SEOUL – Rayat
Korea Selatan ke beumur baruh 18 taun ditagang meda konsert bintang pop Amerika
Syarikat, Lady Gaga laban dikumbai enda engkeman dipeda peminat bujara, ku sida
ke ngatur konsert nya kemari (30 March 2012).
Lady Gaga,
26, deka berengkah ngepunka konsert serata dunya ketiga iya, The Born This Way
Ball, kena 27 April di Stadium Olimpik ditu.
Sebedau tu, orang
ke beumur 12 taun ke atas aja diberi pemendar meda konsert Lady Gaga.
Taja pia, nitihka
pengatur program tu, Hyundai Card, madahka sebuah gerempung ke ngemataka
pengawa menua iya nya Lembaga Penarafan Media Korea ngangkatka taka umur orang
ke meda.
“Syarikat
kami bebasaka pemutus penemu lembaga pengawas tu lalu mulaika duit pemegai
tiket ke beumur 18 taun ke baruh,” pia ku pemesai Hyundai Card.
Konsert Lady
Gaga di menua nya ditagang sekeda gerempung pengarap Korea Selatan ketegal penyanyi
lagu Poker Face tu dikumbai nyukung homoseksual kelimpah ari gaya iya ke
beperindang balat bendar dipeda kamah.
“Komuniti
Kristian kami begunaka atur ti sama dikena nyeliahka raban nembiak ari dirampit
penyakit homoseksual enggau pornografi (ke dibai Lady Gaga),” ku Gerempung Kaul
Entara Gereja Korea dalam siti penerang berita.
Penyanyi nya
ditaga ngatur 110 konsert taun tu berindik ari pemujur lagu popular iya, Born
This Way.
Bintang luar
biasa nya ngembuan nyau deka 22 juta penitih di laman sosial Twitter lalu deka
ngepunka konsert serata dunia iya ditu.
Udah nya,
iya deka ngaga konsert iya di Hong Kong, Jepun, Singapura, New Zealand enggau
Australia.
– AFP
Tiada ulasan:
Catat Ulasan