Tips ngundi dalam pengawa bepilih besai

Mayuh orang nanya tentang sapa ke patut sida undi dalam pengawa bepilih besai ti deka datai tu ila. Tanya ti baka tu pansut ketegal agi mayuh nembiak rebak baru kemaya hari tu bedau ngaga pemutus penemu senentang parti ti deka dipilih sida. Pekara tu enti diperatika enggau silik nya ngayanka siti ari pemasang ti manah, ketegal rayat udah berasai nadai agi disekat ari dipegai raban fanatik tauka nyukung orang sengapa-kada.

Enti ulah tu diiring enggau manah, iya ulih nempa rayat ti enda ulih dikemelika tauka dikemaluika lalu seruran sedia berubah bepelasarka pengulih ti dipandang tiap-tiap parti ti betanding.

Nya alai kenang pengarang sekali tu nguji nijir sekeda langkah rapat tauka malin dikena pengundi milih pengari nitihka konteks menua kitai tu;

• Ngundi mih enggau penemu ukai semina nitihka penemu orang aja. Reti nya, pemutus penemu ti deka milih siku-siku pengari nya belalauka personaliti pengari nya. Nya alai, tiap-tiap individu ke deka nurun ngundi enda tau enda ngembuan penerang senentang pengari ti deka dipilih. Enti pengundi nya udah tuai tauka enda tegigaka penerang kediri, iya patut betanya ngagai orang ke ulih dikearapka ulih meri penerang ke amat.

• Dingaka penerang ari mayuh penatai lalu nyerenih iya ti pengabis manah. Kebuah pia, laban dalam pengawa bepilih besai pengari ke bediri nya lebih ari siku, nya alai kitai patut berunding sapa ke deka dipilih entara sida nya. Ba menua kitai, kadang-kala ruang mending penerang senentang semua raban enggau enda bechiping penemu nya tusah dikeulihka kelebih agi ba menua pesisir. Suah agi berita ke didinga kitai nya berat sepiak. Tang taja pia, enti kitai nguji bebendar kitai ulih bulih penerang ari semua raban senentang nama ke deka enggau ke ulih digaga chalun pengari nya.

• Pilih chalun pengari ke pengabis patut ari sukut pengulih iya bekereja sereta pengelurus ati iya. Enti siku-siku chalun pengari nya ulih nyadi tuai sereta ngembuan nilai pengelurus ati, nya tau ngujungka iya ngembuan ulah ti beterus-terang senentang penuduk iya ke dipilih nya. Nya mih chalun ke patut dipilih nyadi pengari. Enti orang ke bekempit enggau iya nya nadai ngembuan pengulih  ti baka nya patut bendar undi diberi ngagai chalun ke ngembuan tukuh ti patut.

• Enti semua chalun pengari nya bisi tukuh ti patut, kitai patut milih chalun ti pengabis efektif ke penuduk nya. Pekara tu ulih dipeda ari mayuh faktor, baka program enggau manifesto parti iya, penguat penyukung ari baruh iya, tukuh nyelai ke bukai; baka peneleba, latar pelajar enggau ti bukai. Nya alai, enti kitai udah ngelala chalun pengari, kitai mega patut nemu tuju sesebuah parti nya laban siku-siku pengari chalun endang dipegai atur enggau tuju parti iya.

• Enti semua chalun pengari nya nadai ngembuan tukuh ti patut megai kerusi nya, dia kitai patut milih chalun ke bukai pengabis kurang ngenataika penusah ngagai rayat enti dibandingka enggau iya ke bukai. Tu belalauka penemu ke madah “Penusah ke pengabis besai lenyau ketegal penusah ke enda berat”, tauka “Milih penusah ke pengabis kurang”. Jalai tu dikena lebuh kitai betemu enggau semua iya ke dipilih nya jai memegang.   

• Betatika rekod, tuju, manifesto enggau nama aja ke nyata enggau besilup dalam parti ti dipasukka siku-siku chalun pengari nya mega patut mega dikemeratka. Kebuah laban bisi maya individu ke dalam sesebuah gerempung nya ngembuan kaul enggau pengarap sereta nilai diri individu nya. Nya alai, enti kitai nemu latar chalun, kitai ulih nilai parti ke dipasukka iya. Enti rekod parti nya jai, kitai ulih mega bepegai ba prinsip Islam:  “Orang mukmin enda  dipatuk ari siti lubang dua kali” (Riwayat al-Bukhari dan Muslim). 

 

• Enti semua chalun pengari nya enda ditemu personaliti sida, lalu nadai mega rekod ti jai ba parti sida, dia kitai ke milih nya patut meratika tuju enggau manifesto parti ti dikenataika sida. Kitai patut manding ni ti ludas agi dalam ngereja pengawa sereta manah agi ke rayat enggau menua.  Konsep tu dikumbai Ulul Albab dalam pengarap Islam.

• Entara chalun ke manah enggau parti iya ti jai tauka enti chalun nya jai tang parti iya manah, dia kitai patut ngenuluka  personaliti  chalun.

• Pia  mega enti pengari nya udah beberapa kali ngarika sitak kitai tang lalu nadai mai pemansang ngagai menua ke dipegai iya – nadai ga guna kitai terus milih iya, semina tak ngaji iya buta. Penusah kitai nyau pulaika pengelantang iya.

Simpul Penemu

Nya alai kitai ke nyadi pengundi endang tau dikumbai tauke lebuh maya pengawa bepilih laban kitai ke mutus sapa ke deka dipilih kitai maya nya ila. Nya alai lebuh bekimpin sida dipeda kitai sanggup betabi enggau semua orang enda milih orang nya kaya tauka miskin, bepengerai tauka bisi kurap ba jari. 

Tang enti pengawa bepilih nya udah tembu, idar kitai meri kuasa ngagai pengari kitai ngaga pemutus penemu ke kitai. Nya mih maya iya tau salah meri pemutus penemu ke enda ngarika kitai agi laban terunda-runda enggau tuju parti ke dipasukka iya tauka ketegal penguntung ke balat agi ngemeratka iya empu. Nya alai anang sekali-kali ngasuh penusah kitai nyadika pengelantang sida laban tiap undi ke menang nya enti salah pilih kitai nganti pengawa bepilih baru alai kitai muai iya.