan Negara?

Pengawa puang dalam Dewan Rakyat tauka Dewan Negara bisi lebuh MP tauka Senator nya parai, badu tauka enda patut agi nyadi kaban dewan. Pengawa ke puang nya enda tau enda diisi dalam timpuh 60 hari. Reti nya MP baru dipilih nengah pengawa bepilih tauka Senator enda tau enda dituduhka nengeri tauka YDPA dalam timpuh 60 hari udah pengawa nya puang.

Kati MP enggau Senator bisi dibayar gaji?

Bisi, tang ukai dikumbai gaji, iya dikumbai elaun. Parlimen ngeletakka penyampau elaun kaban Dewan Rakyat enggau Dewan Negara. Penyampau tu udah disebut dalam akta ti dikumbai ‘the Members of Parliament (Remuneration) Act 1980. Di baruh tu dipandangka elaun sida MP enggau Senator.

MP	RM6.508.59
Senator	RM4,112.79
Tuai Penyakal	RM3,846.59 (champur mega enggau elaun MP)
Speaker Dewan Rakyat	RM14,907.20(champur mega enggau elaun MP)
Mandal Speaker Dewan Rakyat	RM10,847.65(champur mega enggau elaun MP)
Presiden Dewan Negara	RM14,907.20(champur mega enggau elaun Senator)
Mandal Speaker Dewan Negara	RM10,847.65 (champur mega enggau elaun Senator)

Kati kaban Kabinet sebagi ari Parlimen?

Ya, nitihka undang-undang menua, kaban Kabinet nya enda tau enda MP tauka Senator. Menteri Besai enda tau enda siku ari MP.

Kati MP tauka Senator mesti besumpah gawa?

Ya. Sida besumpah gawa bebendar enggau ati ti lurus, angkun sereta taluk ke Malaysia lalu besedia ngibun, nyaga sereta ngetanka undang-undang menua.

Nama utai ti dikumbai aum Parlimen?

Aum Parlimen nya aum entara MP ba Dewan Rayat tauka entara Senator ba Dewan Negara. Tiap-tiap kali udah pengawa bepilih besai Parlimen, YDPA deka ngangauka aum Parlimen. YDPA ke ngangauka aum nya ari lalau Menteri Besai.

Parlimen mesti baum dalam timpuh 120 hari sepengudah pengawa bepilih besai. Aum nya dipejalaika nitih renggat (sessions). Taja pia, Parlimen enda ulih ngetu baum lebih ari enam bulan di entara tiap-tiap renggat.

Parlimen abis timpuh nengah chara automatik sepengudah 5 taun ari aum iya ti keterubah sepengudah pengawa bepilih besai. Taja pia timpuh nya ulih dikurangka ari lima taun enti bisi pemendar ari YDPA. Enti Parlimen udah abis timpuh, pengawa bepilih besai enda tau enda diatur dalam timpu 60 hari ari haribulan iya abis timpuh.

Baka ni gaya aum dipejalaika di Dewan Rakyat enggau Dewan Negara?

Raban MP dalam Dewan Rakyat milih Speaker (Yang di-Pertua Dewan Rakyat) enggau dua iku Mandal Speaker. Sida tiga tu mih bejalaika aum nya. Speaker ulih dipilih ari MP tauka orang ke layak bediri dalam pengawa bepilih Parlimen nyadi MP.

Dalam Dewan Negara, raban senator milih Presiden (Yang di-Pertua Dewan Negara) enggau siku Mandal Presiden. Seduai tu mih ngatur pejalai aum dalam Dewan Negara.

Tiap-tiap dewan tu endang ngembuan atur dikena bejalaika aum. Atur nya dikumbai ‘Standing Orders’.

Nama pengawa YDPA dalam Parlimen?

YDPA ngangau sereta nangguhka aum Parlimen tang iya ke ngereja pengawa nya mesti nitihka lalau ari Menteri Besai tauka Kabinet.

Taja pia, YDPA bisi kuasa mutuska Parlimen ari abis timpuh taja pan dipinta Menteri Besai tauka Kabinet.

Simpul Kenang

Nya gaya kenang ngelansa senentang Parlimen. Arapka ulih nyadika penyanding penemu ngagai bala kitai ke bedau apal senentang pengawa Parlimen.